Jieremaya 2 - BAYỊBURU Izii

Ndu Ízurẹlu atụnwa Chileke

¹ Mu byakwa anụma olu Chipfu, sụru mu:

² “Je je araa ya arara gẹ ndu Jierúsalẹmu nụma-dzuru; sụ phẹ-a: “Mu nyatakwarụ g'o shi evubeje ngu evuvu eme iphe, dụ mu ree teke ị bụkwadu okorọbya. I shi yee mu obu gẹ nwanyị, a lụru k'ọ̀phúú. I shi etsojeru mu je aghakọta echiẹgu; mbụ je aghaa alị ono, adụdu iphe, aakọje iya ono.

³ Ndu Ízurẹlu shi dụru Chipfu nsọ. Ọ bụru phẹ bụ akpụru mbụ, mu vuru ụzo kpata l'iphe, mu kọru l'opfu mu. Iphe, bụkpoo ndu mekparu phẹ ẹhu bẹ ọ nmarụ ikpe. Tẹme ẹjo mmekpa-ẹhu dapfukwa phẹ phọ. Noo iphe, Chipfu epfu bụ ono.”

⁴ Unu nụmakwa opfu Chipfu; unubẹ ọnu-ụlo Jiékọpu; unubẹ ipfu l'ipfu ọnu-ụlo Ízurẹlu!

⁵ Wakwa iphe, Chipfu epfu baa: “?Bụ gụnu bẹ ndiche unu phẹ sụkporu lẹ mu mejeru phẹ, meru g'o gude ẹphe haa mu jemihu? Ẹphe je awata etso ntẹkpe, adụdu urwu, ọ barụ phẹ shi nno bụru ndu adụdu iphe, ẹphe barụ urwu iya l'onwophẹ;

⁶ ọphu ẹphe ajịduru sụ: ‘?Bụ awe bẹ ọ nọ; mbụ Chipfu, bụ iya dufutaru anyi l'alị Ijiputu; bya edua anyi dughaa echiẹgu, adụdu iphe, dabyiru iya nụ; mbụ dughaa alị ono, bụ evevee dụ iya; yẹe iduma iduma; alị, dụ chakịri chakịri bya agbahụkota tsụkiribaa; alị, adụdu onye eshije iya eshishi; ọphu ọ dụdu onye bu iya ebubu?’

⁷ Sụ-a; mu duru unu dubata l'alị emehu iphe, e meberu iya g'unu rije akpụru-iphe, amị iya nụ; yẹe ẹku, kụru iya nụ. Obenu l'unu bataru iya bya atụrwua alị mu; bya emee okiphe mu ono; ọ kpọo ìdzù.

⁸ Ọphu ndu-uke mu ajịduru sụ: ‘?Bụ awe bẹ ọ nọ; mbụ Chipfu?’ Ndu eme k'ekemu ta amadụ onye mu bụ; ndu-ishi kwefuru mu ike; ndu mpfuchiru bụru Balụ bẹ ẹphe epfuje iphe, o pfuru; bụru iphe, ẹphe etso bụ ntẹkpe, adụdu urwu, ọ barụ.”

⁹ Wakwa iphe, Chipfu epfu baa: “Ọo ya bụ lẹ mu e-pfunupho iphe, unu meru mu ọzo. Mu a-nọdu epfunupho ọzo iphe, ụnwu nwanwa unu meru mu.

¹⁰ Mbụ-a; unu ghabunaa eze-ẹnyimu bahụ l'alị ndu Sayịpurosu je elekpọdapho ẹnya! Unu yenu nemadzụ g'e jerwua alị ndu Keda je egbua ya igo rengurengu! Maẹshikwaru ?O nweru ẹka ẹgube iphe ono mejeru?

¹¹ Mbụ-a; ?Ọ dụru ọha, gbajẹru agwa phẹ inwe; l'ẹbe abụ l'iphe ọbu, ẹphe agwa ọbu bụ Chi? Obenu lẹ ndibe mu gbanweru mụbe onye dụ akpabiri je anata iphe, adụdu urwu, ọ barụ.

¹² Gụbe igwe; g'iphe-a nyịkwaa ngu ishi ẹdzu! G'ị kpọ-yiaru iya ukuvu! Nokwa iphe, Chipfu eepfu.

¹³ Ndibe mu mewaru uzi iphe-ẹji labọ. Ẹphe gbadowaru mu; mbụ mụbe ọ̀gbà mini, doru rịsaa; asọ gborogboro; bya ebvuaru onwophẹ iduma-nnakọbe-mini; tẹme ọ bụru iduma-nnakọbe-mini, gbawashịhuru agbawashịhu; ọphu mini adọjeduru iya.”

