Jieremaya 51 - BAYỊBURU Izii

¹ Wakwa iphe, Chipfu epfu baa: “Unu lekwa; mu a-kpali onye mmebyi g'ọ bụru ọgu dụru ndu Bábilọnu; mbụ ndu bu l'alị, aza ‘obu ndu wụ-lihuru etso mu opfu’.

² Mu e-zi ndu ọhozo g'ẹphe je etsoo ndu Bábilọnu ọgu; g'ẹphe je aphụchaa phẹ aphụcha; mee alị phẹ adabyiru iphoro. Ẹphe a-nọdu abya iya ọgu ẹka ẹbo ẹbo mẹ o -rwuẹpho mbọku ono, ee-mebyishi phẹ ono.

³ G'onye agbajẹ apfụ te setakwa ụta iya k'agbagba; ọphu ọ kwakwa onwiya ngwọgu. Unu ta aphụkwaru ụnwokorobya phẹ obu-imemini. Unu mee ndu ojọgu phẹ g'ẹphe bvụeberu mu rengurengu.

⁴ Aa-nọdu egbushi phẹ; ẹphe ada gbiigbii l'alị ndu Bábilọnu. Mbụ l'aa-nọdu emeka phẹ iphe ọkpobe emeka l'agụga gbororo.

⁵ A makwarụ-a l'alị ndu Ízurẹlu ẹphe lẹ ndu Jiuda l'ophu bụ iphe, jiru iya nụ bụ ikpe-anmanma, nmarụ phẹ l'iphu Onye Nsọ kẹ Ízurẹlu. Ọle Chileke phẹ, bụ Chipfu bya abụru Ọkalibe-Kakọta-Ike teke agbadokwa phẹ.

⁶ Unu gbaa ọso shi l'alị ndu Bábilọnu gbalaa! G'onyenọnu dzọo onwiya ndzụ! G'e be mebyishikwa unu opfu l'ẹphe meru iphe-ẹji; noo kẹle o rwuakwaru teke Chipfu e-melata; mbụ teke ọo-pfụ phẹ ụgwo, gbaru phẹ nụ.

⁷ Bábilọnu shi bụru okoro, e meru lẹ mkpọla-ododo l'ẹka Chipfu. O gude iya mee mẹe tsụahaa ndu mgboko l'ophu. Ọhamoha ngụru mẹe, shi l'okoro ono. Ọo ya meru g'o gude ẹphe meahaa ọbvu ọbvu nta-a.

⁸ Bábilọnu dawarụ l'ọtulupfu tsukpọshihu. Unu rashịa ẹkwa iya ike! Unu kpatakwaru iya ọbvu-etete g'o mebe l'ẹka iphe eme iya ẹhuka. ?A maru l'oo-shi nno bụru iya ewekọrohu?

⁹ ‘Anyi gege emetakwa Bábilọnu iphe, eme iya nụ; ọle o to nwehẹedu ewekọrohu. G'anyi parụ iya haa g'onyenọnu lashịa alị iya; kẹle ikpe, nmarụ iya nụ rwuwaru akpaminigwe; mbụ l'ọ ha ephekerephe g'ẹka urwukpu nọ.’

¹⁰ ‘Chipfu meakwaru; anyi bụru ndu pfụberekoto ọzo! Unu bya g'anyi je l'úbvú Zayọnu je akọo iphe, Chipfu, bụ Chileke anyi meru!’

¹¹ Unu rwachaa ọnu apfụ unu arwacha! Unu achị-lia iphe, unu egudeje egbobuta onwunu! Chipfu kpaliakwaru ndu eze ndu Midiya; noo kẹle iphe, ọ tụberu bụ g'o mebyia alị ndu Bábilọnu. Chipfu a-gwata ụgwo iphe; ụgwo iphe, e meru eze-ụlo iya.

¹² Unu palia ẹkwa-ọhubama gude goshi l'ọgu dụru igbulọ mkpụkpu Bábilọnu! Unu cheshi nche ike! Mbụ-a unu mee gẹ ndu nche nọdu lẹ nche! Unu eje l'ẹgbudu je edokaa ndu mpya-ọgu; kẹle Chipfu e-mekwa iphe, ọ tụberu; mbụ iphe, ọ chị-buhuhawaru lẹ ya e-me ndu bu lẹ Bábilọnu.

