Jieremaya 17 - BAYỊBURU Izii

¹ “Iphe-ẹji, ndu Jiuda meru bụkwa iphe, e meru l'ígwè bẹ e gude kàá ya àkàkà; bya e gude iphe tụpyiru zịnguzingu dee iphe l'okwekpu ono, bụ obu phẹ; bya ede iphe lẹ mpu iphe, nọgbaa l'ẹnya ẹka ẹphe agwajẹ iphe.

² Mbụ l'ụnwu phẹ nyatachaarụ ẹnya ẹka ẹphe agwajẹ iphe; yẹe itso Ashera phẹ ono, e shi edobeje l'agụga iphe, bụkpoo oshi, jaru àjàjà; mẹkpoo l'eli úbvú úbvú, dụgbaa l'eli;

³ mẹ l'eze úbvú, nọgbaa l'ẹgbudu. Ẹku ẹku, unu kpatarụ; mẹkpoo iphemiphe, unu nweru; bẹ mu e-mekọta g'a kwaa l'ọkwata. Ono bụru aswa iphe-ẹji ono, dzuru ẹkameka l'alị unu ono.

⁴ Ọ bụru unu bẹ oo-shi l'ẹka; okiphe, mu nụkpooru unu anụnu etuphahụ. Mu e-woru unu mee ohu ndu ọhogu unu l'alị ẹka unu amadụ; kẹle unu kpatsuwaru mu iwe; ẹhu je l'e-ghu mu eghu jasụ l'ojejoje.”

⁵ Wakwa iphe, Chipfu epfu baa: Ọnu bẹ a tụru onye dakoberu nemadzụ; onye bụ ẹka ike dụ iya bụ l'ẹhu nemadzụ mmanụ; ọphu ọkpoma iya adụedu l'ẹka Chipfu nọ.

⁶ Onye ono a-dụ g'ishishi-irwu, bvuru l'echiẹgu; ọphu ọo-hụmadu teke iphe, dụ ree abya. Ọ bụru ẹka dụ kpọkoro kpọkoro kpọkoro l'echiẹgu ọbu bẹ oo-buru; mbụ alị únú, adụdu onye bu iya nụ.

⁷ Obenu l'onye dakoberu Chipfu bụ onye a gọru ọnu-ọma nụ; onye bụ iya bẹ ọ kpọru obu yeru.

⁸ Onye ono a-dụ g'oshi, e yeru l'agụga mini, chịru ọgbarabvu iya ye lẹ nggele. Ọphu ndzụ agụjedu iya mẹ anwụ nọdu echi; ẹkwo iya anọdujeepho eji hirihiri tekenteke. Ọphu ọoyojedu ọshi mẹ ọkpa-nri dụ; ọphu ọ dụdu teke ọ tọ nọdujedu amị mebyi.

⁹ “Obu nemadzụ ta adụdu iphe, ọ kadụ ẹregede. Tẹme ẹjo-iphe paa ya ẹka. ?Bụ onye sụru iya amaru?

¹⁰ Ọo mụbe Chipfu enyoje obu; tẹme mu nọdu eleje egomunggo ule; k'ọphu mu a-pfụ onyemonye ụgwo g'umere iya gbaru; mbụ g'iphe, o meru gbaru.”

¹¹ Onye akpa ẹku l'ẹregede dụ g'ọ̀kwà, kpuru l'ẹkwa, ọ tụduru; kẹle ẹku onye ono a-gwọbe iya mẹ ọ kajahaẹpho nka ẹbo. Ọ bụru l'ikpazụ iya ono bẹ ọo-bụru onye-eswe.

¹² Ụlo, anyi doberu nsọ bụ aba-eze, dụ akpabiri, o shiẹpho lẹ mbụ; bụtaru ẹka eekutse ekutse.

¹³ Gụbe Chipfu, bụ onye ndu Ízurẹlu ele ẹnya l'ẹka; iphe, bụ onyemonye, gbadoru ngu nụ bẹ ee-mechakwaa mee iphe-iphere. Ndu gharu ngu azụ bẹ ee-de ẹpha phẹ l'urwuku; noo kẹle ọo Chipfu bẹ ẹphe gbadoru; mbụ ishi mini, doru rịsaa; emeje g'a nọdu ndzụ.

Jieremaya epfu anụ Chileke g'ọ gbaa mkpu

¹⁴ Meta mu iphe, eme mu nụ; gụbe Chipfu; k'ọphu mu a-bụru onye iphe te emedu! Dzọo mu rọ; gẹ mu a-bụru onye a dzọtaru; noo kẹle ọo ngu bụ onye mu ajajẹ ajaja.

¹⁵ Iphe, ẹphe anọdujeepho epfuru mu bụ: “Dẹnuhunu iphe ọbu, Chipfu pfuru opfu iya ọbu? G'o menaa g'o pfuru iya!”

