Jieremaya 10 - BAYỊBURU Izii

Chileke yẹe nshi

¹ Unu nụmakwa iphe, Chipfu epfu anụ unubẹ ọnu-ụlo Ízurẹlu!

² Wakwa iphe, Chipfu epfu baa: “Unu ta anwụkwa iphe, ndu ọhamoha eme; ọphu iphe-ọhubama, emeshi l'akpaminigwe eyekwa unu ebvu. A makwarụ-a l'ụdu iphe ono eyekwa ndu ọhamoha ono ebvu;

³ kẹle omelalị ndu ono bụ iphe, adụdu iphe, ọ bụ. Ẹphe egbutajẹ oshi l'ọswa; ndu eme ọna abya egude ayọo phẹ pyịa ya.

⁴ Ẹphe abya egude mkpọla-ọchaa mẹ mkpọla-ododo gude mee ya ọna. Ẹphe abya egude ọngu; yẹe nggu kpọbe iya g'ọ tọ mịnga amịnga.

⁵ Nshi phẹ ono dụ gẹ nwanggiri-utobo, e keberu l'ẹka a kọru iphe; mbụ l'o too pfudu opfu. Ọ bụru apata bẹ aapatajẹ iya; kẹle o to jedu ije. Unu ta atsụjekwa iya ebvu; kẹle o to mekajẹkwa iphe; ọphu ọ dụkwa iphe, dụ ree, oomeje.”

⁶ Ọ tọ dụkwa onye dụ gẹ gụbe Chipfu. Ị parụ ẹka; tẹme ẹpha ngu bẹ ike dụ.

⁷ ?Bụ onye bụ onye tege anọdudu atsụ ngu ebvu; gụbe eze ọhamoha? Ono bụkwa iphe, rwuberu ngu nụ. L'iphe, bụkpoo ndu mmamiphe, nọkota l'ọhamoha; mẹkpoo l'iphe, bụkpoo alị-eze phẹ l'ophu bẹ ọ tọ dụkwa onye dụ gẹ ngu.

⁸ Ẹphe bụkota ndu enwedu egomunggo bya abụru ndu eswe. Iphe, ezi phẹ iphe bụ ntẹkpe, a pyịru l'oshi, adụdu urwu, ọ barụ.

⁹ Ọo mkpọla-ọchaa, e tsuru ọngu bẹ e jeru eshi lẹ mkpụkpu Tashishi wota bya; yẹe mkpọla-ododo, e jeru ewota lẹ mkpụkpu Ufazu, bụcha iphe, ndu eme ọna; yẹe ndu akpụzu kpụru. Nshi ono bẹ a chịtaru uwe, dụ urwukpu-urwukpu; yẹe ọphu dụ uswe-uswe woru yee. Iphe ono bụkotaru iphe, ndu maru eme ọna meru dobe.

¹⁰ Obenu lẹ Chipfu bụ iya bụ ọkpobe Chileke. Ọ bụ iya bụ Chileke, dzụ ndzụ. Tẹme ọ bụru iya bụ Eze, a-nọ jasụ l'ojejoje. Ẹhu -nọdu eghu iya eghu; eliphe l'ophu anmahụ pyaapyaapyaa; ọphu ndu ọhamoha adụdu ike ata nshi anata oke-ẹhu-eghu iya.

¹¹ “Wakwa iphe, ii-pfuru phẹ baa: Agwa-a, abụdu l'ọo phẹ meru igwe; ọphu ọ bụdu phẹ meru eliphe-a bẹ e-mechakwaa laa l'iswi l'eliphe-a; laa l'iswi l'imigwe.”

¹² Ọo Chileke bẹ gude ike ẹka iya mee eliphe. Ọ bụru yẹbedua gude mmamiphe iya tụa ọkpa mgboko-a. Ọ bụru yẹbedua gude nkwamẹnya iya phụshi akpaminigwe.

¹³ Ọobujeru; o -dee edede l'igwe; igwe ara ọ́rà. Ọ nọdu emeje g'urwukpu shi l'ẹka igwe beru alị beru wata afụta. Ọotuje egbigwe mẹ igwe nọdu edze mini. Tẹme ọ bụru l'ọba iya bẹ ooshije ezi phẹrephere.