¹³ Unubẹ ndu bu l'agụga ẹnyimu; tẹme unu nweru ẹku shii; ndzụ unu bvuakwaru! Mbụ l'ẹba-oghu ndzụ unu gbabuhuakwaru!

¹⁴ Chipfu, bụ Ọkalibe-Kakọta-Ike gudeakwa onwiya ria angụ sụ lẹ ya a-chịru nemadzụ ye lẹ mkpụkpu ono; ẹphe eji iya kpimu; sweta iya g'ẹka igube swetaru. Tẹme ẹphe atụa okoo kpua unu.

¹⁵ Ọo ọkpehu iya bẹ o gude mee mgboko. Ọ bụru mmamiphe iya bẹ o gude mee mgboko; ọ ngụru angụru; bya egude nkwamẹnya iya phụshi akpaminigwe.

¹⁶ O -mee; igwe raa ọ́rà; mini, nọ l'imigwe aphụa gbudugbudu. Ọ nọdu emeje g'urwukpu shi l'ẹka igwe beru sọru sọfuta. Teke o meru; igwe nọdu edze mini l'ọotukwapho egbigwe. Tẹme ọ nọdu eshije l'ụlo ẹku iya kpofuta phẹrephere.

¹⁷ Nemadzụ l'ophu te enwedu egomunggo. Tẹme ọphu ọ dụdu iphe, ọ maru. Iphere gudekọta iphe, bụkpoo ndu akpụ ụzu; ọ bụru ntẹkpe, ẹphe kpụshiru meru phẹ iya; kẹle ntẹkpe phẹ ọbu bụkota ụghoshi. Ọ tọ dụdu ọphu atụ unme.

¹⁸ Ẹphe bụkota iphe-mmanụ; iphe, e gude agba mgbọnu. O -rwuẹpho teke aa-nụ phẹ aphụ; ẹphe alaa l'iyi.

¹⁹ Onye ono, bụ okiphe oshilọkpa Jiékọpu ono ta adụkwa gẹ ndu k'ono; kẹle ọo ya bụ onye meru iphemiphe; mẹchakpoo ọkpa-ipfu ono, bụ okiphe iya ono. Onye ono bẹ ẹpha iya bụ Chipfu, bụ Ọkalibe-Kakọta-Ike.

²⁰ Ọ kwa ngu bụ ogbunkụ, mu gude alwụ ọgu. Ọ bụ ngu bẹ mu egudeje chịkaa ọha l'ophu. Ọ bụru ngu bẹ mu egudeje mebyia alị-eze l'ophu.

²¹ Ọ bụ ngu bẹ mu egudeje chịkaa ịnya; yẹe ndu nọ phẹ l'eli. Mu nọdu egudeje ngu chịkaa ụgbo-ịnya; yẹe ndu agba iya nụ.

²² Ọ bụ ngu bẹ mu egudeje chịkaa nwoke yẹe nwanyị. Ọ bụru ngu bẹ mu egudeje chịkaa ndu bụ ọgerenya; yẹe ndu bụ okorọbya. Ọ bụru ngu bẹ mu egudeje chịkaa nwoke ọgbaga; yẹe nwanyị ọgbaga.

²³ Ọ bụru ngu bẹ mu egudeje chịkaa onye eche atụru; yẹe atụru iya. Ọ bụru ngu bẹ mu egudeje chịkaa onye akọ opfu; yẹe eswi, o gude akọ iya. Ọ bụru ngu bẹ mu egudeje chịkaa ndu achị ọha; yẹe ndu-ishi.

²⁴ “Tẹme; ọzo bụ lẹ mu a-nọduepho unu l'iphu pfụa Bábilọnu; yẹe iphe, bụkpoo ndu bukọta l'alị ndu Bábilọnu l'ophu ụgwo iphe, ẹphe meru l'úbvú Zayọnu.” Nokwa iphe, Chipfu eepfu bụ onoya.

²⁵ Wakwa iphe, Chipfu epfu baa: “Lekwa; mu bụkwa ọgu dụru ngu; gụbe úbvú ono, anọduje emebyishi emebyishi ono; mbụ unubẹ ndu ono, mebyishikọtaru eliphe l'ophu ono. Mu a-machịru ngu ẹka l'ọoburu ọgu dụru ngu. Mu eshi lẹ mkpakpa-ọnu úbvú phụa ngu phụzeta l'alị; mee ngu l'ịiburu úbvú, a kpọru ọku.

