Ẹkwo Ẹtu 6 - BAYỊBURU Izii

Ọkwa, aanmaru onye eme eswe

¹ Nwa mu; ọ -bụru l'ị narụ nemadzụ ibe ngu mkpalẹka; ọ -bụru l'i woru onwongu sụberu onye ọzo l'itumo;

² ọ -bụru l'opfu ono bụwaa ọ́nyà nmaa ngu; mbụ l'opfu, shi ngu l'ọnu bụwaa igbudu tụ ngu;

³ wakwa iphe, ii-me baa; nwa mu; g'i nweru onwongu; eshinu ị dabawaru l'ẹka obutobu ngu. Je ewoze onwongu alị; rwọkpoepho obutobu ngu jasụ l'ị rwọ-buta iya.

⁴ B'ekwekwa gẹ mgbẹnya zinwuta ngu ẹnya! Ọphu i kwekpọkwanu g'o shita ẹka ị nọ eshita ophu!

⁵ Kukebe ẹhu dzọo onwongu gẹ mgbada adzọje onwiya l'ẹka ndu achị nta; mbụ g'ẹnu, ephe l'eli, a nmataru l'ọ́nyà; e mechaa ọ nahụ.

⁶ Jekubenụ ụnwehu; gụbe onye ẹnyiru! Gbua igo l'iphe, oome gude maru iphe!

⁷ Lenu l'ụnwehu te nwedu onye-ishi; ọphu ẹphe enwedu onye edu phẹ nụ; ọzoo onye agbapheje ozi, ẹphe eje;

⁸ ọle ọo bụjeru; o -rwua l'ọnanwu; l'ookukebe ẹhu seta nri; mbụ lẹ ndiphe -nọdu ebu ereshi; yẹbedua apakọ nkiya.

⁹ ?Bụ teke ole bẹ ịi-zẹkpo ẹgube ono zẹ-beru; gụbe onye ẹnyiru? ?Bụ teke ole bẹ ii-tehu lẹ mgbẹnya ọphu iiku?

¹⁰ Ịisuje l'ọ kwa-a g'i kuta mgbẹnya nwanshịi; mbụ g'i dobe ishi l'oshi ilile; mbụ l'ọ kwa-a g'i jiru ẹka ye l'iphu ụtapfu tụta unme nwanshịi; tẹme l'ị gbẹshi je aharu ẹhu ngu zọo ọkpa.

¹¹ Ọle g'ị makwarụ l'ọkpa-nri a-fụkwaru ngu g'onye ndu abalidebvu byaru ibe iya; mbụ l'ụko-iphe akwatakwa ngwọgu byapfuta ngu.

¹² Unu ngabẹ nchị gẹ mu pfuaru unu kẹ mkpọkoro nemadzụ; mbụ onye ẹjo-iphe; onye bụepho opfu, gberu nggọ bẹ oogudeje tsoru aghaphe;

¹³ onye anọduje ataburu nwibe iya ẹnya; tẹme ọ nọdu egudeje ọkpa eme iphe-ọhubama; bya ajajẹru nwibe iya ẹka.

¹⁴ Onye egudeje ẹregede, dụ iya l'obu chịa ìdzù eme ẹjo-iphe; tẹme ọ nọdu anọduje akpa opfu.

¹⁵ Noo g'o gude eze-iphe-ẹhuka je atụ iya l'ụpfu. A -bya ajị ẹnya birimu bẹ ee-mebyiwa iya k'ọphu e tee mekọtabaedu iya.

¹⁶ Ọ dụru iphe ishii, dụ Chipfu ashị; mbụ ụzo iphe ẹsaa, bụ ẹbyi l'iphu iya.

¹⁷ Iphe ono bụ: eku-onwonye; adzụ ụka egbu ndu adụdu iphe, ẹphe meru;

¹⁸ arị k'eme ẹjo-iphe; ekwo gburumu gbaba l'eme ẹjo ememe;

¹⁹ agba ekebe ẹregede; mbụ onye opfu, eshije iya l'ọnu abụkotajeru ụka; waa akpa opfu l'unuphu.

Anma ọkwa eri ogori

²⁰ Nwa mu; mejekwa iphe, nna ngu sụru g'i mee; ọphu ị zọhakwa eme iphe, ne ngu ziru ngu.

²¹ Kee ya kpụkpurukpu l'obu ngu g'ọ nọo ojejoje! L'i wokwaru iya phọ tụkpoo onwongu l'olu!

²² Noo kẹle ị -nọdu eje ije; bụ iya a-nọdu edu ngu. Ị -nọdu eku mgbẹnya; bụ iya a-nọdu eche ngu nche. Ọ -bụru l'i tehuru nwụru ẹnya; l'oopfu eyeru ngu.

²³ Kẹle iphe, a sụru g'i meje ono bụ orọku; tẹme iphe ono, e ziru ngu ono bụru ìphóró; tẹme mba, a barụ ngu gude gbọoru ngu ụja bụru ụzo ndzụ.

²⁴ Ọo ya e-phufuje ngu l'ẹka ẹjo nwanyị ono nọ; bya abụru iya e-selajẹ ngu azụ l'ẹka ọ nọ mbụ nwanyị-ụkpara, opfu iya anọduje akwọ tẹretere.

²⁵ Gẹ mma, nwanyị ụkpara ama te emekwa g'ọ wata ngu agụgu l'ime obu ngu! Ọphu i kwekwa g'o gude ẹnya deritaru ngu!

²⁶ Kẹle nwanyị-ụkpara bẹ bụkwa g'ị bụru onye mmanụ bẹ oomeje. Mbụ-a; nwanyị, eri ogori bụkwa ishi ndzụ ngu bẹ ọonoduje achị nta iya.

²⁷ ?O dụru onye a-gụta ọku kpọbe onwiya l'ụtapfu; g'ọku te eke uwe iya?

²⁸ Mbụ-a; ?ọ dụru onye e-je ije l'eli ovokọku; g'ọku ta ahụ iya l'ọkpa?

²⁹ Nokwa g'onye yẹe nyee nwibe iya akwa dụ bụ ono. Onye denyiru nyee nwibe iya ẹka bẹ a taa hakwa kẹ mmanụ!

³⁰ Ndiphe te epfubyishijekwa onye ẹgu eme; m'ọ tụgbua je ezita nri, oo-ri.

³¹ Ọle ọ -bụru l'e guderu iya bẹ ọ tọo kpọshijekwa g'ọ tọ pfụ ụgwo iphe ono, o zitaru ono mgbo ẹsaa; m'obetakpọru o je l'atụko iphe, dụ l'ụlo iya reshigbua gude pfụa ya.

³² Obenu l'onye jepfuru nyee nwibe iya bẹ egomunggo swehuru; kẹle onye eme nno bụ onwiya bẹ oomebyishi.

³³ Urwu, ooritajẹ iya bụ ẹka-nchị yẹe iphe-iphere, eemeje iya; tẹme ujikputeru, o meru onwiya bụru iphe, e te hufubaẹdu ehufu.

³⁴ Kẹle ọo okophoo-nwanyị akpatsuje nwoke ẹhu-eghu; ọphu ọophujedu obu-imemini; m'ọ bya emelata onye jepfuru nyee ya.

³⁵ Ọphu ọ dụdu iphe, e gude arwọ iya dụru ọphu ọ bya anata; tẹme ọphu ọ dụdu m'obeta ị nụ iya gụnu g'o nworu kẹ mmanụ, ọ bya iya ebyi ẹka.