Jieremaya 48 - BAYỊBURU Izii

Ozi ẹhu ndu Mówabu

¹ A -bya l'opfu ẹhu ndu Mówabu; wakwa iphe, oopfu; mbụ Chipfu, bụ Ọkalibe-Kakọta-Ike; mbụ Chileke ndu Ízurẹlu: “Nshịo Nebo; kẹle e meru iya; ọ bụru ochobu. Ndu Kiriyatayimu bẹ e meru iphe-iphere; bya akpụa phẹ lẹ ndzụ. Ụlo phẹ, bụ ẹka a kpụshiru ike bẹ e meru iphe-iphere tụkaa ya nanụnanu.

² A taa jaẹdu ndu Mówabu ajaja. Ọ bụru lẹ mkpụkpu Hẹshibonu bẹ a chịru phẹ ẹjo idzu sụ: ‘Unu bya g'anyi mee g'ọha ono chịhu!’ Unubẹdua kwaphọ; unubẹ ndu mkpụkpu Madumenu bẹ ee-mechakwaa laa l'iswi. Ogu-echi e-mechakwaa chịa unu ẹjo ọso.

³ Unu ngabẹkpodapho nchị nụma mkpu, eechi lẹ mkpụkpu Horonayimu; mkpu alị arwụhu yẹe oke ọla-l'iswi.

⁴ Ndu Mówabu bẹ e mebyishiwaru. Ụnwegirima iya chishiru mkpu ike.

⁵ Ẹphe enyi obvu awụ eje l'ụzo mkpụkpu Luhiti; akwa ntụmatu eje atụgbu. Mbụ l'ụzo ọkpa-úbvú mkpụkpu Horonayimu bẹ a nụmaru mkpu ẹkwa, eechi ekpu iphemiphe ono, larụ l'iswi ono.

⁶ Unu gbalaa! Unu gbaa ọso ndzụ unu! Unu je ebvuru g'irwu, bvuru l'echiẹgu!

⁷ Eshinu unu kpọru obu ye l'iphe, unu adụje ike mee; yẹe ẹku unu bẹ aa-kpụfukwaa unubẹdua lẹ ndzụ. Tẹme agwa unu, bụ Kemọshi bẹ aa-kpụkwapho lẹ ndzụ; yẹle ndu-uke, agwajẹ iya nụ; mẹ ndu-ishi iya.

⁸ Ee-mebyishi mkpụkpu lẹ mkpụkpu. Ọphu ọ dụdu mkpụkpu, byaru anahụ nụ mẹ nanụ. Nsụda nsụda bẹ a-bụru mkpurupyata. L'e mebyishia ẹka dụ baswa; kẹle ọo ẹgube ono bẹ Chipfu pfuru iya.

⁹ Chibe ndu Mówabu ǹkù; kẹle oo-mecha phelihu phefu. Mkpụkpu lẹ mkpụkpu phẹ a-bụkotachaaru ochobu. Ọ tọ dụdu m'onye lanụ eburu iya nụ.

¹⁰ Onye a tụru ọnu bẹ ọ bụ; mbụ onye gude ẹregede ejeru Chipfu ozi! A tụkwaru onye ono ọnu, bụ onye te egudedu ogu-echi iya egbu ọchi!

¹¹ Eshi teke ọ bụ nwata bẹ ndu Mówabu nọkpoepho tụsaru ẹhu g'ọhu-mẹe, dọru l'ite. Ọphu a wụ-phedu iya awụ-phe l'ite; kẹle e teke akpụ-swee ndu Mówabu lẹ ndzụ lashịa alị ọzo. Noo g'o gude ọ nọdu atsọepho g'ọotso. Ọphu ooshibuhudu mkpọ eshibuhu.

¹² Wakwa iphe, Chipfu epfu baa: O nwenụru-a mbọku, abya nụ, bụ mbọku, mu e-ye ndu awụ-phe mẹe l'ite. Ẹphe awụfuta iya l'ite ono, ọ dọru ono. Ẹphe awụfuta iya l'ite ọbu; woru ite ono, o shi dụ ono tsukpọshia.

¹³ Noo teke iphere Kemọshi e-gude ndu Mówabu; ẹgube ono, iphere Bẹtelu guderu ndu Ízurẹlu, bụ iphe, ẹphe shi dakobe ono.

¹⁴ ?Dẹnu g'unu e-shi sụ l'ọkpehu dụ unu; l'unu bụ ndu dụ ike l'ọgu?

¹⁵ Ndu e-mebyishi Mówabu; yẹe mkpụkpu, nọgbaa ya nụ bẹ nọwaa anọno. Unwoke phẹ, kachaa agba mkparawa bẹ ee-gbukọta egbugbu. Nokwa iphe, oopfu; mbụ Eze ono, ẹpha iya bụ Chipfu; bya abụru Ọkalibe-Kakọta-Ike.

¹⁶ Teke ndu Mówabu a-la l'iswi dụkwaa tsọkere. Eze iphe-ẹhuka a-dapfukwa phẹ ẹgwegwa.

