Hosiya 11 - BAYỊBURU Izii

N-yemobu Chileke l'ẹhu ndu Ízurẹlu

¹ “Teke Ízurẹlu bụ nwata bẹ mu yeru iya obu shii. Ọ bụru l'alị Ijiputu bẹ mu jeru je ekua nwa mu nwoke ono.

² Obenu l'ọobujeru; mu -nọdu eku ndu Ízurẹlu ono oku; ẹphe aka mu akpịriberu ụzenya. Ẹphe nọdu anọduje agwa Balụ; bya anọdu anọduje akpọ ụ̀nwù-isẹnsu ọku anụ ntẹkpe.

³ Ọ kwa mbẹdua ziru ndu Ifuremu ije. Mu shi esetajẹ phẹ l'ẹka. Ọphu ẹphe amadụ l'ọo mbẹdua bụ onye meru g'ẹhu dụ phẹ ike.

⁴ Mu shi egudeje obu-imemini gude ehe phẹ. Ọ bụru eye obu, mu yeru phẹ bẹ mu gude edu phẹ. Mu shi ezije phẹ ivu-ẹrwa, ẹphe vu; mu ephozekpọ ephoze dee phẹ nri.

⁵ “Ẹphe e-mechaa laphu azụ lẹ Ijiputu. Ọ bụru ndu Asiriya e-mechaa bụru ishi phẹ; noo kẹle ẹphe jịkaru l'ẹphe taa lwadụ azụ alwapfuta mu.

⁶ Ogu-echi e-mechaa jeaha iphu iphu lẹ mkpụkpu lẹ mkpụkpu phẹ. Mbụ gbukashịa ọguzo-igwe, e yeru l'ọnu-abata mkpụkpu phẹ; mee iphemiphe, ẹphe chịru k'ememe; ọ tọ dụedu ọphu ẹphe eme.

⁷ Ndibe mu kebefụtaekwarupho l'ẹphe a-lụfu mu l'ẹka; mbụ-a; ọ tọ dụkwa m'obeta ẹphe kuchakpọnu onye ono, bụ Ọkalibe-kakọta-shii onoya; ọ tọ dụedu iphe, e-mekwadụ g'o kutsee phẹ ọzo.

⁸ “Sụ-a; gụbe Ifuremu; ?dẹnukpoo gẹ mu e-shi haa ngu? Gụbe Ízurẹlu; ?dẹnukpoo gẹ mu e-shi woru ngu ye ndu ọzo l'ẹka? ?Dẹnu gẹ mu e-shi mee ngu gẹ mu meru ndu mkpụkpu Adama? ?Dẹnu gẹ mu e-shi mee ngu gẹ mu meru ndu mkpụkpu Zebowimu? Egomunggo lwaakwaru mu azụ. Ọoguakwa mu agụshi mu ike g'a sụ lẹ mu phụru ngu obu-imemini.

⁹ Mu ta atụ-koshikwa ngu oke ẹhu-eghu mu; ọphu mu alwakwa azụ abya emebyishi Ifuremu; noo kẹle mu bụ Chileke; mu ta abụdu nemadzụ. Ọo mu bụ onye dụ nsọ, nọ l'echilabọ unu; ọphu mu egudekwa oke ẹhu-eghu mu abyapfuta unu.

¹⁰ “Ẹphe e-mechakwaa tsoahaa Chipfu. Mbụ lẹ mu a-sụ ekiri g'oduma. Teke mu sụru ekiri ono; ụnwu mu anmarụ pyaapyaapyaa shi l'ụzo ẹnyanwu-arịba bya.

¹¹ Ẹphe eshikwaphọ lẹ Ijiputu phụru kwẹekwee bya gẹ nwẹnu. Ẹphe adụ gẹ ndo shi l'alị Asiriya bya. Mu eworu phẹ chịkobe; ẹphe eburu l'ibe phẹ.” Nokwa iphe, Chipfu eepfu.

Iphe-ẹji, ndu Ízurẹlu eme

¹² “Ndu Ifuremu gudeakwa adzụ ụka gbaphee mu mgburugburu. Ọnu-ụlo Ízurẹlu nọdu agbaru mu ẹregede. Obenu lẹ ndu Jiuda bẹ Chileke maru; mbụ lẹ ẹphebedua bẹ Onye Nsọ ono gudekwadụ ire phẹ ẹka.”