Hiburu 1 - BAYỊBURU Izii

Opfu, Chileke shi l'ọnu Nwa iya epfu

¹ Lẹ teke k'azụ bẹ Chileke shi l'ọnu ndu mpfuchiru iya pfuru nụ ndiche anyi phẹ ugbo olemole l'ụzo, dụgbaa iche iche.

² O be lẹ nta, bụwaa ikpazụ-a; ọ bụru onye bụ Nwa iya bẹ o gude pfuru nụ anyi. Ọ bụru l'ẹka Nwa iya ono bẹ ọ gbẹ mee mgboko mgburugburu; tẹme ọ họtakwa iya phọ sụ l'ọo ya bẹ iphemiphe kụru ishi l'ẹka.

³ Nwa ono egbu nwịinwii; shi ẹgube ono egoshi l'o nọepho gẹ Chileke egbu nwịinwii bụ ono; tẹme ọ bụerupho gẹ Chileke dụ bụ g'ọ dụkota kpamu. Opfu, Nwa iya ono pfuru ereshi ire ike. Ọ bụru ire ono, oore ono bẹ o gude gudeshia mgboko mgburugburu. Ọ safụchaaru ndiphe iphe-ẹji phẹ; ọ gbẹshi je anọdu anọo l'imigwe l'ẹkutara Chileke, bụ iya bụ onye ono, kakọta ike.

Nwa ono ka ojozi-imigwe

⁴ Nwa ono bẹ Chileke meru; ọ nyịbekota ụnwu-ojozi-imigwe; ọ bụkwarupho ẹgube ono bụ g'ẹpha, Chileke gụru iya dangokwaruphọ ẹpha k'ụnwu-ojozi-imigwe.

⁵ Lẹ-a; ?bụ ojozi-imigwe ole bẹ Chileke sụjeru: “Ọo ngu bụ Nwa mu nwoke. E -shi ntanụ-a bẹ mu bụwaa Nna ngu.” Ọzo bụru: “Mu a-bụru iya Nna; l'ọo-bụru mu Nwa.”

⁶ Tẹmanu kwaphọ teke Chileke dubataru Nwa iya ono, bụ ọkpara iya ono lẹ mgboko bẹ ọ sụru: “G'iphe, bụkpoo ụnwu-ojozi-imigwe kẹ Chileke l'ophu bakọtakwaru iya ẹja.”

⁷ A bya l'ẹka k'ụnwu-ojozi-imigwe; ọ bụru iphe, Chileke pfuru bụ: “O meru ụnwu-ojozi-imigwe iya ẹphe bụru phẹrephere; bya emee ndu-ozi iya ẹphe bụru ọku, enwu phoophoophoo.”

⁸ A byakwanụ lẹ kẹ Nwa Chileke ọbu ọ sụ: “Aba-eze ngu gụbe Chileke a-nọ ojejoje. Ọ bụru apfụbekoto a-bụru mgbọro-onye-eze, ii-gude bụru eze ọbu.

⁹ Iphe, pfụru ọto dụ ngu ree; iphe, apfụduru-ọto dụkwanu ngu ashị. Noo g'o gude Chileke ono, bụ Chileke ngu ono họta ngu; bya akwabẹ ngu ùbvù; mee ẹhu nọdu atsọ ngu ụtso; ùbvù mẹ ẹhu-ụtso ọphu kwata ka kẹ ndu unu l'ẹphe gba nanụ shii.”

¹⁰ Ọzo bụru; “E -shikpọo lẹ mbụ bụ gụbe Nnajịuphu meru alị mee iphe, nọ iya nụ; tẹme ọ bụru ngu gude ẹka ngu mee igwe; bya emee iphemiphe, nọ iya nụ.

¹¹ Iphemiphe ono e-mechaa mebyishihukọta; obenu lẹ gụbedua l'a-dụ g'ị dụ. Iphemiphe ono e-mechakwaa kashịhu g'uwe.

¹² L'ịipyakobe phẹ g'a pyakọberu ukpo; woru phẹ gbanwee g'a gbanweru uwe. Obenu lẹ gụbedua bụepho onye ị bụ bẹ ị bụ; Ị nọwaa g'ịi-nọdu jasụ lẹ tuutuutuu lẹ mịimiimii.”

¹³ Tọo ?bụ ojozi-imigwe ole bẹ Chileke sụjeru: “Nọdu mu l'ẹkutara jasụ teke mu e-me ndu ọhogu ngu g'ẹphe bụru iphe, ịi-zọpyabe l'ọkpa?”

¹⁴ Sụ-a; ?bụ gụnu bẹ ụnwu-ojozi-imigwe bụkpoo? Ẹphe tụkoru bụru ụnwu-ojozi, a taa hụmadu l'ẹnya, ejegbaaru Chileke ozi; bya abụru ndu Chileke yeru g'ẹphe bya eyeru ndu oo-mechaa dzọta ẹka.