Ẹkwo Ẹtu 9 - BAYỊBURU Izii

Mmamiphe eku oku; emeswe nọdu eku

¹ Mmamiphe gbẹshiru je eworu itso ẹsaa kpọbe gude mee ụlo iya.

² Ọ bya egbua anụ shia dobe bya agwaa mẹe dobe; bya eshia ite dobe;

³ bya ezia ụnwumgboko, ejeru iya ozi; ẹphe je apfụru eku oku. Ẹka bụ ẹka kachaa l'eli lẹ mkpụkpu bẹ ẹphe pfụru eku oku sụ:

⁴ “G'iphe, bụkpoo ndu amazidu iphe bata l'ụlo l'ẹka-a!” O be lẹ ndu enwedu egomunggo; ọ sụ phẹ:

⁵ “Unu bya eria nri, mu shiru dobe; ngụa mẹe, mu gwarụ dobe.

⁶ Unu haa b'e nwe egomunggo ono bya anọdu ndzụ! G'iphe dojenụ unu ẹnya!

⁷ Onye abarụ onye mgbọnu mba bụkwa onye e-phu iya iphu bẹ ọocho. Onye alọkwanu onye ẹjo-iphe ẹka lẹ nchị bụkwarupho ọkonu bẹ ooku oku.

⁸ Ta abajẹkwaru onye mgbọnu mba; ọdumeka bẹ ọokpokwa ngu ashị. Bachịru onye maru iphe mba; hụma l'oo-ye ngu obu.

⁹ Lọoru onye maru iphe ẹka lẹ nchị hụma l'ọo-kabaa amaru iphe eje. Zia onye pfụberekoto iphe hụma l'oo-yekwabaa iphe l'iphe, ọ maru.

¹⁰ L'ọ kwa atsụ Chipfu ebvu bụ egbube ishi mmamiphe. Amaru onye ono, dụ nsọ ono bụru iphe edo ẹnya.

¹¹ Kẹle ọo mụbe mmamiphe e-me g'ị kaa nka. Mbụ-a; mu e-me g'e yekwabaaru ngu apha l'apha olemole i gege anọ l'eliphe-a.

¹² Ị -maru iphe; mmamiphe ngu ono ebua ngu nggo. Teke ị bụkwanu onye mgbọnu; l'ọ bụru gụbedua l'onwongu e-je iphe-ẹhuka iya.”

¹³ Olu kẹ nwanyị ono, bụ iya bụ eme-eswe nọdu adakwaphọ adashị ike. Ọ bụ onye a hụ̀duru ahụ̀hù; tẹme ọphu ọ madụ iphe.

¹⁴ Yẹbedua je anọdu l'ọnu-abata ibe iya; mbụ l'okposhi, o doberu l'ẹka kakọta l'eli lẹ mkpụkpu.

¹⁵ Noo ẹka ọ nọ eku iphe, bụkpoo ndu aghata aghata; ndu pfụberuro ije phẹ nhamụnha eje iphe, ẹphe eje. Ọ sụ phẹ:

¹⁶ “G'iphe, bụkpoo ndu amazidu iphe bata l'ụlo l'ẹka-a!” O be lẹ ndu enwedu egomunggo; ọ sụ phẹ:

¹⁷ “Mini, e zitaru l'oshi adụjekwa ree. Ọ bụru nri, e riru lẹ mpya kachaa ụtso!”

¹⁸ Ọphu ẹphe amaswetakpọdaa amama ophu l'ụnwu-maa dọru l'ẹka ono; lẹ ndu byaru iya ẹbyaa nọwaa l'alị-maa anọno.