Jieremaya 46 - BAYỊBURU Izii

Ozi ẹhu ndu Ijiputu

¹ Ọwaa bụ Opfu Chipfu, bụ ọphu rwuru onye mpfuchiru Chileke, bụ Jieremaya nchị, bụ opfu ẹhu ọhamoha.

² Opfu ẹhu ndu Ijiputu: Ndu eezi ozi ọwa-a bụ ndu ojọgu Fero Neko, bụ eze ndu Ijiputu, bụ onye e mekperu lẹ mgboru mkpụkpu Kakemishi, nọ l'agụga ẹnyimu Yufurétisu. Ọ bụru onye mekperu phẹ nụ bụ Nebukadineza, bụ eze ndu Bábilọnu; l'apha, kwe Jiehoyakimu nwa Jiosáya apha ẹno, ọ bahụru l'aba-eze ndu Jiuda.

³ Unu dozikwaa iphe, unu egudeje ezeru ọgu; unu dozia ndu ọphu ha ọsa mẹ ndu ọphu ha nwanshịi; unu ezefuta jeshia ọgu!

⁴ Unu kwakọbe ịnya unu k'ọgu! Unu awụ-koru ịnya-ọgu unu l'eli; unubẹ ndu agba l'ịnya! G'onyenọnu pfụkwaaru l'ẹka rwuberu iya nụ! Unu ekpuchaaru okpu-igwe! Unu rwachaa arwa unu arwacha! Unu atụko uwe-ọgu unu l'ophu yee onwunu!

⁵ ?Bụ gụnu bẹ mu hụmaru? Ndzụ agụwaa phẹ. Ẹphe agbawaa ọso. Ndu ojọgu phẹ bẹ e mekpewaru. Ẹphe ye ọkpa l'ọso gbala l'ẹbe agha ẹnya l'azụ; kẹle nggiri dụ l'ụzo l'ẹkameka. Nokwa iphe, Chipfu eepfu bụ ono.

⁶ Ndu ọkpa ẹgwa ta agbakwa ọso. Ọphu onye dụ ike l'ọgu agbalakwa. Ọ kwa l'ụzo isheli; l'ụzo ẹnyimu Yufurétisu bẹ ẹphe vukotaru iphe daa.

⁷ ?Bụ ndu ole baa, l'abya kụlakula g'ẹnyimu Nayịlu; gẹ nggele, dụ igwerigwe, asọgba gborogboro?

⁸ Ọ kwa ndu Ijiputu abya kụlakula g'ẹnyimu Nayịlu ono; gẹ nggele, dụ igwerigwe, asọgba gborogboro. Ẹphe epfu sụ l'ẹphe e-tsulihu tụko mgboko l'ophu sọpyabe. L'ẹphe e-mebyishi mkpụkpu lẹ mkpụkpu; yẹle ndu bu iya nụ.

⁹ Unubẹ ịnya; unu watakwa eje l'iphu l'iphu! Unubẹ ndu agba l'ụgbo-ịnya; unu tangịrihukwa g'e je! Gẹ ndu dụ ike l'ọgu gbẹshikwa g'e je; mbụ unubẹ ndu Kushi; yẹe ndu Putu, bụ ndu chịgbaa iphe, eegudeje ezeru ọgu; mẹ unubẹ ndu Lidiya, bụ ndu agbajẹ apfụ!

¹⁰ Obenu l'eswe mbọku ono bụ Nnajịuphu nwe iya; mbụ Chipfu, bụ Ọkalibe-Kakọta-Ike. Ọ kwa eswe agwata ụgwo iphe; mbụ mbọku, ọo-gwata ndu achị iya lẹ njọ ụgwo iphe. Ọo ogu-echi a-sụ nemadzụ pyaapyaa jasụ l'ooji iya ẹpho; jasụ teke ọo-ngu mee ngu-jia ẹpho; kẹle ọo Nnajịuphu; mbụ Chipfu, bụ Ọkalibe-Kakọta-Ike agwa iphe l'alị ndu isheli; l'agụga ẹnyimu Yufurétisu.

¹¹ “Tụgbua je l'alị ndu Giladu je emeta ọbvu etete; gụbe nwamgbọko, yẹe nwoke akwajẹduru, bụ Ijiputu! Obenu l'igwerigwe ọbvu ono, iimegbaa ono bụkwa kẹ mmanụ. I tii wekọrohukwa.

¹² Ọhamoha nụmawaru iphere ono, e meru kpua ngu ono. Ẹkwa unu tụkowa mgboko l'ophu ngaa. Ndu dụ ike l'ọgu tụko dapyabẹgbaa ibe phẹ. Ẹphe tụko daa ndatẹwo.”

¹³ Wakwa ozi, Chipfu ziru onye mpfuchiru iya, bụ Jieremaya lẹ k'ẹhu Nebukadineza eze ndu Bábilọnu, abya etso ndu Ijiputu ọgu.

¹⁴ Raa iphe-a arara l'alị ndu Ijiputu! L'i chia ya lẹ mkpu lẹ mkpụkpu Mịgudolu! Chikwaa ya phọ lẹ mkpu lẹ mkpụkpu Nọfu; yẹle Tahụpanahesu: Onyenọnu pfụkwaru l'ẹka rwuberu iya nụ kwakọbe; kẹle ogu-echi byawaru egbushi ndu nọ-kube ngu nụ.

