Jieremaya 50 - BAYỊBURU Izii

Ozi ẹhu ndu Bábilọnu

¹ Wakwa opfu, Chipfu pfuru; ọ gbẹ l'ẹka Jieremaya, bụ onye mpfuchiru pfua l'opfu ẹhu ndu Bábilọnu; yẹe alị phẹ.

² “Unu raa ya arara radzuru iya ọhamoha g'a nụma-dzuru! Unu palia ẹkwa-ọhubama raa ya g'a nụma-dzuru! Unu ba adụkwa iphe, unu a-ha l'azụ. Ọchia iphe, unu a-nọdu epfu bụ-a: ‘Ndu Bábilọnu bẹ a kpụkwaru lẹ ndzụ. Balụ bẹ e mekwarụ iphe-iphere. Tẹme Maruduku bẹ ndzụ-agụgu gudewaru. Ntẹkpe phẹ bẹ e mekwarụ iphe-iphere. Tẹme e mee; ndzụ-agụgu rwuta iphemiphe ono, a kpụru akpụkpu ono.’

³ Ọha, shi l'isheli gbẹshiru g'o tsoo phẹ ọgu. Oo-me alị phẹ g'ọ bụru ochobu. Ọphu ọ dụdu onye byaru ebubaaru eburu l'ime iya; nemadzụ mẹkpoo anụ a-tụko shi iya gbalaa.”

⁴ Wakwa iphe, Chipfu epfu baa: “O -rwua mbọku ono bẹ ndu Ízurẹlu yẹe ndu Jiuda a-tụgbabekwa gude ẹnya-mini je achọo Chipfu, bụ Chileke phẹ.

⁵ Ẹphe a-jị ajị ụzo, e shi eje úbvú Zayọnu woru iphu ghaa l'ụzo ibiya ono epfugbaa sụ: Unu bya; g'anyi lẹ Chipfu tụgba bụru nanụ l'ọgbandzu ojejoje, a ta abyadụ azọha azọha!

⁶ Ndibe mu bụ atụru, tuphahụru etuphahụ. Ọ bụru ndu eche phẹ nụ dusweru phẹ ụzo; bya emee phẹ; ẹphe tsoru ọma úbvú aghaphe. Ẹphe tsoru úbvú úbvú yẹle òbvù òbvù aghaphe; bya azọhaa ẹka ẹphe anọduje atụta unme.

⁷ Iphe, bụkpoo ndu hụmaru phẹ nụ vụru phẹ kpatakpata. Ndu ọhogu phẹ sụ: ‘Ikpe ta nmakwaru anyi; kẹle ẹphe mesweru Chipfu, bụ ọkpobe onye-nche phẹ; mbụ Chipfu, bụ onye nna phẹ oche kpọru obu yeru.’

⁸ Unu gbafụkwa lẹ Bábilọnu! Unu lụfukpoepho l'alị ndu Bábilọnu alụfu ophu! Unu dụepho gẹ mkpi, a chịshiru dobe l'iphu ikpoto eghu yẹe atụru!

⁹ Noo kẹle-a; lekwa-a; mu e-jekwa akpalia ikpoto ọha, parụ ẹka; gude byapfuta Bábilọnu ọgu. Ọ bụru ẹka mu e-me g'ẹphe shi bya bụ l'ụzo isheli. Ẹphe abya edokaa onwophẹ kwabẹru iya. Ọ bụru ẹka ono bẹ ẹphe e-shi bya alwụta iya. Ọnu-apfụ phẹ a-dụ gẹ kẹ ndu maru agba apfụ, bụ ọphu abụjeru: ọ -gụfu; ọ tọo gbadụru ẹka alwa.

¹⁰ Ọo ya bụ lẹ ndu Bábilọnu bẹ aa-kwa l'ọkwata. Ndu a-kwa iya ọkwata ọbu bẹ e-rijikpoo ẹpho.” Nokwa iphe, Chipfu eepfu bụ ono.

¹¹ A makwarụ-a l'unu ete ẹswa; ẹhu nọdu atsọ unu; mbụ unubẹ ndu ono, vụkaru okiphe mu ono. A makwarụ-a l'unu azọ kitimu kitimu gẹ nwada eswi, azọshi ereshi; tẹme unu nọdu egbu ọ́rà g'okee ịnya.

