Jieremaya 30 - BAYỊBURU Izii

Chileke ekwe ukwe alwalwa ndu Ízurẹlu

¹ Wakwa opfu, shi l'ọnu Chipfu rwua Jieremaya nchị.

² “Wakwa iphe, oopfu; mbụ Chipfu, bụ Chileke kẹ ndu Ízurẹlu: Tụko opfu-a, mu pfuru nụ ngu-a dekọta l'ẹkwo.

³ Kẹle-a: wakwa iphe, Chipfu epfu baa: mbọku abyakwa; teke mu e-je l'ẹka a kpụru ndibe mu lẹ ndzụ laa; mbụ ndibe mu bụ ndu Ízurẹlu ẹphe lẹ ndu Jiuda; je eduphuta phẹ azụ; bya edophu phẹ azụ l'alị ono, mu nụru nna phẹ oche g'ọ bụru nkephẹ ono. Nokwa iphe, Chipfu eepfu.”

⁴ Wakwa opfu, Chipfu pfuru pfudoru ndu Ízurẹlu ẹphe lẹ ndu Jiuda.

⁵ “Wakwa iphe, Chipfu epfu baa: Anyi anụkwa mkpu, ẹphe echi; mbụ ndu ndzụ agụ. Mbụ l'ọo n-yemebvu dụ; ọ tọ bụdu nchị-adụ-doo.

⁶ Jịnaa ajị hụma; nwoke ?ọ tsụje ime nwa? ?Dẹnukwanu g'o gude mu hụmagba unwoke l'ẹhu l'ẹhu g'ẹphe chịgbaaru ẹka kwẹe l'ẹpho gẹ nwanyị, ime eme; onyenọnu wochaaru iphu gbanwụbe ọnwu ọnwu?

⁷ Tụswekwa! Mbọku ono a-dụkwa ẹjo ẹji; k'ọphu bụ l'ọ tọ dụedu eswe a-dụbaa ẹji g'ọo ya. Teke ono bẹ oshilọkpa Jiékọpu e-je iphe-ẹhuka; obenu l'ee-mechaa dzọta iya l'ime iya.

⁸ “Wakwa iphe, oopfu; mbụ Chipfu, bụ Ọkalibe-Kakọta-Ike: O -rwua mbọku ono bẹ mu a-nyakwo agadagba-njịgba ono, nọ phẹ l'olu ono; mu abya atọshia phẹ ẹgbu, e keru phẹ; ọphu ndu ọhozo emebaẹdu phẹ ohu phẹ.

⁹ Ẹphe a-nọdu ejeru Chipfu, bụ Chileke phẹ ozi; yẹe Dévidi ono, bụ eze phẹ ono, bụ onye mu e-me g'ọ fụtaru phẹ.

¹⁰ “Gẹ ndzụ ba agụkwa ngu; gụbe Jiékọpu, bụ onye-ozi mu! Nokwa iphe, Chipfu eepfu. G'e be yekwa ngu ebvu; gụbe Ízurẹlu; kẹle-a; lekwa lẹ-a; mu e-shikwa l'ẹka dụ ẹnya dzọta ngu. Mu adzọta ụnwu ngu l'alị ẹka a kpụru phẹ lẹ ndzụ laa. Noo teke Jiékọpu a-lwa azụ bya anọdu l'ẹhu-guu. Tẹme ọ tọ dụedu iphe, byaru emebaa ya nụ; ọphu ọ dụdu onye byaru emebaa ya g'ọ bụru onye ndzụ agụ.

¹¹ Wakwa iphe, Chipfu epfu baa: Mu nọkwa swiru ngu eswiru; mu a-dzọ ngu! A makwarụ-a lẹ mu tụkoru ọhamoha emebyishibẹbe, bụ ndu mu shi woru ngu ghakaa l'ime phẹ. Obenu lẹ mu tee mebyishibẹbedu ngu gberegedege. Mu a-hụ̀ ngu ahụ̀hù l'ụzo, pfụru nhamụnha. Ọphu mu ahakwanụ ngu phuruphuru gẹ mu ta anụ ngu aphụ l'ophu l'ophu.”

¹² Wakwa iphe, Chipfu epfu baa: Onwo, aba ngu nụ bẹ e tee metakwa emeta. Ọphu iphe, e mekarụ ngu akpọhudu akpọhu.

