Ẹkwo Ẹtu 7 - BAYỊBURU Izii

Ọkwa, aanmaru ndu ejeje kẹ nwanyị-ụkpara

¹ Nwa mu; meje olu mu! Woru iphe, mu sụru g'i meje kwachia akwachi l'ime obu ngu!

² Ị -nọdu emewaa iphe, mu sụru g'i meje bẹ ịi-nọdu ndzụ. Ọo g'iiletajẹ ẹnya l'akpụru-ẹnya-oji ngu-a bụ g'ii-leta iphe, mu ezi ngu ẹnya.

³ Gbaru iya l'ẹka g'ọ bụru ngu echi mkpụshi-ẹka! L'i woru iya dee edede l'ime obu ngu!

⁴ Kua mmamiphe nwune ngu nwanyị! L'i kua nkwamẹnya onye gụ l'iya bụ ndu unuphu!

⁵ Ọo phẹ a-nọdu ephufuje ngu l'ẹka nwanyị-ovuọba; mbụ l'ẹka nwanyị-ụkpara, opfu ọnu iya akwọ tẹretere.

⁶ A sụ ngu lẹ-a; mu gbẹ lẹ windo ụlo mu lee ẹnya; mbụ-a; mu gbẹkwa lẹ windo ụlo mu pyofu ẹnya l'etezi;

⁷ mu hụma l'echi ẹka ndu amadụ iphe dọru; mbụ l'echilabọ ụnwokorobya; l'o nweru onye ọphu egomunggo swehuru.

⁸ Yẹbedua tsoru gbororo eje eshita ẹka nwanyị ovuọba ono bu; mbụ gha iphu eje l'ụzo ẹka ụlo nwanyị ono nọ.

⁹ Teke ono bụ ụzenyashi; gẹ nchi ejihuwaa; mbụ g'ọchii atukpuwa ẹhu.

¹⁰ Tọbudu iya bụ; nwanyị lanụ fụta byapfutashịa ya; kwaa akwa nwanyị-ụkpara; tẹme ẹregede jikwa iya phọ obu.

¹¹ Nwanyị ọbu bẹ anọduje atụ kwokwokwo; tẹme ọphu ọ dụdu onye ookweje g'ọnu iya rwu iya l'ẹhu; ọphu íkè etsupfuduru iya l'oshi.

¹² Teke i shiru ụzo gbororo; l'ị hụma iya. Ị -lụfushia l'edupfu-ọha l'ọ nọduwa iya. Oowojeru onwiya tsụkpaa l'ẹkameka.

¹³ Noo ya; ọ bya eduta nwokorọbya ono bya anma iya akpa; bya eworu iphu gbua teterete ghaaru iya iphu sụ iya:

¹⁴ “Anụ, mu bọtaru lẹ ngwẹja-ẹhu-guu, mu shi je egwegwe nọkwa l'unuphu; noo kẹle ọ kwa ntanụ-a bẹ mu meẹbekotaru iphe, mu riburu angụ lẹ mu e-me.

¹⁵ Ọo iphe ono meru g'o gude mu fụta bya ele ẹnya ngu. Nta-a bẹ mu chọwaru ngu jasụ mu hụma ngu!

¹⁶ Iphe-azẹe mu bẹ mu gudewaa ẹkwa, tụru iphe poopoo dozia; mbụ ẹkwa, e kwerurọ lẹ Ijiputu.

¹⁷ Iphe-azẹe mu bẹ mu wụkotaru manụ, eshi kwẹekweekwee. Mu wụru iya mẹru; yẹe alowe; waa sinamọnu.

¹⁸ Bya g'anyi zẹe l'ibe mu gbiriri jasụ l'ụtsu! Bya g'anyi kwaa gude mee g'ẹhu tsọo anyi ụtso.”

¹⁹ Ji mu ta anọkwa l'unuphu. O jeru ẹka kwatakpọo dụ ẹnya.

²⁰ Ẹda, ooyeje okpoga bẹ o yejiru okpoga eyeji wota gude jeshia; k'ọphu bụ l'ọ -bya alwa bẹ ọnwa e-dzuakwanụ edzudzu.

²¹ O gudeẹpho epfu opfu ẹrengete ono gbiriri jasụ ọ jịta iya. Ọ bụru ire iya, akwọ tẹretere ono bẹ o gude dephua ya.

²² Teke ono teke ono o phukuru tsoru iya g'eswi, a kpụ eje egbugbu; ọzoo g'ele, eje adalahụ l'ọ́nyà;

²³ jasụ apfụ bụru iya lẹ meji pụrumu; mbụ g'ẹnu, ephe eje ala l'ẹka a gbabẹru ọ́nyà, ata makpọdanu lẹ ndzụ iya tsewaru l'ọnu ẹta.

²⁴ Ntamanụ-a; unubẹ ụnwu mu; unu ngabẹru mu nchị! Unu tọgbokwa nchị g'iphe, mu epfuru unu bahụ iya!

²⁵ Unu te ewojekwaru obu unu ziberu nwanyị ono; ọphu unu ekwekwa g'o duswee unu ụzo; duru unu lashịa ụzo, ooshi.

²⁶ Kẹle ikpoto nemadzụ bẹ o chitaakwaru tụa; tẹme ndu o gburu egbugbu dụkwapho igwerigwe.

²⁷ Ụlo iya bụ gbororo ụzo alị-maa. Ụzo ono kwasẹkpoerupho gbiriri jasụ l'ime mkpuru ẹka ọnwu gbaru iphe-azẹe buru.