Jieremaya 22 - BAYỊBURU Izii

Ikpe, e kperu eze ndu l'eme ẹjo-ememe

¹ Wakwa iphe, Chipfu epfu baa: “Je l'ibe eze ndu Jiuda je araa ozi-a arara l'ẹka ono:

² Nụmakwa Opfu Chipfu; gụbe eze ndu Jiuda; mbụ gụbe onye nọ l'aba-eze Dévidi; gụbedua l'onwongu; mẹ ndu-ozi ngu; mẹkpoo ndibe ngu, bụ ndu eshije l'ọnu-abata-a abahụ.

³ Wakwa iphe, Chipfu epfu baa: Unu kpeje ikpe, pfụru nhamụnha; unu emeje iphe, pfụru ọto. Unu adzọtaje onye ana nfụ l'ẹka onye emekpa iya ẹhu. Unu ta adụkwa ewere; ọzoo omeliwe, unu e-meje ndu lwarụ alwalwa; ọzoo ndu enwedu nna; ọzoo ụnwanyi, ji phẹ anọedu ndzụ. Ọphu unu anọdujeshi l'ẹka-a gbua ndu adụdu iphe, ẹphe meru!

⁴ Kẹle-a; ọ -bụru l'unu jiru obu oyi mee iphe-a, mu sụru g'unu meje-a; bẹ eze ndu nọ l'aba-eze Dévidi; ẹphe lẹ ndu ejeru phẹ ozi; mẹ ndibe phẹ a-nọdu agba l'ụgbo-ịnya; mẹ l'eli ịnya eshi l'ọnu-abata ibe eze-a abata.

⁵ Obenu teke ọ bụ l'unu te emedu iphe, mu sụru g'unu mee; gẹ mu gudekwa onwomu riaru unu angụ; mbụ l'ibe eze-a e-mechakwaa bụru ochobu. Nokwa iphe, Chipfu eepfu bụ ono.

⁶ “Kẹle-a; wakwa iphe, Chipfu epfu l'opfu ẹhu ibe eze ndu Jiuda: A makwarụ-a l'ị dụ g'alị Giladu l'ẹhu mu; ọzoo g'eli úbvú úbvú Lébanọnu. Obenu l'ọ tọ dụdu iphe, e-me gẹ mu te eme ngu g'ị dụ g'echiẹgu; mbụ gẹ mkpụkpu, e te bujeduru ebubu.

⁷ Mu dobewaru ndu mmebyi iche g'ẹphe bya emebyia ngu. G'ẹphe ha l'onye l'onye e-gudegbaa ngwọgu phẹ. Ẹphe abya egbutsushia ẹguru oshi sida ngu ono; bya achịru iya ye l'ọku.

⁸ “Ikpoto nemadzụ, shigbaa l'ọha, dụ igwerigwe l'a-ghata lẹ mkpụkpu-a; ẹphe ajị nwibe phẹ sụ: ‘?Bụ gụnu meru iphe, Chipfu meru ẹgube iphe ọwa-a l'ẹhu oke mkpụkpu-a?’

⁹ Aa-sụ phẹ l'iphe, kparụ iya nụ bụkwa l'ẹphe gwọberu ọgbandzu Chipfu, bụ Chileke phẹ; je awata ephozeru agwa; baahaarụ iya ẹja.”

¹⁰ Unu ta arakwa ẹkwa onye eze ono, nwụhuru nụ ono! Ọphu unu emekwa ẹkwa iya! Ọ bụchikwaa onye unu a-kwa ẹkwa iya kwashịa ya ike bụ onye ọphu a kpụru lẹ ndzụ laa ẹka ọzo. Noo kẹle ọ tọo lwabaẹdu; ọphu ọohumabaedu alị ẹka a nwụru iya ọzo.

¹¹ Kẹle-a; wakwa gẹ Chipfu pfuru opfu ẹhu Shalumu nwa Jiosáya, bụ onye nọ-chiru ọkwa nna iya; bya abụru eze, ndu Jiuda; mbụ onye ono, tụgbuwaru l'ẹka-a: “Ọ tọo lwabaẹkwa.

¹² Ọ kwa l'ẹka ono, ẹphe kpụru iya lẹ ndzụ laa ono bẹ ọo-nọdu nwụhu. Ọ tọo hụmabaekwa alị ẹka-a ẹnya ọzo.”

¹³ Nshịo onye ono, akpụ unuphu ibe eze iya l'ụzo, apfụduru-ọto; mbụ onye bụ l'ụzo, apfụduru nhamụnha bẹ o gude akpụ ụlo-eli iya; onye meru ndu alị iya; ẹphe nọdu eje ozi kẹ mmanụ; ọphu ọopfudu phẹ ụgwo ozi phẹ.

¹⁴ Ọ nọdu epfuje sụ: Mu a-kwa unuphu ibe eze mu g'ọ paa ẹka. Ya e-mee ụlo-eli iya g'ọ dụ ọsa. Ọ bya emee ya bya eyeshia ya windo; bya egude oshi sida gbaa ya uko; bya etee ya penti uswe-uswe gude rwaa ya.

¹⁵ “?Bụ akụshi ụlo oshi sida l'e-me g'ị bụru onye eze tọo? Nna ngu; ?to shidu eri nri; angụ iphe, aangụ angụngu? O nọdu ekpeje ikpe, pfụru nhamụnha; bya eme iphe, pfụru ọto. Iphemiphe dụru iya lẹ ree.

