Jieremaya 20 - BAYỊBURU Izii

Jieremaya yẹe Pashọ

¹ O be teke Pashọ nwa Ima nụmaru mpfuchiru Jieremaya; Pashọ bụ onye uke Chileke bya abụru onye-ishi ndu-ishi eze-ụlo Chipfu; ọ nụmaepho iphemiphe ono, Jieremaya epfu ono;

² o mee; e chia Jieremaya, bụ onye mpfuchiru ono ẹchachi; bya eworu iya tụ-chia l'ụlo-mkpọro, nọ l'agụga ọnu-abata eze-ụlo Chipfu ọphu aza Ephekerephe Ọnu-abata Benjiaminu.

³ O be lẹ nchitabọhu iya; Pashọ bya atụfuta iya l'ụlo mkpọro ono. Jieremaya sụ iya-a: “Ẹpha, Chipfu gụru ngu ta abụekwa Pashọ. Ọ kwa ‘Nggiri, nọ l'ụzo l'ẹkameka’;

⁴ kẹle-a; wakwa iphe, Chipfu epfu baa: Mu e-me ngu g'ị tsụahaa onwongu ebvu; ndu yeru ngu obu g'ẹphe ha atụko atsụ ngu ebvu. Ii-gude ẹnya ngu gẹdegede hụma teke ndu ọhogu phẹ e-gude ogu-echi egbushi phẹ. Ndu Jiuda mgburugburu bẹ mu e-woru ye l'ẹka eze ndu Bábilọnu, bụ onye a-kpụ phẹ lẹ ndzụ lashịa alị ndu Bábilọnu; ọzokwanu gude ogu-echi gbushia phẹ.

⁵ Iphe, bụkpoo ẹku ndu mkpụkpu-a bẹ mu e-woru yekọta l'ẹka ndu ọhogu phẹ; mbụ iphe, bụkotakpoo iphe, ẹphe seshiru akanya iya; mẹkpoo iphe, bụkpoo iphe, vu oke aswa, nọkota l'ime iya; mẹkpoo iphe, bụ ẹku, eze ndu Jiuda kpatarụ. Iphemiphe ono bẹ ẹphe a-kwakọta ọkwata vuta lashịa alị ndu Bábilọnu.

⁶ Gụbedua, bụ Pashọ yẹe iphe, bụ ndu bukọta l'ibe ngu bẹ aa-kpụkota lẹ ndzụ laa alị ndu Bábilọnu. Ọ bụru l'ẹka ono bẹ unu a-nọdu nwụshihu; l'e lia unu l'ẹka ono; unu lẹ ndu yeru unu obu ono, unu sụru lẹ Chileke pfuru phẹ, iphe, ẹphe pfuru ono.”

Aphụ, Jieremaya agụ

⁷ Gụbe Chipfu; i dusweru mu ụzo; mu bụru onye e dusweru ụzo. I mekperu mu; tẹme ọ kalẹru ngu. Mu bụwaa onye aanọduje eme iphe-ọchi mkpụrumkpuru. Onyemonye anọduje achị mu ọchi.

⁸ Tekenteke, mu epfukpọo opfu bẹ mu arajẹ iya arara l'omeliwe dụkwa; ọla-l'iswi dụ. Opfu Chipfu mewaru; mu bụru onye aakọ ọnu; tẹme a nọdu achị mu ọchi mkpụrumkpuru.

⁹ Teke mu sụkwanuru lẹ mu tee kubaẹdu iya ẹpha; ọphu mu egudebaẹdu ẹpha iya epfu opfu; opfu iya ọbu anọdu mu l'ọkpoma enwu mu phuruphuru g'ọku; rakụru arakụru l'ime ọkpu mu. Mbụ l'ike esede iya bvụwaru mu. Mbụ lẹ-a; mu taa dụkwa ike esede iya.

¹⁰ Kẹle mu anụkwa taba taba, ẹphe adzụgbaaru nwibe phẹ sụ: “Nggiri dụkwa l'ụzo l'ẹkameka!” Ẹphe tụkoru epfu sụ: “Unu je edoo iphe ono, oopfu ono! Unu g'anyi je edoo iphe, oome!” Iphe, bụkpoo ndu mu l'ẹphe eshi ọ̀nyà elekọtaepho ẹnya g'ẹphe maru teke ẹturu a-lọ mu. Ẹphe tụko epfu sụ: “?a maru e-dephuu iya. Noo teke ọo-kalẹru anyi. Ọ bụru teke ono bẹ anyi e-melata iya iphe-a, oome nta-a.”

¹¹ Obenu lẹ Chipfu nọ swiru mu eswiru g'onye eze-ojọgu swiru. Ọo ya bụ lẹ ndu ono, achị mu lẹ njọ ono bẹ ụpfu a-dụ. Ọ tọo kalẹduru phẹ; ọphu ooreduru phẹ g'ẹphe tụberu. Ọo-bụru phẹ iphe-iphere; ọphu a byadu azọha ẹnya-ọlwa phẹ azọha.

¹² Gụbe Chipfu, bụ Ọkalibe-Kakọta-Ike; gụbe onye ono ahụtaje ndu pfụberekoto ama; tẹme ị nọdu avọje obu yẹe ọriri; gẹ mu hụmanu ẹka iimelata phẹ; kẹle ọo ngu bẹ mu yeru ikpe nkemu l'ẹka.

¹³ Unu gụa ebvu nụ Chipfu! Unu jaa Chipfu ajaja! Kẹle ọ dzọtaru ndzụ onye adụdu g'ọ dụ iya l'ẹka ndu ẹjo-iphe.

¹⁴ Gẹ mbọku, a nwụru mu bụkwaru eswe, a tụru ọnu! G'a ta gọkwaru ọnu-ọma nụ eswe mbọku ono, ne mu nwụru mu onoya!

¹⁵ G'onye byaru ezia nna mu ozi ono bụkwaru onye a tụru ọnu; mbụ onye byaru asụ iya: “A nwụkwaru ngu nwa; ọ bụru nwa nwoke!” K'ọphu bụ l'ọ nụmaru iya; ẹhu tsọahaa ya.

¹⁶ Gẹ nwoke ono dụkwa gẹ mkpụkpu, Chipfu mebyishiru; ọphu ọ phụduru iya obu-imemini. G'ọ bụkwaru iphe, ọo-nọdu anụ l'ụtsu bụ ụzu-ẹkwa. O -be l'eswe; l'ọonuaha mkpu ọgu.

¹⁷ Kẹle ọ tọ pyị-gbuduru mu teke mu nọ l'ẹpho; gẹ ne mu bụru ilu mu. Ẹpho ahawa iya rọ ragbada jasụwaroya.

¹⁸ ?Bụnaa gụnu mekpọoru iphe, mu fụtaru l'ẹpho afụta ophu gẹ mu bya bya ahụma iphe-ẹhuka yẹe nrimaphụ; yẹe gẹ mu bya akpọ-chi ishi ndzụ mu l'iphe-iphere?