²⁶ Ọphu ọ dụdu mkpuma aa-kwata l'ẹhu ngu k'eme mkpuma, gude ụlo. Ọphu ọ dụkwapho mkpuma, shi iya nụ, e gude atụ ọkpa-ụlo. Noo kẹle ịi-dabyiru bụru okorobo-ẹgu jasụ l'ojejoje. Nokwa iphe, Chipfu eepfu bụ ono.

²⁷ Unu palia ẹkwa-ọhubama l'alị ono! Unu gbua opu tsoru ọhamoha! Unu dozia ọhamoha g'ẹphe tsoo ya ọgu. Unu eje ekua ndu alị-eze, nọnu g'ẹphe tsoo ya ọgu; ndu Araratu; waa ndu Mini; waa ndu Ashikenazu! Unu họta onye-ishi-ojọgu, a-bụru iya ọgu! Unu achịfuta ịnya ye g'o zeru gbiigbiigbi je g'ẹka igube etsu.

²⁸ Unu dozia ọhamoha g'ẹphe tsoo ya ọgu; mbụ ndu eze ndu Midiya; waa ndu achị ọha phẹ; waa ndu-ishi phẹ; mẹkpoo ndu alị ẹka nọkota phẹ l'ẹka g'ẹphe hakọta.

²⁹ Alị anma jiijiijii bya echi gburugburu; kẹle iphe, Chipfu chịru k'eme ndu Bábilọnu dụkwa g'ọ dụ. Mbụ l'oo-me alị Bábilọnu l'ophu l'ọoburu ochobu; k'ọphu bụ l'ọ tọ dụdu onye byaru ebubaaru iya eburu.

³⁰ Ndu ojọgu ndu Bábilọnu bẹ hakwaru alwụ ọgu lachaa je anọdu l'ụlo phẹ, a kpụshiru ike. Ike bẹ bvụkotawaru phẹ nụ; ẹphe dụwaa g'ụnwanyi. Ẹka ẹphe bu ebubu bẹ a tụwaru ọku. Mgbọro-ígwè, o gude gbaa ụpho iya bẹ a nyajishiwaru.

³¹ Onye ọkpa-ẹgwa lanụ anọduje agba etso nwibe iya; onye-ozi etso onye-ozi ọzo; bụkpoerupho ndu eje ezi eze ndu Bábilọnu l'a nataakwaru iya mkpụkpu iya l'ophu l'ophu.

³² Ẹka mini asọkahu asọkahu bẹ a kuchichaakwaru; bya atụfu ọku l'ụda l'ụda, dụgbaa l'ẹka ono. Ndu ojọgu bẹ meji tọfuwaru.”

³³ Wakwa iphe, oopfu; mbụ Chipfu, bụ Ọkalibe-Kakọta-Ike; mbụ Chileke kẹ ndu Ízurẹlu: “Nwada Bábilọnu dụkwaa g'alị ẹka aazọshi ẹswa lẹ balị teke aazọ iya tọlitoli. Teke aa-kpa iya g'onye akpa ji rwuakwaru.”

³⁴ “Nebukadineza, bụ eze ndu Bábilọnu ripyawaru anyi. O mewaru; ọphu anyi amaẹdu iphe, anyi eme. O mewaru anyi; anyi bụru ite iphoro. Ọo g'ẹjo agwọ elweje iphe-a bụ g'o lweru anyi bya egude ẹku anyi rijia ẹpho; bya agbẹ teke ono gbọfu anyi.

³⁵ G'iwashị, e weru l'anụ-ẹhu anyi tukokwaru ndu Bábilọnu l'ẹhu!” Nokwa iphe, ndu bu l'úbvú Zayọnu epfu. “Gẹ mee anyi tukokwaru l'ishi ndu bu l'alị ndu Bábilọnu!” Nokwa iphe, ndu bu lẹ Jierúsalẹmu epfu.

³⁶ Ọo ya bụ lẹ-a; wakwa iphe, Chipfu epfu baa: “Lekwa; mu a-gbaru unu ọdzori; melata iphe, e meru unu. Ẹnyimu phẹ bẹ mu e-me g'ọ tashịhu; bya emee ọgba mini phẹ g'ọ tashịhuchaa.

³⁷ Bábilọnu e-mechaa bụru ikpọzu; ẹka nkụta-ọswa bugbaa; waa iphe, a-nọdu anyị ishi ẹdzu; tẹme l'e gudekwa iya phọ agba mgbọnu; ẹka ọ tọ dụdu onye bya eburu iya eburu ọzo.

