Jieremaya 31 - BAYỊBURU Izii

Alwalwa ndu Ízurẹlu

¹ Wakwa iphe, Chipfu epfu baa: “O -rwua lẹ teke ono; bẹ mu a-bụru Chileke k'ipfu l'ipfu ndu Ízurẹlu l'ophu; ẹphe abụru ndibe mu.”

² Wakwa iphe, Chipfu epfu baa: “Ndu ono, ogu-echi gbuphodoru ono bẹ e meru eze-iphe-ọma teke ẹphe nọ l'echiẹgu; mbụ Ízurẹlu; teke o shi achọ ẹka ọo-nọdu tụta unme

³ bẹ Chipfu shi l'ẹka dụ ẹnya mee g'ọ hụma iya. Mu yeru ngu obu yee ngu iya k'ojejoje. Mu gude n-yemobu mu kpụritaru ngu.

⁴ Mu a-kpụ-phukwa ngu phọ azụ; l'ị bụru onye a kpuphuru azụ; gụbe nwamgbọko mu yẹe nwoke akwajẹduru ono, bụ gụbe Ízurẹlu. L'i wota nkwa ngu je etsoru ndu ẹhu atsọ wata ete ebvu.

⁵ Ịi-wata akọ opfu-vayịnu l'eli úbvú úbvú Samériya ọzobaa. Ndu akọ opfu a-kọ iya; ria iphe, ẹphe kọru iya;

⁶ kẹle e -mechaa; l'ọ dụru mbọku, ndu eche nche a-nọnya; ẹphe echiaha mkpu l'alị úbvú úbvú ndu Ifuremu sụ: ‘Unu bya g'anyi je l'úbvú Zayọnu; jepfu Chipfu, bụ Chileke anyi!’ ”

⁷ Wakwa iphe, Chipfu epfu baa: Unu gụa ebvu ẹhu-ụtso nụ Jiékọpu! Unu tụa ụzu ẹhu-ụtso nụ onye-ishi ọhamoha! Unu raa ya arara; kwaa ya l'ẹvu sụ: Jiko Chipfu; dzọnaa ndu nkengu; mbụ nwa ndu Ízurẹlu ndu ọphu phọduru nụ!

⁸ Lekwa; mu e-shi l'alị ndu isheli chị-phuta phẹ azụ. Mu e-jerwuchaa ẹka igwe beru alị beru je erwukọo phẹ. Mu a-chịtachaa mẹ ndu atsụ ishi; mẹ ndu ẹniyeni; mẹ ndu dụ ime; mẹ ndu ọphu ime emewaa ememe. Ọ bụepho l'ikpoto ndu a-lwa nụ a-pa ẹka.

⁹ Ẹphe a-nọdu ara ẹkwa abya. Mbụ l'ẹphe a-nọdu arwọ mu arwọrwo; mu edu phẹ alwa. Mu e-du phẹ dughaa nggele nggele; dua phẹ shia ụzo, dụ baswaa k'ọphu ụpfu ata akpọdu phẹ l'ọkpa. Ọ bụru iphe, kparụ iya nụ bụ lẹ mu bụ nna Ízurẹlu; tẹme Ifuremu bụru ọkpara mu.

¹⁰ “Unu nụmakwa Opfu Chipfu; unubẹ ọhamoha! Unu araa ya arara gẹ ndu bukube eze-ẹnyimu l'ẹka dụ ẹnya nụma! L'onye ono, chịkashiru ndu Ízurẹlu ono a-chịkobekwa phẹ phọ ọzo. L'ooche ụnwu atụru iya ọbu nche g'onye eche atụru;

¹¹ kẹle Chipfu gbafụtawaru Jiékọpu pfụa aswa ishi iya l'ẹka ndu ka phẹ ọkpehu.

¹² Ẹphe a-bya bya atụa ụzu ẹhu-ụtso l'úbvú Zayọnu. Ẹphe eteru ẹswa kpua iphe, dụ ree, Chipfu doberu; mbụ ereshi-o; mẹ mẹe-o; mẹkpoo manụ; mẹ ụnwu atụru mẹ eghu; mẹkpoo ikpoto eswi. Ẹphe a-dụ g'opfu, a kọru agba iya mini ree; ọphu ẹphe a-nọdubaedu aphụ-aphụ.

¹³ Teke ono bẹ ụnwumgboko a-wata ete ebvu; ẹhu atsọ phẹ; mẹ ụnwokorobya; mẹ ndu bụ ọgerenya kwaphọ. Noo teke mu e-me g'aphụ, ẹphe shi agụ bụru phẹ ẹhu-ụtso. Mu a-dụ phẹ obu; mu agbanwee aphụ, tsọru phẹ nụ g'ọ bụru phẹ ẹhu-ụtso.

¹⁴ Ndu uke bẹ mu a-nụkpo iphe, dụ ree nụa k'etsutsu iya. Tẹme iphe, dụ ree, mu doberu bẹ e-jikpọo ndu nkiya ẹpho.” Nokwa iphe, Chipfu eepfu.

