Ẹkwo Ẹtu 8 - BAYỊBURU Izii

Mmamiphe eku ngu oku

¹ ?Tọbudu oku bẹ mmamiphe eku ẹgube phọ? Mbụ ?tọ bụdu olu nkwamẹnya ada g'ọoda phọ?

² Ọo l'ẹka dụ ephekerephe, nọ l'agụga gbororo; mbụ lẹ mgbakata-ụzo bẹ o jeru je apfụru.

³ Ọ pfụru l'agụga ọnu-abata ẹka eeshije abahụ l'ime mkpụkpu ono. Ọo l'ọnu mgbo mkpụkpu ono gẹdegede bẹ ọ pfụru echi mkpu sụ:

⁴ Ọ kwa unubẹ nemadzụ l'ophu bẹ mu eku; mbụ l'ọo ndiphe g'unu ha bẹ mu akpọru okwe.

⁵ Unubẹ ndu enwedu egomunggo; g'iphe dojenụ unu ẹnya! Unubẹ ndu eme eswe; unu kwanaa ẹnya!

⁶ Unu ngabẹ nchị; kẹle iphe, mu epfu bụkwa ọkpobe iphe. Mu sakwarụ ọnu k'epfu iphe, pfụru nhamụnha.

⁷ Iphe, mu epfuje bụ ire-lanụ; kẹle ẹjo-iphe adụjekwa mu ashị.

⁸ Iphe, bụ opfu, shi mu l'ọnu bụkota opfu, pfụru ọto. Ọ tọ dụdu opfu, gberu nggọ; ọzoo ọphu apfụduru-ọto, eshije mu l'ọnu.

⁹ Onye iphe edoje ẹnya maru lẹ g'ọ hakọta pfụru ọto. Ndu maru iphe bẹ maru l'opfu ono pfụgbaaru nhamụnha.

¹⁰ Hakwa mkpọla-ọchaa; hatachia mba, mu abarụ ngu! Mmamiphe kakwa ọkpobe mkpọla-ododo ree!

¹¹ Kẹle mmamiphe kakwa mkpuma, aswa dụ ere ire. Ọ tọ dụkwa iphe, agụje nemadzụ ẹgu enweru mẹ nanụ, aa-nọdu atụ eyeru iya.

¹² Mụbe mmamiphe bẹ yẹe nkwamẹnya bukwa l'ẹka lanụ. Amaru iphe yẹle eye ọnu l'opfu tụkokwaru bụru mu nwe iya.

¹³ Atsụ Chipfu ebvu bụkwa akpọ ẹjo-iphe ashị. Iphe, dụ mu ashị bụkwanu eku-onwonye yẹe etu onwonye ọphushugbu; yẹe eme ẹjo-ememe; waa epfu iphe, apfụduru-ọto.

¹⁴ Ọkpobe idzu yẹe mmamiphe bụ nkemu. Nkwamẹnya yẹe ike bụkwarupho nkemu.

¹⁵ Ndu eze gude mụbe mmamiphe nọdu l'aba-eze phẹ. Ndu-ishi gude mu atụ ekemu, pfụru nhamụnha.

¹⁶ Ọo mu bẹ ndibe ndu eze gude nọdu l'aba-eze phẹ; mẹkpoo iphe, bụkpoo ndu ha shii, nọkota l'ọkwa bụru ishi ụnwu-eliphe.

¹⁷ Ndu yeru mu obu bẹ mu yekwarụ obu; tẹme ndu achọ mu nụ achọshi mu ike je l'achọta mu.

¹⁸ Enweru iphe; yẹe akwabẹ ùbvù bụkota nkemu. Ẹku, a-nọ jasụ l'ojejoje; waa apfụbekoto tụko nọdu mu l'ẹka.

¹⁹ Urwu, eeritajẹ lẹ mbẹdua kakwa ọkpobe mkpọla-ododo ree; tẹme iphe, mu agbatajẹ tukobe onwomu kakwaphọ ree eme l'ọkpobe mkpọla-ọchaa.

²⁰ Ụzo, mu eshije bụ ụzo apfụbekoto. Ọ bụru gbororo k'ikpe, pfụru nhamụnha bẹ mu etsoje.

²¹ Ndu yeru mu obu bẹ mu emeje g'ẹphe baa ụba; tẹme mu nọdu emeje g'ụlo-ẹku phẹ ji ejiji.

²² Ọo mụbe mmamiphe bẹ Chipfu vuchakpọo ụzo nweru; tẹme ọ wata eme iphemiphe ono, o meshiru lẹ teke ndiche ono.

²³ A họtahawaru mu rọ teke aama; mbụ lẹ mbụlembukpoo; tẹme e meje mgboko.

²⁴ Teke oke-ẹnyimu teke adụkpodanu bẹ mu nọhawa; mbụro teke ọgba, mini jiru ejiji eteke eshidu dụ.

²⁵ Tẹme e mee úbvú úbvú dobegbaa l'ọnodu iya; mbụ tẹme e mee úbvú, hagbaa nwanshịi bẹ mu nọhawa.

²⁶ Tẹme Chipfu mee eliphe-a l'ophu; yẹe obotẹgu, dụ iya nụ; mbụkponu tẹme e mee urwuku, jiru mkpoji-ẹka.

²⁷ Mu nọkwa l'ẹka ono teke o meru igwe dobe; mbụ teke o meru akpaminigwe; o phoze je agẹbe ọnu l'oke-ẹnyimu.

²⁸ Teke o meru urwukpu dobe; bya edobegbaa ọgba ọgba, mini ime alị shi asọfuta lẹ mgboko.

²⁹ Teke ono, ọ kparụ eze-ẹnyimu oke; k'ọphu bụ lẹ mini ta asọghatadu ẹka ọ sụru g'ọ sọ-beru; mbụ teke ono, ọ tụru ọkpa eliphe-a l'ophu;

³⁰ bẹ bụkwa mụbe mmamiphe bụ nnajịuphu, shi nọdu iya lẹ mgburẹku emeru iya ọna. Mu meru; ẹhu nọdu anọduje atsọ iya ụtso mbọku-mbọku; tẹme mu shi anọdujekwapho ete ẹswa l'iphu iya mkpụrumkpuru.

³¹ Mụbe mmamiphe bẹ mgboko, o meru shi emeje; ẹhu-ụtso eji mu obu; tẹme ndiphe l'ophu nọdu adụjekwa mu phọ ree.

³² Ọo ya bụ; unubẹ ụnwu mu; unu ngabẹnuru mụbe mmamiphe nchị. Ẹhu-ụtso bẹ a gọru nụ onye etso ụzo mu.

³³ Unu ngabẹ nchị nụma mba, mu abarụ unu; g'unu amaru iphe! B'e wokwaru iya hua l'alị!

³⁴ Ẹhu-ụtso bẹ a gọru nụ onye ngabẹru mu nchị l'olu; onye anọduje l'ọnu mgbo ibe mu eche nche mbọku-mbọku; mbụ onye anọduje l'ọnu-ụlo mu ngabẹru mu.

³⁵ Kẹle onye chọru mụbe mmamiphe chọta bụkwa ndzụ bẹ ọ chọtaru; tẹme onye ono bụwaru onye tụbaru Chipfu l'ẹnya.

³⁶ Obenu l'onye jịkaru achọ mụbe mmamiphe bụkwa onwiya bẹ oometa iya. Iphe, bụkpoo onye mu dụ ashị bụkwa ọnwu bẹ o yeru obu.