¹⁷ Unu jekwa akpọru phẹ iphu; unubẹ ndu unu l'ẹphe bukubegbaa! Mbụ unubẹ ndu maru ẹpha phẹ. Unu sụ phẹ-a: ‘?Dẹnu g'ọ nwụru a gbajiru mgbọro-eze, shihuru ike; tẹme ọ bụru mgbọro, ama ntụmatu-a?’

¹⁸ Unubẹ ndu bu lẹ mkpụkpu Dibọnu; unu shinụ lẹ biribiri unu nyizeta bya anọdu l'alị, dụ jakpọro jakpọro; kẹle onye emebyi ndu Mówabu byapfutaru unu bya egwepyaa mkpụkpu lẹ mkpụkpu unu ono, a kpụshiru ike ono.

¹⁹ Unu pfụkpodarupho l'agụga gbororo gee ngge; unubẹ ndu mkpụkpu Arowa! Unu jịa unwoke, agba ọso; yẹe ụnwanyi, nahụru nụ! Unu jịa phẹ sụ phẹ: ‘?Bụ gụnu meru?’

²⁰ Ndu Mówabu bẹ e meakwaru iphe-iphere kpua; kẹle ẹphe dakashịhuwaru. Unu rwua erwubvu; chishia mkpu ike! Raa ya arara lẹ nggele Anọnu lẹ Mówabu bẹ e mebyishiwaru!

²¹ Ndu bu lẹ mbarabata bẹ ikpe dapfuakwaru; mbụ ndu Holọnu; yẹe ndu Jiahazu; waa ndu Mefahatu;

²² dapfu ndu Dibọnu; yẹe ndu Nebo; mẹkpoo ndu Bẹtu-Dibulatayimu;

²³ dapfu ndu Kiriyatayimu; yẹe ndu Bẹtu-Gamulu; yẹe ndu Bẹtu-Meyọnu;

²⁴ dapfu ndu Keriyotu; yẹe ndu Bọzura; dapfukọta mkpụkpu lẹ mkpụkpu ndu Mówabu l'ophu; ndu ọphu bu ẹnya mẹ ndu ọphu bu ntse.

²⁵ Mpu ndu Mówabu bẹ e chikwashịakwaru. Tẹme e chikwoshiwa iya ẹka.” Nokwa iphe, Chipfu eepfu bụ ono.

²⁶ “Unu chegharu iya mẹe ẹka; kẹle ọo Chipfu bẹ o koru ọkpa l'ishi. Gẹ ndu Mówabu watanụ ebvuka ẹgbo, ẹphe gbọru; g'ẹphe abụru iphe, ee-gude agba mgbọnu.

²⁷ ?Tọbudu ndu Ízurẹlu bẹ unu shi egudeje agba mgbọnu? ?Bụ ẹphe lẹ ndu-oshi shi nọdu teke ono tọo; mekwanụru g'o gude unu shi atụje ụka l'ishi ekweru iya une mẹ unu -nọdu epfu opfu ẹhu iya?

²⁸ Unu gwọbechaa mkpụkpu unu je eburu l'agbara-mkpuma; unubẹ ndu Mówabu! Unu dụepho gẹ kparaka, bụ l'ọnu ọgba bẹ ọokpaje ẹpfune iya!

²⁹ Anyi nụmakwaru gẹ Mówabu gude ekube onwiya. Mbụ l'o kunukaru onwiya; tẹme ọ nọdu etsenụka etsetse. Mbụ l'eku-onwonye ọbu mẹkpoo etsetse iya ọbu; mẹkpoo mkpọfu-ọkpoma iya ọbu bẹ parụ ẹka.”

³⁰ Wakwa iphe, Chipfu epfu baa: “Mu makwarụ oke ẹhu-eghu iya; ọle ọ bụkwanu kẹ mmanụ. Tẹme ekuku, ooku onwiya bụkwarupho iphe-mmanụ.

³¹ Noo g'o gude mu nọdu erwu erwubvu l'opfu ẹhu ndu Mówabu. Mbụ l'ọo ndu Mówabu l'ophu l'ophu bẹ mu echi mkpu iya. Ọ bụru ndu mkpụkpu Kiru-Harẹsetu bẹ mu agụ aphụ phẹ.

³² Mu kakwa ara ẹkwa gụbe opfu-vayịnu kẹ mkpụkpu Sibuma eme lẹ kẹ Jiaza. Ị jaru àjàjà jarwuchaa k'ọphu ẹkali ngu rwuchaaru eze-ẹnyimu; jerwuchaa eze-ẹnyimu, nọ-kube mkpụkpu Jiaza. Ọle e mebyishiwaru iphe, bụkpoo akpụru ngu.

