Jieremaya 4 - BAYỊBURU Izii

Oku izimanụ alwa azụ

¹ Wakwa iphe, Chipfu epfu baa: “Ọ -bụru l'ịi-lwa; gụbe Ízurẹlu; g'ị lwapfutanụ mu! Ọ -bụru l'ịi-tso agwa ono, bụ mu ẹbyi ono ọgu gẹ mu ta ahụmajehe iya; ọphu ị kpa-phuhuẹduru akpaphuhu;

² tẹme ọ -bụru l'ịi-nọduje egude ire-lanụ; waa ikpe, pfụru ọto; waa apfụbekoto ribua angụ sụ: ‘Eshinu Chipfu nọ ndzụ g'ọ nọ iya-a’ bẹ Chileke e-gude iswi ẹhu iya kebe ọhamoha l'ọma; tẹme ọhamoha ono egude iswi ẹhu iya riaha ùbvù.”

³ Sụ-a; wakwa iphe, Chipfu epfu anụ ndu Jiuda waa ndu Jierúsalẹmu: “Unu kọpyashinaa ẹka a kọduru akọko! Unu ta akụshinu iphe l'ẹgbudu!

⁴ Unu bunaa onwunu úbvù; buaru iya Chipfu! Unu bunaa onwunu úbvù ime-obu; unubẹ ndu Jiuda yẹe ndu Jierúsalẹmu. Ọdumeka bẹ oke ẹhu-eghu yẹbe Chileke a-gbanwuhukwa tsuaha g'ọku. Ọ bụru iphe, a-kpa iya nụ bụ ẹjo-ememe, unu mewaru. Ọ -wata etsutsu; ta adụkwa onye a-gbanyị iya nụ.”

Ọla-l'iswi, e-shi l'isheli

⁵ “Unu raa ya arara l'alị ndu Jiuda! Unu echia ya lẹ mkpu lẹ Jierúsalẹmu sụ: ‘Unu gbua opu-ọgu tsoru alị ndu Ízurẹlu l'ophu!’ Unu rashịa ọ́rà ike sụ: ‘Unu dzukọbe l'ẹka lanụ! G'anyi gbala laa mkpụkpu, a kpụ-pheru igbulọ mgburugburu!’

⁶ Unu palia ẹkwa-ọhubama g'e jeshia úbvú Zayọnu! Unu gbalaa je anọdu ndzụ! Be ejekpọkwa anmarwụbe; kẹle mu shikwa l'ụzo isheli gude ọla-l'iswi abya; mbụ mgbu-ọnwu, a-dụ ẹjo ẹji.”

⁷ Oduma shiakwa l'ẹpfukala iya wafụta. Ọla-iphe-l'iswi k'ọha l'ophu bẹ gbalihuakwaru nụ. O shiakwa l'ẹka ọ nọ tụgbua eje g'o mee alị unu ono g'ọ bụru ochobu. Mkpụkpu unu a-tụko bụchaaru ikpọzu; ọphu ọ dụdu onye bya l'ebubaru l'ime iya.

⁸ Ọo ya bụ lẹ-a; unu yee uwe-aphụ; raa ẹkwa; chia mkpu-ẹkwa; kẹle o-re-phuruphuru, bụ ẹhu-eghu Chipfu teke alaphukwa azụ l'ẹhu anyi.

⁹ Chipfu sụru-a: “O -rwua mbọku ono bẹ meji a-tọfukwa ndu eze ẹphe lẹ ndu-ishi. Ndzụ-agụgu egude ndu-uke Chileke; ndu mpfuchiru Chileke agbachihuchaa nchi.”

¹⁰ Ọ bụru iya bụ; mu sụ: “Haa; gụbe Nnajịuphu, bụ Chipfu; ndu-a ẹphe lẹ ndu Jierúsalẹmu bẹ i dusweakwaru ụzo rengurengu kpọ; kẹle ị sụru phẹ lẹ nchị a-dụkpokwaa phẹ doo. Ọle ogu-echi bẹ a dabẹkwanuru anyi l'ẹkpiri!”

¹¹ O -rwua teke ono bẹ aa-karụ ndu-a ẹphe lẹ ndu Jierúsalẹmu sụ phẹ-a: “Ẹjo phẹrephere, erebushi anụ l'ẹhu, e-shi lẹ nggeregede, nọ l'echiẹgu ono; l'e-zi zipfuta ndibe mu; ọphu ọ bụkwa g'ọ phụchaa phẹ aphụcha ọzoo g'o mechaa phẹ emecha.

¹² Phẹrephere ọphu a-ka ono njọ, bẹ l'e-shikwaphọ mụbe Chipfu l'ẹka. Nta-a bụ gẹ mu bya anmaa phẹ ikpe.”

¹³ Lenu! Ọhogu ọbu l'asọkwa pulapula g'urwukpu abya. Ụgbo-ịnya phẹ nọdu ezi phaaphaaphaa g'oke-phẹrephere abya. Ịnya phẹ kakwa ugo eme ẹgwa. Nshịo anyi! Anyi laakwaru l'iswi!

¹⁴ Gụbe Jierúsalẹmu; sashịnaa ẹjo-ememe, nọ ngu l'obu hụma l'aa-dzọta ngu! ?Bụ jasụ teke ole bẹ ịi-ha g'ẹjo ọriri kwaa ngu l'obu?

¹⁵ Ọ dụru onye-ozi, shi lẹ mkpụkpu Danu ara iya arara epfu l'ẹjo-iphe byapfutaru alị úbvú úbvú Ifuremu.