¹⁴ “Ízurẹlu ?ọ bụ ohu tọo? ?Ọ bụ onye a byaru anwụ; ọ bụwaru ohu tọo? ?Dẹnukwanu g'o gude a kwaahaa ya ọkwata?

¹⁵ Oduma, dụ igwerigwe sụakwaru ekiri; bya abawaru iya hanyịhanyi. Ẹphe tụkowaru iphe, dụ l'alị iya mebyishichaa. Mkpụkpu, dụgbaa ya nụ bẹ a tụakwaru ọku; ọku tsufukọta iya; ọphu ọ dụedu onye bu iya nụ.

¹⁶ Ọzo bụ lẹ ndu mkpụkpu Mẹmufisu; yẹe ndu mkpụkpu Tahụpanahesu kpụwaru ngu ishi.

¹⁷ ?Tọbudu ngu meru iya onwongu; eshinu ị jịkaru Chipfu, bụ Chileke ngu teke o du ngu eje lẹ gbororo?

¹⁸ Nta-a; ?bụ gụnu kparụ iphe, iije alị Ijiputu eje angụ mini, shi l'ẹnyimu Shihọ? Ọzokwanu; ?bụ gụnu bụ k'eje alị Asiriya je angụ mini, shi l'ẹnyimu Yufurétisu?

¹⁹ Ẹjo-iphe, iime bụkwa iya e-mechaa hụ̀a ngu ahụ̀hù. Ọ bụru azụ ono, ịila ono a-gbọru ngu ụja. Rịnaa ya arịri maru g'ọ dụ-beru ngu ẹji waa g'ọotsu-beru ngu l'ẹhu g'ị jịkaru Chipfu, bụ Chileke ngu; ọphu ịitsudu iya ebvu ililekpọo. Nokwa iphe, Nnajịuphu epfu bụ ono; mbụ Nnajịuphu, bụ Ọkalibe-Kakọta-Ike.”

²⁰ Ọ bụro teke dụhawaa ẹnya bẹ ị nyakafụru ishi iphe, shi segbabẹ mu lẹ ngu; mbụ l'ị nyakafụru ẹgbirigba, e shi gude tụgbabe mu lẹ ngu; bya epfua sụ l'i tii jeẹduru mu ozi! G'e lekeberu ẹnya epfu; ị wata azẹ-phe l'eli iphe, bụ úbvú, ha l'eli; mẹ l'iphe, bụkpoo mkpula eze-oshi, jaru àjàjà; gẹ nwanyị-ụkpara.

²¹ Mu kọwaru ngu g'onye kọru opfu ọkpobe vayịnu, karụ upfu bya adụebe ree. ?Dẹnukwanu g'o gude ị ghakọbeepho bya awọeru mu phọ ohu vayịnu?

²² Ọ tọ dụkwa m'obeta i gude ncha-ọkanwa saa onwongu; bya ekwokpọo ncha kwogharu iya ẹka; ikpe ono, nmarụ ngu ono rakụeru ngu phọ l'ẹhu g'ọ rakụru l'iphu mu. Nokwa iphe, Nnajịuphu, bụ Chipfu epfu.

²³ ?Dẹnu g'ii-shi sụ l'a ta tụrwukwaru ngu; ọphu ị gwọkwaru ọbvu ono, bụ Balụ? Lewarọ ẹnya l'ẹgube umere, i meru lẹ nsụda ono! Gbunaa igo l'ẹgube umere, i meru l'ẹka ono. Iphe, ị bụ bẹ bụkwa nyee ịnya-kamẹlu, ebu nggada karagidimu karagidimu. O -buru nggada ono shia ọwa-a; l'o buru iya shia ọphuu.

²⁴ Nyee nkapfụ-ịgara-ọswa, echiẹgu kwọwaru ẹhu, akpọ phẹrephere furumu; ẹka ọ dụru iphe, agụ iya ememe. Mbụ l'ọ -nọdu ana okee; ta adụdu onye alophuje iya azụ. Okee ya -nọdu achị iya; ike taa bvụdu okee ya ọbu. Ọ -bya eshi nyee ya ono okee; bẹ ọ hụmaanaru-a ẹka ọ nọ.