¹⁶ Mu ta agbakwarụ ọso sụ lẹ mu tee chehẹduru ngu atụru; ọphu ọ dụdu teke ẹjo mbọku gụjeru mu. Gụbedua maru l'iphe, shi mu l'ọnu fụta dabyiru ẹba l'iphu ngu.

¹⁷ Be yekwa mu ebvu! Ọ kwa ngu bụ ẹka mu agbabajẹ je anọdu ezeru ndzụ mẹ iphe-ẹhuka -bya.

¹⁸ Kpunaa ndu akpa mu ẹhu iphu lẹ ntụ! Ọphu i kwekwa g'e kpua mbẹdua iphu lẹ ntụ! Menaa g'ẹphe bụru ndu ee-ye ebvu! Ọphu i kwekwa g'e yee mbẹdua ebvu! Mee g'iphe-ẹhuka dapfuta phẹ! Gude oke ọla-l'iswi laa phẹ l'iswi!

Edobe eswe atụta unme nsọ

¹⁹ Wakwa iphe, Chipfu pfuru nụ mu baa: “Je apfụru l'ọnu-abata mkpụkpu, bụ ụzo ẹka ndu eze ndu Jiuda eshije abata shikwa iya phọ alụfu. Tụkokpoepho iphe, bụ ọnu-abata, eeshije abata lẹ Jierúsalẹmu je apfụru;

²⁰ sụ phẹ-a: ‘Unu nụmakwa Opfu Chipfu; unubẹ ndu eze ndu Jiuda; mẹkpoo ndu Jiuda l'ophu; mẹkpoo onyemonye bu lẹ Jierúsalẹmu, bụ ndu eshije ọnu-abata-a abahụ.

²¹ Wakwa iphe, Chipfu epfu baa: Unu tọnupho nwẹhu g'unu te vuje ivu l'eswe-atụta-unme; ọphu unu evujekwaru iya shia ọnu-abata Jierúsalẹmu-a.

²² Unu te shijekwa l'ibe unu vuru iphe fụta etezi; ọphu unu ejejekwa ozi ejeje ophu l'eswe-atụta-unme. Ọ bụchikwaa g'unu dobeje eswe-atụta-unme nsọ, bụ iya bụ iphe, mu sụru ndiche unu phẹ g'ẹphe meje.

²³ Obenu l'ẹphe te eyeduru ọnu; ọphu ẹphe angaduru nchị. Ẹphe woru ishi ngakobe; jịka l'ẹphe taa ngadụ nchị; ọphu ẹphe eyedu ọnu lẹ mba, mu barụ phẹ.’

²⁴ “Obenu lẹ-a; wakwa iphe, Chipfu epfu baa: ‘Ọ -bụru l'unubẹdua tọru nwẹhu angaru mu nchị l'opfu; ọphu unu evujeduru ivu abata l'ọnu-abata-a l'eswe-atụta-unme; unu -dobe eswe-atụta-unme nsọ; k'ọphu bụ l'ọ tọ dụdu ozi, unu ejeje mbọku ono;

²⁵ noo teke eze ndu nọ l'ọkwa eze Dévidi; ẹphe lẹ ndu ejeru phẹ ozi; a-wata eshi ọnu-abata mkpụkpu-a abahụ. Ẹphebedua ẹphe lẹ ndu ejeru phẹ ozi a-nọdu agba l'ụgbo-ịnya; mẹ l'eli ịnya abata lẹ mkpụkpu-a. Ndu Jiuda awụ etso phẹ; mẹkpoo iphe, bụ ndu bu lẹ Jierúsalẹmu. Noo teke ee-buru eburu lẹ mkpụkpu-a jasụ l'ojejoje.

²⁶ Ndiphe e-shi lẹ mkpụkpu, nọgbaa l'alị ndu Jiuda abya; mẹkpoo lẹ nwa mkpụkpu, nọgbaa Jierúsalẹmu mgburugburu; mẹkpoo l'oke alị ndu Benjiaminu; mẹkpoo ndu bu l'alị ọkpa úbvú, nọ l'ụzo ẹnyanwu-arịba; mẹkpoo ndu bu l'alị úbvú úbvú; mẹkpoo ndu bu l'echiẹgu ndọhali. Ẹphe egudegbaa anụ, ẹphe e-gude gwee ngwẹja-akpọ-ọku; waa ngwẹja mmanụ ọzo; mẹkpoo ngwẹja-nri; mẹkpoo ụ̀nwù-isẹnsu; mẹkpoo ngwẹja-ekele; gude abya agwa Chipfu l'eze-ụlo iya.

²⁷ Obenu lẹ teke ọ bụ l'unu te emedu iphe, mu sụru g'unu meje; k'ọphu bụ l'unu te edobejedu eswe-atụta-unme nsọ; unu -nọdu evujeru iphe abata lẹ Jierúsalẹmu l'eswe atụta unme bẹ mu a-phụ-nwu ọku, e tee menyidu emenyi l'ọnu-abata Jierúsalẹmu. Ọ bụru ọku ono a-tụko iphe, bụ alị-eze, dụ lẹ Jierúsalẹmu ono kekọta.’ ”