¹² Ọle iphere e-mechaa mee ne unu. Mbụ l'onye ono, tsụru ime unu ono bẹ ee-kpu iphu lẹ ntụ. Oo-mecha bụru iya bẹ ẹnya a-kacha alwalwa l'ọhamoha. Mbụ l'ọo-bụru echiẹgu; yẹe mgbẹgu alị-ọkponku; waa alị-evevee.

¹³ Eshinu ẹhu eghu mụbe Chipfu eghu bẹ e tee bubaẹdu iya ebubu. Ọchia l'aa-tọgbo iya l'ọo-bụru okorobo ochobu. Iphe, bụkpoo ndu ghataru alị ndu Bábilọnu ono bẹ ọo-nyị ishi ẹdzu; ẹphe egude iya gbaahaa mgbọnu. Ọ bụru iphe, a-kpa iya nụ bụ iphe ono, e mekagbaaru iya ono.

¹⁴ Unu dokaa onwunu l'ophere l'ophere nọ-phee ndu Bábilọnu mgburugburu; mbụ unubẹ ndu agbajẹ apfụ g'unu hakpọo! Unu gbajẹ phẹ iya! Unu ba adụkwa ọnu-apfụ unu ọphu unu a-gbaphodo mẹ nanụ; noo kẹle ọo Chipfu bẹ ẹphe meru iphe-ẹji!

¹⁵ Unu chi mkpu-ọgu kpu iya ẹka ẹbo ẹbo! Ike bvụwaru iya; mkpoli, ọ tụru k'ọgu ọbu dakọtawaru! E nwukpọshiwa igbulọ, nọ-pheru iya mgburugburu. Eshinu iphe-a bụ emelata bẹ Chipfu emelata; unu melata iya iphe, o shi emeje! Unu mee ya iphe, o shi emeje ndu ọzo!

¹⁶ Unu mee gẹ ndu akọ opfu chịhu lẹ Bábilọnu. Ndu egbuje ereshi; ẹphe l'iphe, ẹphe gude egbu ereshi l'ọkpa-ji achịhukwapho. Ndu ọhogu phẹ e-gude ogu-echi mee; onyenọnu aghaa iphu gbapfushia ndibe phẹ; mbụ l'onyemonye a-gbala lapfushia ndu alị iya.

¹⁷ “Ízurẹlu bụakwaa atụru, a chịkashiru achịkashi. Ọ bụru oduma chịkashiru iya. Kẹ mbụ, vụru iya kpatakpata bụ eze ndu Asiriya. Onye ikpazụ, tapyashịru ọkpu iya bụru Nebukadineza, bụ eze ndu Bábilọnu.”

¹⁸ Ọo ya bụ lẹ-a; wakwa iphe, oopfu; mbụ Chipfu, bụ Ọkalibe-Kakọta-Ike; bya abụru Chileke kẹ ndu Ízurẹlu: Ọ sụru-a: “Mu a-nụkwa eze ndu Bábilọnu aphụ; yẹe ndu alị iya l'ophu; ẹgube ono, mu nụru eze ndu Asiriya aphụ ono.

¹⁹ Obenu lẹ ndu Ízurẹlu bẹ mu e-duphuta azụ l'ẹka ẹphe shi buru. Ẹphe abyakwa anọdu l'úbvú Kamẹlu; yẹe alị Beshanu riaha nri ọzo. Ẹphe anọdu l'úbvú úbvú Ifuremu; yẹle alị Giladu riaha nri; rijiaha ẹpho.

²⁰ Wakwa iphe, Chipfu epfu baa: O -rwua mbọku ono; lẹ teke ono gẹdegede bẹ aa-vọkpoo g'a maru ẹka ikpe nmarụ Ízurẹlu; ọle ọ tọ dụdu ọphu aa-chọ-vu. L'avọo iphe-ẹji Jiuda nta vọo imo; ọ tọ dụdu iphe, aa-vọta. Noo kẹle nwa ndu ono, mu meru g'ẹphe phọdu ono bẹ mu a-gụru nvụ.”

²¹ Wakwa iphe, Chipfu epfu baa: “Unu tsoo ndu alị Meratayimu ọgu; yẹe ndu bu l'alị Pekodu! Unu chịa phẹ ọso; gbua phẹ egbugbu; mee phẹ g'ẹphe bvụeberu mu rengurengu! Unu mekọta iphemiphe, mu sụru g'unu mee!

²² Ẹphu-ọgu aphụakwa l'alị ono; mbụ ẹphu ọla-l'iswi, parụ ẹka apaa.

²³ Waa g'ọngu ndu mgboko l'ophu gbajishihuru tụkaa nanụnanu! Waa gẹ Bábilọnu byawaru bya abụru ochobu l'echilabọ ọhamoha!