¹⁴ Onyemonye te nwedu egomunggo; ọphu ọ dụdu onye kwarụ ẹnya. Iphe, bụ ndu akpụ ụzu mkpọla-ododo g'ẹphe ha bẹ iphere nshi phẹ gudeakwaru. Ntẹkpe, ẹphe meru tụkoru bụru ụghoshi; g'ọ tọ bụdu l'ọotu unme l'onwiya.

¹⁵ Ọo iphe, adụdu urwu, ọ barụ; bya abụru iphe, e gude agba mgbọnu. O -rwua teke Chileke e-kpe ikpe bẹ nshi ono a-bụkotaru ọla-l'iswi.

¹⁶ Obenu l'onye ono, bụ okiphe oshilọkpa Jiékọpu ono bẹ ta abụdu nno bụ g'ọ dụ; kẹle ọo ya bụ onye meru iphemiphe dobe; mechaa mee ndu Ízurẹlu; mbụ ọkpa-ipfu ono, bụ okiphe iya ono. Onye ono bẹ ẹpha iya bụ Chipfu; bya abụru Ọkalibe-Kakọta-Ike.

Mgbu-ọnwu, e-mechaa bya nụ

¹⁷ Unu kwakọbekwa iphe unu g'unu alụfu l'alị-a; unubẹ ndu ono, ndu ọhogu unu nọ-pheru mgburugburu ono;

¹⁸ kẹle-a; wakwa iphe, Chipfu epfu baa: “Nta-a bẹ mu a-gba ndu bu l'alị-a kẹ swaramụ gbafụ mgba lanụ. Mu emee phẹ ewere k'ọphu aa-kpụ phẹ lẹ ndzụ.”

¹⁹ “Nshịo mu; kẹle e mekarụ mu iphe! Onwo, aba mu nụ bụru emeta emeta! Ọle iphe, mu epfujelẹru-a onwomu bụ l'ọ bụwaa iphe-ememe, nọ swiru mu nụ; mu je l'ataru iya nshi.

²⁰ Ụlo-ẹkwa mu bẹ e mebyishiakwaru. Eri iya bẹ a tụkoakwaru gbabushichaa. Ụnwu mu shiakwa mu l'ẹka gbakashịhu; ọphu mu l'ẹphe anọedu. Ọ tọ dụedu onye ọphu phọduru nụ kẹ g'ọo-kpọberu mu ụlo-ẹkwa ọbu ọzo; ọzokpoonu g'ọ tụaru mu nwamkpu.”

²¹ Ndu eche anyi gẹ ndu eche atụru te nwedu egomunggo; ọphu ẹphe akpajẹedu Chipfu ishi. Ọ bụru iya meru g'o gude ọphu ụpete agbaẹduru phẹ; a chịa atụru phẹ nanụnanu.

²² Unu lekwa! Nzi ọbu abyakwaa. Mbụ oke ùtsú, e-shi l'ụzo isheli etsu abya. Oo-me alị ndu Jiuda l'ọ bụru ochobu; ẹka nkụta-ọswa e-buru.

Epfupfu, Jieremaya pfuru nụ Chileke

²³ Gụbe Chipfu; mu makwarụ-a lẹ ndzụ amadụ ta abụdu nkiya; l'ọ tọ bụdu amadụ a-nọdu atụ-ziru onwiya ẹka ọo-zọ ọkpa.

²⁴ Jiko Chipfu; baarụ mu mba! Ọ kwa g'i gude ikpe, pfụru ọto mee ya. G'ọ tọ bụkwa teke ẹhu eghu ngu eghu; a nọnyakwa; i mee mu; ọphu ọ dụedu iphe, mu bụ.

²⁵ Tụ-koshi ọhamoha ono oke-ẹhu-eghu ngu; mbụ ndu ono, ekwedu nkengu ono. Tụ-koshi iya ndu ono, te ekujedu ẹpha ngu ono; kẹle ẹphe riwaru oshilọkpa Jiékọpu ripyaa. Ẹphe kewaru iya gburugburu gbẹshi; bya emebyishia alị iya, bụ ibe iya l'ophu.