²⁵ Sụ-a; ta agbashị ọso gbiriri jasụ g'ọkpa swachafụ ngu; ẹkpiri akpọ ngu jegirijegiri. Obenu l'i pfururọ sụ: ?Kẹ gụnuhunu? Agwa ndu ọhozo bẹ mu yeru obu. Ọ bụru phẹ bẹ mu a-nọdu agba etso.

Ndu Ízurẹlu gbaru g'aa-nụ phẹ aphụ

²⁶ “Ọ kwa g'eekpuje onye-oshi iphu lẹ ntụ mẹ e -gude iya-a; bụ g'e kpuru ọnu-ụlo Ízurẹlu iphu lẹ ntụ. Ẹphebedua; ẹphe lẹ ndu eze phẹ; yẹe ndu-ishi phẹ; mẹ ndu-uke phẹ; mẹ ndu mpfuchiru Chileke phẹ;

²⁷ tụkoru sụ ntẹkpe, a pyịru lẹ mkpụrukpu oshi l'ọ kwa iya bụ nna phẹ. Bya asụ iphe, a pyịru lẹ mkpuma l'ọ kwa iya bụ ne, nwụru phẹ nụ. Nta-a bẹ ẹphe ghawarụ mu azụ; ẹphe ta aghaduru mu iphu. Ọle ọobujekwanuru; ẹphe -daba l'iphe-ẹhuka; ẹphe asụkwa-a gẹ mu bya adzọo phẹ!

²⁸ “?Dẹnuhunu agwa ọbu, unu gwọshiru onwunu ọbu? G'ẹphe byanụ mẹ ọ -bụru l'ẹphe a-dzọta unu mẹ unu -nọdu eje iphe-ẹhuka; kẹle ọo g'unubẹ ndu Jiuda nweberu mkpụkpu igwerigwe bụ g'agwa unu dụ-be igwerigwe.

²⁹ ?Dẹnu g'o gude unu nọdu epfu l'o nweru iphe, mu meru unu? Ee! Unu tụkoakwaru g'unu ha kwefukọtaru mu ike! Nokwa iphe, Chipfu eepfu.

³⁰ Iphe, mu chiru ndibe unu bụkwa iphe-mmanụ; g'ọ tọ bụdu l'ẹphe eye ọnu k'emezi iphe, ẹphe mesweru-a. Ogu-echi ngu sụwaru ndu mpfuchiru unu pyaapyaa g'oduma, alajashị iphe o guderu alajashị.

³¹ Unubẹ ọgbo nta; unu lenaa ẹnya ree l'opfu Chipfu, sụru: ?Mu bụjeru ndu Ízurẹlu echiẹgu; tọo alị, gbahụru tsụkiribaa? ?Dẹnu g'o gude ndibe mu nọdu epfuje sụ: ‘Anyi nwekwarụ onwanyi aghaphe g'ọ dụ anyi. Ọphu anyi abyapfutabaẹdu ngu ọzo?’

³² Nwamgbọko ?ọozohaje ịyagba iya? Tọo nwanyị, ala ji; ?ọozohaje iphe, e gude kwaa ya akwa ala ji? Obenu lẹ ndibe mu zọhawaru mu ujiku olemole, ete nweẹdu agụta.

³³ Lewarọ g'i gude achọ n-yemobu achọ iya k'ẹrengete! Mbụ l'ụnwanyi, kachakpọo adụ njọ bẹ i zichawaru iphe, iime.

³⁴ Ọo l'uwe ngu bẹ ndiphe hụmaru mee-ndzụ ndu ụkpa, adụdu iphe, ẹphe meru; l'ẹbe abụ l'i guderu phẹ l'ẹka ẹphe etsuka ụlo ngu. “I mechakpọo iphemiphe ono;

³⁵ ị nọdu epfukwarọ sụ l'ọ tọ dụkwa iphe, i mejeru. L'ẹhu tee ghukwa mu eghu l'opfu ẹhu ngu. Ọle mu e-kpekwanụ ngu ikpe; eshinu ị sụru l'ọ tọ dụdu iphe, i mejeru.

³⁶ ?Dẹnu g'o gude i tsoru aghaphe achọ g'ị gbanwee ụzo ngu. Ọ kwa g'ọ tọ dụdu iphe, ndu Asiriya dụru ike meeru ngu bụ gẹ ndu Ijiputu adụdu iphe, ẹphe a-dụ ike emeru ngu.

³⁷ Ii-mechakwa shikwaphọ l'ẹka ono vuru ẹka l'ishi lwajẹ; kẹle mu tụkowaru ndu ono, ị kpọru obu yeru ono jịka; ọphu ẹphe e-yekwarụ ngu ẹka.”