²⁴ Mu gbabẹru ngu ọ́nyà gụbe Bábilọnu. Ị bya amaru; ị dalahụwa iya. A hụma ngu gude ngu; kẹle ọo Chipfu bẹ iitso opfu.

²⁵ Chipfu gụhaakwaru ụlo-ẹku iya ghebe ọnu; bya atụko ngwọgu k'oke ẹhu-eghu iya chịshia; kẹle Nnajịuphu, bụ Chipfu; bya abụru Ọkalibe-Kakọta-Ike; nwekwarụ iphe, ọobya ememe l'alị ndu Bábilọnu.

²⁶ Unu shikwa l'ẹkameka bya etsoo ya opfu! Unu gụhashia ọba-ẹku iya ghebechaa ọnu! Unu rwukọbe iya kụbe l'ikpo l'ikpo g'ẹka a kụberu ereshi. Unu mee ya g'ọ bvụeberu mu rengurengu g'ọ tọ dụkwa onye a-phọduru iya nụ!

²⁷ Unu tụko oke-eswi iya gbushichaa! G'a chịkotaru phẹ je l'ẹka ee-gbushi phẹ! Nshịo phẹ; kẹle eswe nke phẹ rwuakwaru; mbụ eswe mbọku, aa-nụ phẹ aphụ.

²⁸ Unu ngabẹkpodapho nchị nụma olu ndu agba ọso ọgu, bụ ndu shi l'alị ndu Bábilọnu nahụ agba ala Zayọnu eje epfu lẹ Chipfu, bụ Chileke anyi gwatawaru ụgwo iphe; mbụ ụgwo iphe, e meru eze-ụlo iya.

²⁹ Mee gẹ ndu ọgba-apfụ dzukọbe tsoo Bábilọnu opfu; mbụ iphe, bụkpoo ndu maru ese ụta kịkiki! Unu kpọbe ụlo-ẹkwa unu nọ-phee ya mgburugburu! G'ọ tọ dụkwa mẹ onye lanụ, a-nahụ nụ! Unu pfụa ya ụgwo iphe, o meru! Unu mee ya iphe, o meru ndu ọzo; kẹle ọo Chipfu bẹ o koru ọkpa l'ishi; mbụ Onye nsọ kẹ ndu Ízurẹlu.

³⁰ Ọo ya bụ lẹ-a; ụnwokorobya phẹ a-nọdu ada pọopoo l'ọma gbororo. Ndu Ojọgu phẹ l'ophu bẹ ee-megbushibẹbe mbọku ono. Nokwa iphe, Chipfu eepfu bụ ono.”

³¹ Wakwa iphe, Chipfu epfu baa: “Lekwa; mu bụakwaa ọgu dụru ngu; gụbe nwọphu eku onwongu; noo kẹle eswe nke ngu rwuwaru; mbụ teke aa-nụ ngu aphụ.

³² Onye eku onwiya bẹ ụpfu a-dụ l'ọkpa l'ọ daa. Ọphu ọ dụdu onye a-pali iya nụ. Mu e-ye ọku lẹ mkpụkpu lẹ mkpụkpu iya, bụ ọku, e-tsu tsua iphemiphe, nọ iya mgburugburu.”

³³ Wakwa iphe, oopfu; mbụ Chipfu, bụ Ọkalibe-Kakọta-Ike: “Ndu Ízurẹlu bẹ eemekwa ewere; nokwaphọ g'eeme ndu Jiuda. Ndu kpụru phẹ lẹ ndzụ gudeshia phẹ ike. Ọphu ẹphe ekwedu g'ẹphe laa.

³⁴ Obenu l'onye agbafụtaje phẹ nụ bẹ ike dụ. Iphe, ọoza bụ Chipfu, bụ Ọkalibe-Kakọta-Ike. Ọo-byakpọo ẹhuka ẹhuka bya phẹ agbaru ọdzori; k'ọphu oo-me g'a tụtaaha unme l'alị phẹ; mekwanaa gẹ ndu ọphu bu l'alị ndu Bábilọnu ta tụtajehe unme atụta.”

³⁵ Wakwa iphe, Chipfu epfu baa: “Ogu-echi a-bụru ọgu dụru ndu Bábilọnu! Mbụ l'ọo-bụru ọgu dụru ndu bu lẹ Bábilọnu; mẹ ndu-ishi iya; yẹe ndibe iya, bụ ndu maru iphe!