³⁸ Ndibe iya g'ẹphe ha asụgbaa ekiri g'oduma. Mbụ l'ẹphe asụgbaa kọroro g'ụnwu oduma nshịi.

³⁹ Obenu l'ọo teke ono, oonwu phẹ phuruphuru g'ọku ono bẹ mu e-shiru phẹ nri ọbo-iphe; mee mẹe atsụahaa phẹ; k'ọphu ẹphe a-chịepho ọchi kpọkirihuchaa akpọkirihu; kuwarurọ mgbẹnya, ẹphe tee tehubaẹdu etehu. Nokwa iphe, Chipfu eepfu bụ ono.

⁴⁰ Mu a-kwata phẹ tụa l'alị g'ụnwu atụru, a chị eje egbushi; mbụ g'ikpoto ebili; yẹe ikpoto eghu.

⁴¹ Lewarọ g'e gude gude ndu Sheshaku; g'e gude lwụta ndu ndiphe l'ophu shi gude eku onwophẹ. Ọ bụakwaa iphe, anyị ishi ẹdzu l'echilabọ ọhamoha.

⁴² Ẹnyimu byaakwaru utso ripyabẹ alị ndu Bábilọnu. Ọ bụru gborogboro, ọoso bẹ o gude sọpyabe iya.

⁴³ Mkpụkpu lẹ mkpụkpu, nọ iya nụ bụkotaru ochobu; kpọhu nkụ; bụru alị evevee; alị ẹka adụdu onye bu iya nụ; ọphu ọ dụdu onye eshi iya eshishi.

⁴⁴ Mu a-hụ̀ Balụ ahụ̀hù l'alị ndu Bábilọnu. Mu emee ya l'ọ gbọo iphe, o lwehawaru elwelwe. Ọhamoha taa wụedu awụ-pfu iya. Tẹme igbulọ mkpụkpu Bábilọnu adakpọshihu.

⁴⁵ Ndibe mu; unu shikwa l'ime iya wụfuta! Unu gbakwaa ọso ndzụ unu! Unu gbalakwaaru oke ẹhu-eghu Chipfu!

⁴⁶ Gẹ meji ta tọfukwa unu; ọphu unu atsụhukwa ebvu; teke unu a-wata anụ ude ọgu l'alị ono; a -tụkpoo ọwa-a apha-a; apha ọzo l'aawata ọzo; mbụ teke iwashị adụ l'alị ono; tẹme onye-ishi anọdu etso onye-ishi ọgu.

⁴⁷ Ọo ya bụ; o nweru teke dụfutaje nụ, bụ teke mu a-nụ nshi ndu Bábilọnu aphụ. Alị phẹ l'ophu bẹ ee-me iphe-iphere. Ndibe iya, e gburu egbugbu adabyigbaaru adabyiru l'ime iya.

⁴⁸ Noo teke imigwe; mẹ eliphe l'ophu; yẹe iphe, bụkpoo iphe, nọkota iya nụ a-tụ ụzu l'ẹka ẹhu atsọ phẹ ụtso l'opfu ẹhu ndu Bábilọnu; kẹle ndu mmebyi, shi l'ụzo isheli abya phẹ etso ọgu.” Nokwa iphe, Chipfu eepfu bụ ono.

⁴⁹ “Ọ kwa gẹ ndu Bábilọnu meru ndu mgboko l'ophu; ẹphe daa pọopoo bụ gẹ ndu Bábilọnu ono a-da pọopoo ẹphebedua. Ọ bụru iphe, kparụ iya nụ bụ g'ẹphe gude gbua ndu Ízurẹlu.

⁵⁰ Unubẹ ndu nahụru ogu-echi; unu tụgbuekwapho! Unu be jekpọkwa anmarwụbe! Unu nọdukpooro ụzenya nyata Chipfu! Unu anyatakwaphọ Jierúsalẹmu!”

⁵¹ “E kpuakwarụ anyi iphu lẹ ntụ; kẹle a kọwaru anyi ọnu. Tẹme iphere kpuchiwaa anyi iphu; noo kẹle ndu ọhozo bahụru l'ẹka dụgbaa nsọ l'ụlo kẹ Chipfu.”

⁵² Wakwa iphe, Chipfu epfu baa: “Mbọku abyanụ-a, bụ mbọku, mu a-nụ nshi aphụ. Ọ bụru iphe, a-nọdu ada l'alị iya l'ophu bụ atsụ ude, ndu e mekarụ iphe atsụ.

