Hiburu 3 - BAYỊBURU Izii

Jizọsu kakwaphọ Mósisu

¹ Ọo ya bụ lẹ-a; ụnwunna mu, dụ nsọ, bụ ndu a gbẹkwapho l'imigwe kua; unu rịjekponaa ọriri kẹ Jizọsu ono, bụ onye-ishi-ozi; waa onye-ishi uke Chileke mẹ a -bya l'iphe ono, anyi sụru l'ọ bụ ọkpobe-opfu ono.

² Lẹ yẹbedua goshiẹkwarupho Chileke ono, họtaru iya g'ọ bụru onye-ishi uke iya ono lẹ ya bụ onye o gude ire iya ẹka; ẹgube e gudekwaphọ ire Mósisu ẹka l'ozi, o jeru ndu ọnu-ụlo iya.

³ Ọle ọ gbakwarụ g'a ka aja Jizọsu ajaja eme lẹ Mósisu; mbụ ẹgube ono aakajẹ akwabẹ onye kpụru ụlo ùbvù; eme l'ụlo ọbu l'onwiya ono.

⁴ A makwarụ-a l'ọ tọ dụdu ụlo, abụdu nemadzụ kpụru iya; obenu l'ọo Chileke bụ onye mekwanụru iphemiphe.

⁵ Sụ-a; Mósisu bụekwapho onye-ozi kpụ. O goshiru Chileke lẹ ya gbaru g'e gude ire iya ẹka l'ozi, o jeru ndu Ízurẹlu l'ophu, bụ ndu ọnu-ụlo Chileke. Ọ bụru iya goshiru iphe, Chileke mechaarụ mee l'iphu.

⁶ A byakwanụ lẹ Kéreshi; ọ bụru Nwa, eleta ụlo Nna iya ẹnya. Nna iya ono bụ Chileke. O goshikwaphọ Chileke l'o gude ire iya ẹka. Ọ bụru anyi bụ ọnu-ụlo Nna iya ọbu mẹ ọ -bụru l'ọkpoma shihuru anyi ike; anyi dobe obu l'iphe ono, anyi ele ẹnya iya ono.

Chileke e-me gẹ ndu nkiya tụta unme

⁷ Unme-dụ-Nsọ pfukwaru sụ: “Teke unu nụmaru olu iya ntanụ-a;

⁸ unu ta akpọ-chikwa obu unu gẹ ndiche unu phẹ shi kpọ-chia ya teke ono ẹphe kwefuru iya ike l'echiẹgu; teke ono, ẹphe shi anọduje ahụ mu ama onoya.

⁹ Ọ bụru l'ẹka ono bẹ ndiche unu phẹ nọru hụa mu ama; bya adalekwaa mu phọ adale; l'ẹka ẹphe hụmakwaru-a iphe, mu meru l'ime ụkporo apha labọ.

¹⁰ Ọ bụru iphe ono meru g'o gude ọgbo teke ono mee ẹhu ghua mu eghu mu sụ: ‘Ndu-a bẹ egomunggo phẹ jephuhuakwaru ejephuhu; ọphu ẹphe amadụ iphe, mu sụru g'e meje.’

¹¹ Ọ bụru iya bụ l'ẹphe akpatsu oke-ẹhu-eghu mu; mu ria angụ sụ: ‘Ẹphe ta abyadụ anọdu l'ọkpoku mu.’ ”

¹² Ọo ya bụ; ụnwunna mu; unu kwabẹkwaru onwunu ẹnya g'ọ tọ dụ onye ẹjo ọkpoma a-dụ l'echilabọ unu; ọphu ọ dụ onye a-bụru onye te ekwetajẹdu iphe, Chileke epfu; shi nno haa etsoru Chileke ono, bụ ọphu dzụ ndzụ ono.

¹³ Ọ chia iphe, unu a-nọdu eme bụ g'unu pfushijeru nwibe unu opfu ike mbọku-mbọku, a gbẹshikpowaru kua “Ntanụa” g'ẹphe haa iphe-ẹji g'ọ tọ dụ onye iphe-ẹji e-dephu.

¹⁴ L'anyi tụkokwaru bụru ndu ẹphe lẹ Kéreshi tụkoru gbarụ mgba l'iphe nkiya mẹ ọ -bụru l'anyi pfụ-shikpọerupho ike l'iphe ono, anyi shi lẹ mbụ dobe ọkpoma ono jasụ l'ikpazụ.

¹⁵ Eshinu e deru sụ: “Teke unu nụmaru olu Chileke ntanụ ọwa; unu ta akpọ-chikwa obu unu gẹ ndiche unu phẹ shi kpọ-chia ya teke ono, ẹphe kwefuru iya ike ono.”

¹⁶ ?Bụ ndu ole bẹ nụmabebecharu olu Chileke ono bya ekwefukwaru iya phọ ike? ?Tọ bụedu ndu ono, Mósisu dufutaru l'alị Ijiputu onoya?

¹⁷ ?Bụ ndu ole bẹ kpatsukpọerupho Chileke ẹhu eghu ụkporo apha labọ? ?Tọbudu ndu meru iphe-ẹji; e mechaa odzu phẹ dakaa l'echiẹgu?

¹⁸ ?Bụ ndu ole bẹ o riru angụ sụ l'ẹphe ta abyadụ anọdu l'ọkpoku iya-a? Tọbudu ndu ono, ekwedu eme iphe, o pfuru onoya.

¹⁹ Ọ n'iya bụ l'anyi hụmawaru l'o to kwedu g'ẹphe nọdu l'ọkpoku iya kẹle ẹphe te ekwedu mee g'o pfuru.