Jieremaya 12 - BAYỊBURU Izii

Jieremaya agụ aphụ

¹ Gụbe Chipfu; ọ tọ dụdu teke ị bụedupho onye pfụberekoto; jasụkpoo lẹ gẹ mu echi ngu opfu-a. Ọle ọ bụ; mu e-pfukwaru ngu phọ k'ikpe, pfụru ọto, iikpeje. Sụa; ?bụ gụnu kparụ iphe, ụpete agbaru ndu ẹjo-iphe l'ụzo phẹ? Mbụ-a; ?bụ gụnu kparụ iphe, ẹhu adụje ndu e gudedu ire phẹ ẹka guu?

² Ọo ngu dzarụ phẹ; ẹphe gbaa ọgbarabvu; bya evua mịahaa amịmi. Ẹphe akpụjeru ngu l'ọnu tekenteke. Obenu l'o to rwujedu phẹ l'obu.

³ Obenu lẹ mbẹdua bẹ gụbe Chipfu maru. Ịihumaje mu; tẹme ị nọdu enyochajẹ ọriri, mu arịru ngu enyocha. Kpụtanu phẹ kpụfu g'atụru, a kpụ eje egbugbu! Wonụru phẹ dobe iche kwabẹru mbọku, aa-phụ phẹ!

⁴ ?Bụ jasụ teke ole bẹ alị a-gụ aphụ gụ-beru; mbụ ẹswa, nọgbaa l'alị akpọshihukota nkụ? Ọ bụru iphe, kparụ iya nụ bụ lẹ ndu bu iya nụ bụ ndu eme ẹjo-iphe; o mee ụnwu anụ mẹ ụnwu ẹnu; ẹphe lakọta l'iswi. Ọphu kachaakpọnu bụ lẹ ndu ono bụ iphe, ẹphe epfu bụ: “Ọ tọo hụmakwa iphe, e-mechaa mee anyi.”

Ọnu, Chileke yeru

⁵ “Ọ -bụru lẹ gụ lẹ ndu gude ọkpa gbaru ọso; ẹphe lọo ngu phelephele; bụ-chia ndu ọphu gude ịnya bẹ gụ l'ẹphe sụru atụtu? Ọzo bụ lẹ-a; ọ -bụru l'ụpfu adụ ngu l'alị, adụdu iphe dụ iya nụ; ?dẹnu g'ii-shi mekọta iya l'ọswa ono, nọ lẹ mgboru ẹnyimu Jiọ́danu ono?

⁶ Mbụ-a; unwune ngu nwoke; mbụ ndu unu ẹphe shi l'unuphu lanụ; ẹphebedua deru ngu ye g'e gbua. Ẹphe woliru olu ara g'e mee ngu iphe, a-tsụru ngu nụ. Ba adakobekwa phẹ; m'obeta ẹphe nọdu epfuru ngu opfu ọma!”

⁷ “Mu gbadowaru ndu ọnu-ụlo mu. Mu gwọbewaru ndu ono, bụ okiphe mu ono. Ndu ono, dụ mu l'obu ono bẹ mu yeakwaru l'ẹka ndu ọhogu phẹ.

⁸ Okiphe mụbe Chileke ono byaakwaru bya adụ mu g'oduma, bu l'ọswa. Ọonoduje agbọru mu ụja. Ọ bụru iphe ono meru g'o gude ọ dụ mu ashị.

⁹ Ndu ono, bụ okiphe mu ono; dụwaa mu g'ẹnu, vọru kịdikidi, bụ ẹnu, erije anụ ẹnu ọzo; ụnwu-ẹnu ọzo erijekwaphọ anụ ibiya nọ-phee ya mgburugburu abya iya etso ọgu. Ẹphe je atụko iphe, bụkpoo anụ, bu l'ẹgbudu rwukọo g'ẹphe bya avụa anụ iya kpatakpata!

¹⁰ Ikpoto ndu eche atụru mebyishiwaru opfu-vayịnu mu. Tẹme ẹphe gude ọkpa zọo opfu mu pyakapyaka. Ẹguru opfu mu ono bẹ ẹphe meru; ọ bụru echiẹgu, dabyiru kẹ mmanụ.

¹¹ E meru iya; ọ bụru okorobo-ẹgu. Eshinu ọ bụ okorobo-ẹgu; ọ gụahaa aphụ rakuahaa mu. Mbụ l'alị ono l'ophu bẹ e meru; ọ bụru okorobo-ẹgu; ọphu ọ dụdu onye akpa iya ishi.

¹² Ndu mgbupya zeru gbiigbiigbi bya asọpyabe nggeregede, nọgbaa l'echiẹgu. Ogu-echi Chipfu e-shi l'ishi alị-a ishi lanụ sụa nemadzụ pyaapyaa jasụ l'ishi iya ọphuu; ọphu ọ dụdu m'onye lanụ, ẹhu adụ guu.

¹³ Ẹphe kụru witi; ọle iphe, ẹphe mechaarụ kpata bụ obvu obvu. Ẹphe sekashịru onwophẹ l'akanya; ọle ọ tọ dụdu iphe, ẹphe setarụ. Iphere iphe, ẹphe kpatarụ l'opfu phẹ nọdu adụje phẹ. Ọ bụru ẹka ẹhu eghu Chipfu eghu.”

¹⁴ Wakwa iphe, Chipfu epfu baa: “Ọ -bụru kẹ ndu iwe ono, bụ obutobu mu ono g'ẹphe ha; mbụ ndu ono, denyiru ẹka l'okiphe, mu hẹru ndibe mu, bụ ndu Ízurẹlu g'ọ bụru okiphe phẹ ono; lekwa lẹ ndu ono bẹ mu e-phefu ephefu l'alị phẹ. Mu abyakwaphọ ephefu ndu Jiuda g'ẹphe ba nọhe l'echilabọ phẹ.

¹⁵ Teke mu phefuchaẹru phẹ phọ; mu abya aphụaru phẹ obu-imemini; duphutachaa phẹ azụ nanụnanu g'ẹphe haa; g'ẹphe lwaphuta azụ l'okiphe phẹ ono;

¹⁶ gude ẹpha mu riaha angụ sụ: ‘Eshinu Chipfu nọ ndzụ g'ọ nọ iya-a’; ẹgube ono, ẹphe shiwaa zia ndibe mu ẹphe shi egudeje agwa, bụ Balụ eri angụ ono; bẹ ẹphe a-ngụkwaru angụru l'echilabọ ndibe mu.

¹⁷ Obenu teke ọ bụ l'o nweru ọha, ete ekwedu ngabẹ nchị bẹ mu e-phefukpọe phẹ phọ rengurengu woru phẹ mebyishia. Nokwa iphe, Chipfu eepfu.”