⁵³ Ọ tọ dụkwa m'obetaru Bábilọnu jerwuchaa akpaminigwe; bya emee ụlo, a kpụshiru ike nkiya, dụ ephekerephe; mee ya; ọphu aabahụdu iya abahụ; bẹ mu e-yelẹ-a ndu e-je emebyishia ya. Nokwa iphe, Chipfu eepfu bụ ono.

⁵⁴ Ụzu-ẹkwa adakwa lẹ Bábilọnu; ụzu, egoshi l'e mebyishiwaru iphe, parụ ẹka l'alị ndu Bábilọnu.

⁵⁵ Chipfu abyawaa emebyishi Bábilọnu; byanyikọta oke ụzu ono, aanọduje atụ l'ime iya ono. Ndu ọhogu atụ akpara g'eze-ẹnyimu abya. Ụzu, ẹphe a-nọdu atụ ala ephekerephe.

⁵⁶ Noo kẹle onye mmebyi byawaru emebyishi Bábilọnu. Ndu ojọgu iya bẹ a kpụtachawaru lẹ ndzụ. Tẹme a gbajishiwa ụta phẹ mkpurikpu mkpurikpu; kẹle Chipfu bụ Chileke, apfụje nemadzụ ụgwo g'iphe, o meru gbaru. O je l'apfụ iya ụgwo pfụ-dzua ya ya apfụ-dzu.

⁵⁷ Mu e-me gẹ ndu-ishi iya; yẹe ndibe iya, maru iphe; yẹe ndu-ishi ojọgu iya; mẹ ndu-ishi mkpụkpu phẹ; mẹkpoo ndu ojọgu phẹ; ngụa mẹe g'ọ tsụ phẹ atsụtsu. Mgbẹnya atụko tụshi phẹ; ẹphe tee tetabaẹdu eteta jasụ l'ojejoje.” Nokwa iphe, oopfu; mbụ onye eze ono, bụ Chipfu; bya abụru Ọkalibe-Kakọta-Ike ono.

⁵⁸ Wakwa iphe, oopfu; mbụ Chipfu bụ Ọkalibe-Kakọta-Ike: “Igbidigbi igbulọ Bábilọnu ono bẹ ee-tsukpọshichaa etsukpọshi. L'a tụfu ọku l'ephekerephe ọnu-abata iya ono. Ndiphe eria aphụ see akanya kẹ mmanụ. Ọhamoha abụerupho ọku bẹ ẹphe e-jeru ozi jasụ ike abvụ phẹ.”

⁵⁹ Wakwa ozi, onye mpfuchiru Chileke, bụ Jieremaya ziru Seraya, bụ nwa Neraya bya abụru nwanwa Maseya; teke ono, o jeru Bábilọnu ono; ọ bụru ẹphe lẹ Zedekaya swị; mbụ eze ndu Jiuda teke ọ bụwaru eze apha ẹno. Seraya ono bụ onye-ishi, bụ iya achọtaje ẹka ndu ije a-kwajẹ.

⁶⁰ Jieremaya tụkoepho ẹjo-iphe, a-nwụru Bábilọnu dekọta l'ẹkwo; mbụ iphemiphe ono, e dekọtaru k'opfu ẹhu Bábilọnu ono.

⁶¹ Iphe, o pfuru Seraya bụ: “Teke i jerwuẹkwarupho Bábilọnu; gụkwaa iphemiphe-a g'a nụma-dzuru.

⁶² Iphe, ii-pfufua bụ: ‘Gụbe Chipfu; i pfuwaru sụ l'ii-mebyishi ẹka-a; k'ọphu bụ lẹ nemadzụ tee buẹdu iya ebubu; ọphu anụ a-nọedu iya; l'ọo-bụru ochobu ojejoje!’

⁶³ Teke ị gụchaerupho ẹkwo-a; l'iilibe iya mkpuma woru chie l'ime ẹnyimu Yufurétisu.

⁶⁴ Iphe ọzo, ii-pfufua ye iya bụ: ‘Noo gẹ Bábilọnu a-tsụ ọtsuri bụ ono; ọphu oo-sebaẹdu ọzo. Ọ bụru iphe, a-kpa iya nụ bụ ẹjo-iphe, mu abya eme g'ọ dapfu iya; ọphu ike adụbaedu ndibe iya.’ ” Noo ẹka opfu Jieremaya jeberu bụ onoya.