¹⁵ ?Bụ gụnu bẹ agwa ngu, bụ Apisu agbahụnuru? ?Bụ gụnu bẹ obobo-ẹna ngu ọbu adụedunu ike pfụru? Iphe, kparụ iya nụ bụ lẹ Chipfu nwutsuwaru iya.

¹⁶ Ụpfu dụru phẹ ndụpyabe; ẹphe dagbaa dapyabẹ nwibe phẹ; ẹphe sụ: Unu gbẹshi g'anyi laphu azụ lapfu ndu alị anyi yẹe ndibe anyi! G'anyi gbalaaru ogu-echi ndu eme anyi mkpawere!

¹⁷ Unu gụbe Fero, bụ eze ndu Ijiputu ẹpha ọzo. Unu kuje iya: O-pfu-epfu-emegeme.

¹⁸ Wakwa iphe, Eze ono epfu baa; mbụ onye ẹpha iya bụ Chipfu, bụ Ọkalibe-Kakọta-Ike: Eshinu mu nọ ndzụ gẹ mu nọ iya-a bẹ o nweru onye a-bya nụ. Onye ono a-dụ g'úbvú Tabọ l'ẹka úbvú dọru. Mbụ l'ọo-dụ g'úbvú Kamẹlu, nọ l'agụga eze-ẹnyimu.

¹⁹ Kwakọkwa iphemiphe, ii-gude laa alị ọzo; unubẹ ndu bu l'alị ndu Ijiputu! Noo kẹle mkpụkpu Nọfu bẹ e-mechakwaa bụru ochobu; l'eemebyishia ya; ọ tọ dụdu onye eburu iya eburu.

²⁰ “Ijiputu bụ nwada eswi, ama ntụmatu. Obenu l'ijiji-ọnyieka eshije l'ụzo isheli eje abyapfuta iya tekenteke.

²¹ Ndu ẹphe butaru g'ẹphe bya alwụaru phẹ ọgu bẹ dọru l'echilabọ phẹ g'oke-eswi, daru rẹpfurepfu nọdu. Ẹphebedua tụkowaru dakọbe gbala; ọphu ẹphe adụdu ike pfụru. Noo kẹle eswe mbọku ọla-l'iswi dapfutawaru phẹ; mbụ teke aanụ phẹ aphụ.

²² Ndu Ijiputu atsụ kpụruru g'agwọ, awụ awụwu awụfu; noo kẹle ndu ọhogu phẹ abyapfuta phẹ ẹhuka ẹhuka; bya egude ogbunkụ etso phẹ ọgu gẹ ndu egbutsushi oshi.

²³ Ọswa phẹ l'ophu bẹ ẹphe a-sụpyashichaa asụpyashi; g'ọ dụhabe ẹpfukala. Nokwa iphe, Chipfu eepfu. Ẹphe ka igube adụ igwerigwe; k'ọphu bụ l'a taa gụtadu phẹ l'ọgu.

²⁴ Nwada Ijiputu bẹ e mewaru iphe-iphere. Mbụ l'e woru iya ye l'ẹka ndu isheli.”

²⁵ Chipfu, bụ Ọkalibe-Kakọta-Ike, bụ Chileke kẹ ndu Ízurẹlu sụru-a: “Lekwa; mu abyakwa phẹ anụ aphụ; mbụ Amọnu, bụ agwa ndu mkpụkpu Tebẹsu; yẹe Fero; yẹe ndu Ijiputu; ẹphe l'agwa phẹ; mẹkpoo ndu eze phẹ; yẹe iphe, bụkpoo ndu kpọru obu yeru Fero.

²⁶ Mu e-woru phẹ ye l'ẹka ndu achọ ndzụ phẹ; mbụ l'ẹka Nebukadineza, bụ eze ndu Bábilọnu; ẹphe lẹ ndu-ozi iya phẹ. Ọle ọ bụ; e -mechaa bẹ ee-bukwaru-a lẹ Ijiputu ọzo g'e shi buhawaru iya.” Nokwa iphe, Chipfu eepfu bụ ono.

²⁷ “Ta atsụkwa ebvu; gụbe Jiékọpu, bụ onye-ozi mu! Ọphu ị nmakwa pyaapyaapyaa; gụbe Ízurẹlu! Lekwa; mu a-dzọta ngu l'alị, dụ ẹnya; dzọta awa ngu phẹ l'alị ẹka a kpụru phẹ lẹ ndzụ laa. Jiékọpu e-mechakwaa lwa bya eburu lẹ nchị-odoo tụsaru ẹhu. Ọphu ọ dụdu onye byaru eyebaa ya ebvu.

²⁸ Ta tsụkwa ebvu; gụbe Jiékọpu, bụ onye-ozi mu; kẹle mu nọkwa swiru ngu. Ọ kwa Chipfu epfu iya. Kẹle mu e-mebyishicha ọhamoha ono, mu chịru unu tụkaa l'echilabọ phẹ ono. Ọphu mu emebyishidu unubẹdua. Ọo ahụ̀hù bẹ mu a-hụ̀ unu hụ̀ta iya unu l'ahụma. Ọphu mu ahakwanụ unu phuruphuru gẹ mu te echi unu ẹchachi.”