¹⁶ “Woru iphe-a pfuaru ọhamoha! Raarụ iya ndu Jierúsalẹmu arara; sụ phẹ lẹ ndu ọhogu phẹ shikwa l'alị ẹka dụ ẹnya abya. Ẹphe nọdu echi mkpu-ọgu ekpu mkpụkpu lẹ mkpụkpu, nọgbaa l'alị Jiuda.

¹⁷ Ẹphe nọ-phee ya mgburugburu gẹ ndu eche nche l'ẹgu; opfu l'o kwefuru mu ike. Nokwa iphe, Chipfu eepfu.

¹⁸ “Ọ kwa umere ngu; yẹe iphe, i gude ẹka ngu meta bẹ lọtaru iphe-a kobe ngu. Ọwaa bụkwa iphe, bẹ eechi ngu. Oomeshikwa ẹhuka ike; tẹme ọ nọdu alọ ẹka lẹ meji!”

Jieremaya agụ aphụ ndibe iya

¹⁹ Ẹpho mu-o! Ẹpho mu-o! Ọolokwa mu ẹka lẹ meji. Meji edekwa mu kukuku l'ime mu. Mu ta adụkwa ike edobe ọnu doo; kẹle mu nụmawaru opu-ọgu. Mu nụmawaru mkpu, eechi l'iphu ọgu.

²⁰ Ọla-l'iswi tsopyabẹ ọla-l'iswi. Alị ono l'ophu bụakwaa ikpọzu. Ibe mu g'ọ ha bẹ a tụkoerupho mebyia lẹ buregedegengu; tụko ụlo mu mebyishia lẹ ntabu-ẹnya lanụ.

²¹ ?Bụ jasụ teke ole bẹ mu a-nọdu ele ọgu ẹnya l'oophukọ; mu anụkwapho ẹka eegbu opu-ọgu?

²² “Ndibe mu bụkwa ndu eswe; kẹle ẹphe ta amadụ onye mu bụ. Ẹphe bụ ụnwegirima, enwedu egomunggo. Tẹme ọphu iphe edojedu phẹ ẹnya. Iphe, ẹphe maru ẹnya iya bụ eme ẹjo-ememe; ọphu ẹphe amadụ eme iphe, dụ ree.”

²³ Mu bya elee ẹnya l'eliphe mgburugburu; ọphu o nwedu ụgbugba; tẹme ọphu ọ dụdu iphe, dụ iya nụ. Mu bya elee l'imigwe; ọphu ọ dụedu ìphóró, dụ iya nụ.

²⁴ Mu bya elee ẹnya l'eli úbvú úbvú; ẹphe tụko anmagbaa jiijiijii; obvu obvu nọdu angagbaa anganga.

²⁵ Mu bya elee ẹnya; ọphu ọ dụedu nemadzụ, mu hụmaru. Iphe, bụkpoo ẹnu, ephe l'eli tụkowaa phehuchaa.

²⁶ Mu bya ejeshia ele ẹnya; alị, e shi emehujẹ iphe a kọru iya; bụwaru mgbẹgu-evevee. Iphe, bụ mkpụkpu, nọkota iya nụ g'ọ ha bụkotawaru ikpọzu l'iphu Chipfu; mbụ l'iphu o-re-phuruphuru, bụ ẹhu-eghu iya onoya.

²⁷ Wakwa iphe, Chipfu epfu baa: “Alị ono l'ophu a-bụkwaru ikpọzu; ọle mu tee mebyishibebedu iya rọ l'ophu.

²⁸ Ọo ya bụ l'eliphe a-gụ aphụ. Imigwe, nọ l'ephekerephe agbahụ ọchii; kẹle mu pfuakwaru iphe, mu pfuru; ọphu mu alakwa azụ azụ. Mu pfuakwaru g'ọo-dụ; ọphu mu a-ghakwa ẹnya l'azụ.”

²⁹ Ndu mkpụkpu ono l'ophu -nụmaepho igiji ndu chị ịnya abya ọgu; yẹe ndu chị apfụ abya ọgu; ẹphe agbalaa je edomigbaa onwophẹ l'ẹgbudu; ndu awụba l'ọgba, dụ l'úbvú je edomishia onwophẹ. Ẹphe atụko mkpụkpu phẹ g'ọ ha gbadogbua gbalaa. Ọ tọ dụedu ọphu nemadzụ eburu.

³⁰ ?Bụkwanu gụnu bẹ iime gụbe ochobu onoya? ?Dẹnu g'o gude i yee uwe, eke meemee; tẹme i yee ịyagba, e meru lẹ mkpọla-ododo? ?Dẹnu g'o gude i gude iphe techishia ẹnya? Akwa, ị kwarụ onwongu bụkwa kẹ mmanụ. Ndu gụ l'ẹphe eshi ọ̀nyà bẹ ị dụkwaa ashị. Ẹphe gbẹkwanu achọwa ndzụ ngu.

³¹ Mu nụmakwaru olu-ẹkwa onye dụ gẹ nwanyị, ime eme; mbụ l'ude, ọotsu dụ gẹ k'onye ime-ọduu l'eme. Olu ono bụkwa kẹ Nwada Zayọnu, l'eme g'oome tụa unme; machịru ẹka iya epfu sụ: “Oowaa! Ike abvụakwaa mu. Ndzụ mu bẹ e woakwaru nụ ndu mgbugbụmadzu.”