¹³ Ọ tọ dụdu onye a-gbaru ngu ọdzori. Ọphu ọ dụdu iphe ọzo, ee-mebaa l'ọ́nyá ọbu, aba ngu nụ ọbu. Ọphu ịi-kaẹdu mma akaka.

¹⁴ Iphe, bụkpoo ndu gụ l'ẹphe shi eshi ọ̀nyà zọhakotawaru ngu. Ẹphe ta akpaẹdu ngu ishi ililekpọo. Mu tsuwaru ngu iphe, onye ọhogu etsuje ọhogu iya. Mu bya echia ngu iphe, onye dụru nemadzụ ẹhuka echije iya. Ọ bụru iphe, kparụ iya nụ bụ l'i menụkaru ẹjo-iphe. Tẹme iphe-ẹji, i meshiru paa igwerigwe.

¹⁵ ?Dẹnu g'o gude ị nọdu ara ẹkwa iphe, mekarụ ngu nụ; mbụ iphe, eme ngu ẹhuka, bụ iphe, taa kpọhudu akpọhu? Ọ kwa l'ị metanụkaru iphe-ụta; tẹme iphe-ẹji, i meshiru paa igwerigwe; meru g'o gude mu mee ngu iphemiphe ono.

¹⁶ Obenu l'iphe, bụkpoo ndu eripya ngu bẹ ee-ripyakwa. Iphe, bụkpoo ndu ọhogu ngu bẹ aa-kpụ lẹ ndzụ. Ndu kwarụ iphe ngu l'ọkwata bẹ aa-kwakwaphọ ọkwata. Ndu keru iphe ngu l'ọgu bẹ ee-kekwaphọ iphe phẹ l'ọgu.

¹⁷ Obenu lẹ mu e-me g'ẹhu dụ ngu ike; mee g'ọ́nyá, dụ ngu l'ẹhu kpọhu. Nokwa iphe, Chipfu eepfu. Ọ bụru iphe, kparụ iya nụ bụ l'e kuru ngu onye a chịfuru achịfu; Zayọnu, adụedu onye akpa ishi iya.

¹⁸ “Wakwa iphe, Chipfu epfu baa: Ọnu-ụlo Jiékọpu ono, e shi kpụa lẹ ndzụ ono bẹ mu e-dophu azụ l'ọnodu iya. Mu aphụaru ẹka ẹphe bu obu-imemini. Mkpụkpu ono bẹ aa-kpụ-phu azụ l'eli ọzu iya ono. Ibe eze ono abyakwa anọ-chia l'ẹka ọ gbaru g'ọ nọdu.

¹⁹ Ẹphe awata agụ ebvu-ekele; atụ ụzu ẹhu-ụtso. Mu emee g'ẹphe kabaa igwe; ọphu ẹphe abyadụ alwa alị alị. Mu e-me g'ẹphe bụru ndu aakwabẹ ùbvù; ọphu ẹnya abyadụ alwa phẹ.

²⁰ Ụnwu phẹ bụ g'ẹphe shi dụ teke ndiche bụ g'ẹphe a-dụ. Tẹme edzudzu-ọha abụru iphe, ngụchaaru angụru l'iphu mu. Mu anụa ndu eme phẹ ewere aphụ.

²¹ Onye eze phẹ a-bụru onye lanụ l'ime ndibe phẹ. Onye a-bụru onye-ishi phẹ abụru l'echilabọ phẹ bẹ oo-shi. Mu a-kpụritaru iya; l'ọobya anọdu mu ntse; kẹle-a: ?bụ onye sụru g'oo-dobe onwiya iche bya bya anọdu mu l'iphu? Ọ kwa Chipfu epfu iya.

²² Ọo ya bụ l'unu a-bụru ndibe mu; mu abụru Chileke unu.”

²³ Lekwa! Chipfu gudeakwa ẹhu-eghu ezi oke-phẹrephere; mbụ ẹjo oke phẹrephere. Ọ bụru l'ishi ndu ẹjo-iphe bẹ ọophu temutemu;

²⁴ ọphu ẹhu eghubuhukwa Chipfu eghu gbiriri jasụ l'o meẹbekota iphe, dụ iya l'ọkpoma k'ememe. Mbọku abya-a l'ụzo iphu teke iphe-a l'e-dokọta unu ẹnya ree.