³⁶ Ogu-echi a-bụru ọgu dụru ndu mpfuchiru iya epfu iphe, mu epfuduru ono; k'ọphu ẹphe a-bụkotaru ndu eme eswe. Ogu-echi a-bụru ọgu dụru ndu ojọgu iya; k'ọphu ndzụ-agụgu e-rwuta phẹ ọkpobe erwuta.

³⁷ Ogu-echi a-bụru ọgu dụru ịnya iya; yẹe ụgbo-ịnya iya; yẹe iphe, bụkpoo ndu Ojọgu, byaru abyabya, nọ iya l'ime; k'ọphu g'ẹphe ha a-bụkotaerupho ụnwanyi. Mbụ-a; ogu-echi a-bụru ọgu dụru ụlo-ẹku iya; k'ọphu aa-kwakọta iphe iya l'ọkwata.

³⁸ Okpomọku a-byapfuta mini, dụ iya nụ; k'ọphu ọo-tụkoepho tashịhuchaa. Noo kẹle ọ bụ alị, aagwọ ọbvu. Ọbvu ono-a bẹ ndzụ-agụgu e-mechaa gbaghaa iphu.

³⁹ Ọo ya bụ l'iphe, e-mechaa buru l'ẹka ono a-bụru anụ-ẹgbudu yẹle achị-anmabu. Tẹme ọ bụkwarupho l'ẹka ono bẹ mgbashị-ujiku e-buru. Ọphu a byadu ebubaaru iya eburu. Mbụ l'e tee bubaẹdu iya; e -shi l'ọgbo sweru ọgbo.

⁴⁰ Wakwa iphe, Chipfu epfu baa: Ọ kwa ẹgube ono, Chileke mebyishiru Sọdomu yẹe Gọmóra; yẹe mkpụkpu, nọ-pheru iya mgburugburu ono bụ g'ọ tọ dụdu onye byaru eburu l'ime iya; ọphu ọ dụdu nwoke, byaru akwa iya unuphu buru.

⁴¹ Unu lenu! O nweru ndu Ojọgu, shi l'ụzo isheli abya. Mbụ l'ọo ọha, parụ ẹka apaa; bya abụru eze ndu dụ igwerigwe bẹ e jeru akpalia; ẹphe shi l'ẹka igwe beru alị beru eje abya.

⁴² Iphe, e gude kwaa phẹ ngwọgu bụru apfụ yẹe arwa. Ẹphe dụ njọ; tẹme ọphu ẹphe aphụduru nemadzụ obu-imemini. Ẹphe anọduje aphụ g'ẹnyimu, aphụ gbudugbudu l'ẹka ẹphe agba l'eli ịnya phẹ eje abya. Ẹphe dokaru onwophẹ gẹ ndu keru ọgu abyapfuta gụbe nwada Bábilọnu!

⁴³ Eze ndu Bábilọnu nụmawaru akọ phẹ; ẹka kụda iya. Ndzụ-agụgu gude iya; iphe meahaa ya ẹhuka gẹ nwanyị, ime eme.

⁴⁴ Lekwa-a! Ọ kwa g'oduma shi l'ọswa, nọ l'agụga ẹnyimu Jiọ́danu kwofuta; bya adapfu atụru, dọru l'ọdu atụru, nri dụ shii bụkwapho gẹ mu e-kwo gburumu je achịfu ndu Bábilọnu l'alị iya l'ọtulupfu. ?Bụ onye bẹ mu họtaru g'ọ bụru onye mu a-tụ ẹka g'o mee iphe ono? ?Bụ onye dụ gẹ mu dụ? ?Bụ onye sụru mu eku ikpe? ?Bụ onye bụ onye eche atụru, a-dụ ike pfụru gẹ mu l'iya mee?

⁴⁵ Ọo ya bụ lẹ-a; unu nụmakwa iphe, Chipfu chịru lẹ ya e-me Bábilọnu; mbụ iphe, ọ chịru lẹ ya e-me alị ndu Kaludiya. Ọ tọ dụdu iphe, a-kpọshi g'a ta kpụta ụnwu atụru iya mẹ ụnwu eghu iya kpụfu. Ndu ọphu phọduru nụ bẹ ndzụ e-rwuta.

⁴⁶ Teke aa-lwụta Bábilọnu bẹ ọo-da too; k'ọphu ọo-nmayichaa mgboko anmayi. Ọhamoha anụma-dzuchaaru olu-ẹkwa phẹ.”