¹⁶ Ndu eje iphe-ẹhuka; waa ndu adụdu g'ọ dụ phẹ bẹ ọ gbaru ọdzori; ọ dụru iya lẹ ree. ?Tọbudu iphe ono bụ l'onye-a maru onye mu bụ?” Nokwa iphe, Chipfu eepfu.

¹⁷ Obenu lẹ gụbedua bẹ ẹnya ngu; yẹe ọkpoma ngu bụ l'ẹka i phoberu iya bụ l'eri urwu ghẹlegheleghele; yẹle egbu ndu adụdu iphe, ẹphe meru; yẹle eme nemadzụ iphe-kpanganga yẹle omeliwe.

¹⁸ Ọo ya bụ lẹ-a; wakwa iphe, Chipfu epfu l'opfu ẹhu Jiehoyakimu, bụ nwa Jiosáya, bya abụru eze ndu Jiuda: A taa rakwa ẹkwa iya sụ: Owiwo nwune mu nwoke-e! Owiwo nwune mu nwanyị-e! A taa rakwa ẹkwa iya sụ: Owiwo onye nwe mu nụ-e! Owiwo ẹguru onye-a!

¹⁹ Ee-li iya g'onye eli nkapfụ-ịgara. Mbụ l'ọo wuruwuru bẹ aa-lọ iya lọta je etuphaa l'azụ mkpụkpu Jierúsalẹmu.

²⁰ “Jekwa l'úbvú úbvú Lébanọnu je echia mkpu! Gẹ ndu alị Beshanu nụmakwa olu ngu! Jekwa anọdu l'eli úbvú úbvú Abarimu chia mkpu; kẹle ndu gụ l'ẹphe tụgbaru bụru nanụ bẹ e gbushichaakwaru g'ẹphe ha.

²¹ Mu kakwaru ngu teke ono, i shi dobesụ l'ọ tọ dụdu iphe, byaru eme ngu nụ ono. Ị sụle-a l'i tii yedu ọnu. Ọ kpọkwa g'i shi teke ị bụ okorọbya meta bụ ono. I tiki meswekwaa iphe, mu sụru g'i mee.

²² Phẹrephere a-tụko ndu echeru ngu atụru pata. L'a tụko ndu gụ l'ẹphe tụgbaru bụru nanụ kpụa lẹ ndzụ. Noo teke iphere e-gude ngu; l'e woru ngu iphu kpua lẹ ntụ. Ọ bụru iphe, kparụ iya nụ bụ ẹjo-iphe, iimegbabẹ.

²³ Unubẹ ndu bu l'úbvú úbvú Lébanọnu; mbụ ndu kparụ ẹpfune l'ụlo, a kụru l'oshi-sida; ẹgube ude, unu e-mechakwanaa tsụa teke iphe-ẹhuka azụ unu gburumu pfụurii; mbụ meahaa unu ẹhuka gẹ nwanyị, ime eme!”

²⁴ Wakwa iphe, Chipfu epfu baa: “Eshinu mu nọ ndzụ gẹ mu nọ iya-a; bẹ ọ tọ dụkwa m'obeta gụbe Jiehoyakinu, nwa Jiehoyakimu, bụ eze, ndu Jiuda bụru echi-ọhubama, mu gba l'ẹkutara mu; mu agbafụlekwa ngu-a.

²⁵ Mu e-woru ngu ye l'ẹka ndu achọ ndzụ ngu; mbụ ndu ịitsu ebvu; mbụ l'ẹka Nebukadineza, bụ eze ndu Bábilọnu; yẹle ẹka ndu Bábilọnu.

²⁶ Mu e-tuphakpọe ngu phọ etupha; gụ lẹ ne, nwụru ngu nụ; je echie unu l'alị ẹka ọzo; ẹka abụdu ẹka a nwụru ngu; ọphu ọ bụdu ẹka a nwụru ne ngu. Ọ bụru l'ẹka ono bẹ unu n'ẹbo a-nọdu nwụhu.

²⁷ Unu ta abyadụ alaphu azụ l'alị ono, a-nọdu agụ unu alwalwa ono.”

²⁸ Jiehoyakinu-a; ?ọ bụ ite-ụrwa, tụkpohuru nụ, a jịkaru ajịka tọo? Mbụ iphe, adụdu onye ọ dụ ree? ?Bụ gụnu meru g'o gude a chịru yẹe ụnwegirima ibe iya etuphashia; je eworu phẹ chịru ye l'alị ẹka ẹphe amadụ?

²⁹ Gụbe alị! Alị! Alị! Nụmakwa Opfu Chipfu!

³⁰ Wakwa iphe, Chipfu epfu baa: “Dee nwoke-a l'ẹkwo l'ọ bụ onye enwedu nwa; onye iphe ta adụduru lẹ ree teke ọ nọ ndzụ. Noo kẹle ọ tọ dụdu awa iya ọphu iphe, byaru adụru lẹ ree. Ọphu ọ dụdu onye ọphu byaru anọdu l'aba-eze Dévidi. Mbụ l'ọ tọ dụdu onye ọphu byaru abụru eze ndu Jiuda.”