Chipfu a-phụru ndu nkiya obu-imemini

¹⁵ Wakwa iphe, Chipfu epfu baa: “A nụmaru ụzu-ẹkwa lẹ mkpụkpu Rama; mbụ ẹkwa anwụhu mẹ oke nggụmaphu. Ọ bụru Rechiẹlu l'ara ẹkwa ụnwu iya; ọphu o kwedu g'e gbobuta iya egbobuta; opfu l'ụnwu iya bvụeberu.”

¹⁶ Wakwa iphe, Chipfu epfu baa: “Gberuma! Ba rahẹ ẹkwa! Huchaa ẹnya-mini, nọ ngu l'ẹnya; kẹle ee-mechaa bua ngu nggo ozi ngu; mbụ l'ẹphe e-shi l'alị ndu ọhogu lwa. Ọ kwa Chipfu epfu iya.

¹⁷ Ọo ya bụ lẹ-a; unu lee ẹnya l'iphu a-dụru unu ree. Ụnwu unu l'a-lwa l'alị phẹ.” Nokwa iphe, Chipfu eepfu bụ ono.

¹⁸ Ude, Ifuremu atsụ bẹ mu nụmawaru; l'ọ sụru: Ị hụ̀waru mu ahụ̀hù g'onye ahụ̀ nweswi, ekwedu g'a gọta iya. A hụ̀kwanaa mu hụ̀ta. Dophunu mu azụ gẹ mu alwaphuta azụ; noo kẹle ọo ngu bụ Chipfu bya abụru Chileke mu.

¹⁹ Mu kpaphuhucharu; izimanụ bya alwaphuta mu azụ. Ọnodu, mu nọ doẹ mu phọ ẹnya. Mu phuru yoo; chịru ẹka ye l'iphu ụtapfu. Iphere bya egude mu; mu bya abụru onye ẹnya lwarụ; kẹle ọo iphe, mu meru teke mu bụ okorọbya bẹ byaru eteahaa mu ntụ l'iphu nta-a.

²⁰ “Sụ-a; Ifuremu ?tọ bụdu nwa, mu yeru obu; mbụ nwa, tụbaru mu l'ẹnya? A makwarụ-a lẹ mu ahajẹru epfuru iya; obenu lẹ mu anyatajẹle iya-a. Ọo ya bụ lẹ-a; oghoroko iya dụ mu shii; mbụ lẹ mu aphụru iya obu-imemini, parụ ẹka. Nokwa iphe, Chipfu eepfu bụ ono.

²¹ Meshia ọhubama dobegbaa l'oji! L'ị kọshia obvudu obvudu dobegbaa! L'i lerwetakwa oji, a tụru mkpoli ẹnya, bụ oji, iishi! Lwadụpho azụ; gụbe nwamgbọko mu, bụ Ízurẹlu! Lwadụpho azụ lẹ mkpụkpu ngu ono g'ọ ha!

²² ?Ịi-ghaphekpọ ẹgube ono jasụ teke ole; gụbe nwada ono, eegudedu ire iya ẹka ono? Chipfu mewaru iphe ọ̀phúú lẹ mgboko-a; mbụ lẹ nwanyị a-wata eleta nwoke ẹnya.”

Iphe e-mechaa dụru ndibe Chileke lẹ ree

²³ Wakwa iphe, Chipfu, bụ Ọkalibe-Kakọta-Ike eepfu baa; mbụ Chileke ndu Ízurẹlu: “Ọ sụru-a: Mu -shiẹpho l'ẹka a kpụru phẹ lẹ ndzụ duphuta phẹ azụ; bẹ ndu nọ l'alị Jiuda; yẹe mkpụkpu lẹ mkpụkpu iya a-wata epfu opfu-a ọzo sụ: “Gẹ Chipfu kebe ngu l'ọma; gụbe ibe onye ono, pfụberekoto ono; gụbe úbvú, dụ nsọ!

²⁴ Ndu Jiuda mẹ mkpụkpu lẹ mkpụkpu, nọkota iya nụ l'a-tụko bukọtaru l'ẹka ono; ndu akọ opfu eburu iya; ẹphe lẹ ndu aghaphe aghaphe; ẹphe l'eghu mẹ atụru phẹ.

²⁵ Kẹle onye ike bvụru bẹ ee-me-a g'ẹpho ji; mu emee iphe, bụkpoo onye rwụhuru arwụhu g'ọ rọkota ike.”

²⁶ Mu jeberu nno bya etehu; bya awata achịka ẹnya. Mgbẹnya mu ọbu nọdu atsọ mu ntụmatu.

²⁷ Wakwa iphe, Chipfu epfu baa: Lekwa; mbọku abyakwa-a; teke mu e-woru mebyi-iphe, bụ nemadzụ yẹe anụ woru ghakaa l'alị Ízurẹlu yẹle alị Jiuda.