³³ E wofuwarụ ẹhu-ụtso yẹe eme ẹmereme l'ẹgu oshi-ọmi ndu Mówabu yẹle alị phẹ. Mẹe bẹ mu mewaru g'a ba kụtajehe l'ẹka aakụje mẹe. Ọphu ọ dụedu onye anọdujekwadu akwa ẹvu mẹ a -nọdu akụ iya. A makwarụ-a l'aanọduje anụ olu l'ẹka ono; ọle ọ tọ bụedu olu onye akwa ẹvu.

³⁴ Mkpu, ẹphe echi ngakọtaakwaru. E shi lẹ Hẹshibonu chikọta mkpu ọbu; je akpaa lẹ Eleyale; mẹkpoo lẹ Jiahazu. E shi lẹ Zowa chia ya jasụ lẹ Horonayimu; waa Ẹgulatu-Shelishiya; noo kẹle mini tashihụchaaru je akpaa lẹ kẹ Nimurimu.

³⁵ L'alị ndu Mówabu bẹ mu e-me g'a gwabuhu iphe l'ẹnya ẹka aagwajẹ iphe; mee g'a ta akpọjehe ụ̀nwù-isẹnsu ọku nụ agwa phẹ.” Nokwa iphe, Chipfu eepfu bụ ono.

³⁶ “Ọo ya bụ l'obu mu aphụ swooswooswoo agụ aphụ ndu Mówabu g'onye aphụ ototo; ọ nọdu agụ aphụ ndu Kiru-Harẹsetu g'onye aphụ ototo; kẹle urwu, ẹphe ritaru bvụwaru.

³⁷ Onyemonye kpụshiwaru ishi. Onyemonye kpụshia ẹ́jí-agba. Ọ́nyá-mma dụkota onyemonye l'ẹka. Onyemonye gbaphukọta uwe-aphụ l'upfu.

³⁸ Mbụ l'iphe, ada l'ọma ụlo-eli, nọgbaa l'alị ndu Mówabu; mẹ l'edupfu l'edupfu l'ophu ta adụkwa iphe ọzo, gbahaa ụzu-ẹkwa; noo kẹle mu tsukpọshiwaru ndu Mówabu g'ite, adụdu onye ọ dụ ree.” Nokwa iphe, Chipfu eepfu bụ ono.

³⁹ “Waa g'a tụkashiru phẹ nanụnanu! Waa g'ẹphe atụ ụzu-ẹkwa wọowoowoo! Waa gẹ ndu Mówabu gude iphere ghaa azụ! Ndu Mówabu bụakwaa iphe, e gude agba mgbọnu. Mbụ l'iphe, bụkpoo ndu nọ phẹ ntse bẹ ọonyi ishi ẹdzu.”

⁴⁰ Wakwa iphe, Chipfu epfu baa: “Lenu! Ugo ephekwa raa ephezeta l'alị. O woru ǹkù iya jashịa l'eli alị ndu Mówabu.

⁴¹ Mkpụkpu, nọgbaa ya nụ bẹ aa-lwụtachaa. L'a natachaa phẹ ụlo, ẹphe edomije onwophẹ. Lẹ mbọku ono bẹ obu ndu Ojọgu ndu Mówabu a-dụepho g'obu nwanyị, ime eme.

⁴² Ndu Mówabu l'ophu bẹ ee-mebyishi kẹle ẹphe koru Chipfu ọkpa l'ishi.

⁴³ N-yemebvu; yẹe iduma iduma; yẹe ọ̀nyà nọgbakwa echeru unu echeru; unubẹ ndu Mówabu!” Nokwa iphe, Chipfu eepfu bụ ono.

⁴⁴ “Onye nahụru n-yemebvu; l'ọodaba l'iduma. Onye nyifutaru l'iduma; ọ́nyà a-nmata iya. Noo kẹle ọo iphe ono bẹ mu e-gude byapfuta Mówabu l'apha, aa-nọdu anụ iya aphụ.” Nokwa iphe, Chipfu eepfu bụ ono.

⁴⁵ “Lẹ mgboru mkpụkpu Hẹshibonu bẹ ndu agba ọso ọgu pfụru nyẹgenyege. Noo kẹle ọku kpụfuru lẹ Hẹshibonu. Mbụ l'onwu phuruphuru ọku etsu l'ime mkpụkpu Sihọnu. Ọ bụerupho l'echi ishi bẹ otsu ndu Mówabu. Mbụ ọkpu-ishi ndu ono, shi anọduje aba hanyịhanyi ono.

⁴⁶ Nshịo unubẹ ndu Mówabu! Ndu Kemọshi bẹ e mebyishiakwaru. Ụnwu unu nwoke bẹ a kpụakwaru lẹ ndzụ laa alị ọzo. Tẹme ụnwada unu phẹ bụru ndu a lwụtaru l'ọgu laa alị ọzo.

⁴⁷ Ọle mu e-mechakwaa dophu ndu Mówabu azụ l'ọnodu phẹ lẹ mbọku, dụ l'iphu.” Nokwa iphe, Chipfu eepfu bụ ono. Nokwa g'ikpe, e kperu ndu Mówabu jeberu bụ onoya.