²⁸ Ọo gẹ mu eche phẹ nche; e pheshia phẹ; nwukpọshia phẹ; e mekpee phẹ; mebyishia phẹ; ẹphe laa l'iswi; nokwaphọ gẹ mu a-nọdu eche phẹ nche; aa-kpụkwa phẹ; dzaphu phẹ azụ. Nokwa iphe, Chipfu eepfu.

²⁹ O -rwua mbọku ono bẹ a taa sụbaedu: Nna anyi phẹ bụkwa akpụru vayịnu, achaduru achacha bẹ ẹphe riru. Ọ nọdu akpọ ụnwu phẹ eze ihuku.

³⁰ Ọ bụ-chia iphe, e-me nụ bụ l'onyemonye a-la l'ẹjo-iphe, o metaru. Onye riwarụro akpụru vayịnu, achaduru achacha; eze akpọwa iya rọ ihuku.

³¹ Wakwa iphe, Chipfu epfu baa: Mbọku abyakwa teke mu lẹ ndu Ízurẹlu; waa ndu Jiuda a-gba ndzụ ọ̀phúú.

³² Ono taa dụedu g'ọgbandzu ọphu mu lẹ nna phẹ oche gbaru; teke ono, mu gude ẹka seta phẹ dufuta phẹ l'alị ndu Ijiputu; noo kẹle ẹphe mebyiru ọgbandzu mu; l'ẹka bụkwa mbẹdua bụ ji, alụ phẹ nụ. Nokwa iphe, Chipfu eepfu.

³³ Wakwa iphe, Chipfu epfu baa: Wakwa ụdu ọgbandzu ọphu mu l'ọnu-ụlo Ízurẹlu a-gba: mẹ e -mechaẹpho teke ono. Ekemu mu bẹ mu e-woru ye phẹ l'egomunggo. Ọ bụru l'ime ọkpoma phẹ bẹ mu e-de iya edede. Mu a-bụru Chileke phẹ; ẹphebedua abụru ndibe mu.

³⁴ Nemadzụ tee ziẹdu nwibe iya iphe ọzobaa; ọphu nemadzụ eziẹdu nwune iya iphe kẹ g'aasụje: Makwarụ Chipfu! Kẹle ẹphe e-shiẹpho l'onye ẹnya kachaa alwalwa l'ime phẹ maru mu jasụ l'onye ọphu kachaa shii. Noo kẹle mu a-gụru phẹ nvụ l'ẹjo-iphe, ẹphe megbabẹru. Ọphu mu anyatabaẹdu iphe-ẹji phẹ ọzobakpo. Nokwa iphe, Chipfu eepfu bụ ono.

³⁵ Wakwa iphe, Chipfu epfu baa: Mbụ onye ono, doberu ẹnyanwu sụ g'o chije l'eswe; bya emee g'ọnwu; yẹe kpokpode chije l'ẹnyashi; onye ono, bụ iya akparwụbeje oke-ẹnyimu; akpara-mini iya ede mba; ẹpha iya bụ Chipfu, bụ Ọkalibe-Kakọta-Ike.

³⁶ “Ọo ẹpho m'ọ bụ l'a -nọnyaru; iphe-a, mu tuburu k'ememe-a phuhu k'ọphu mu hụma-buhuru iya; ọ bụru iya bụ l'oshilọkpa Ízurẹlu achịhu; ẹphe taa bụedu ọha ẹka phẹ l'iphu mu jasụru asụru.” Nokwa iphe, Chipfu eepfu bụ ono.

³⁷ Wakwa iphe, Chipfu epfu baa: “Ọo ẹpho m'ọ bụ l'aa-tụ̀ imigwe imigwe l'iphe, aatụ̀je iphe; aabya ebvua alị bvurwua ẹka a tọru ọkpa mgboko l'ophu; tẹme mu e-gude iphe, oshilọkpa Ízurẹlu megbabẹru jịka-gbua phẹ.” Nokwa iphe, Chipfu eepfu bụ ono.

³⁸ Wakwa iphe, Chipfu epfu baa: “Mbọku abyakwa teke ee-mechaa kpụkwaa mkpụkpu-a doberu mụbe Chipfu eshi l'ọje Hananẹlu jasụ lẹ Ọnu-abata Mgburẹku.

³⁹ Ogologo iphe, e-gude atụ̀ iphe l'a-gbẹ l'ẹpho l'ẹka ono dabyiru ogologo jasụ l'eli úbvú Garẹbu; l'ọobya agọ-jia dabyiru jasụ lẹ Gowa.

⁴⁰ Nsụda ono l'ophu, bụ ẹka e shi etuphajẹ odzu; awụshi iya ntụ; mẹkpoo ẹgu ono l'ophu, dabyiru jasụ lẹ nggele Kidirọnu l'ụzo ẹnyanwu-awawa; gbiriri jasụ l'agụga ọnu-abata Ịnya; g'ọ ha a-dụkotaru Chipfu nsọ. Ọphu a byadu ephefubaa mkpụkpu ono ephefu; ọphu ee-nwukpọshibaedu iya enwukpọshi.”