Ẹkwo Ẹtu 5 - BAYỊBURU Izii

Anma ọkwa eri ogori

¹ Nwa mu; kwata ngabẹru mmamiphe nkemu nchị. Woru nchị pfube epfube nụma opfu nkwamẹnya, mu epfu anụ ngu;

² k'ọphu ịi-maru eye ọnu l'o rwuberu iya; tẹme opfu, shi ngu l'ọnu egoshi l'ị maru iphe.

³ Kẹle opfu, shi nwanyị, eme ẹji l'ọnu bẹ anọduje atsọ gẹ manụ-ẹnwu; mbụ l'ọokwo tẹretere gẹ manụ-ụrwazi.

⁴ Ọle o -rwuẹpho l'ikpazụ iya l'ọ tsọahaa g'age; tsụahaa nkọ g'ogu, atsụ nkọ iphu labọ.

⁵ Onye tsoru iya nụ laakwaru maa. Ụzo iya edubajẹ nemadzụ l'ilu.

⁶ Ọ tọo kpajẹdu ishi etsoru ụzo ndzụ. Ụzo iya l'ophu dụkotaepho nggọdogo nggọdogo; ọphu ọ madụ.

⁷ Noo g'o gude mu sụ unubẹ ụnwu mu g'unu ngabẹru mu nchị. G'ọ tọ dụkwa teke unu a-ha iphe, mu pfuru meahaa ọzo.

⁸ G'ụzo, ịi-nọdu eshi bụkwaru ụzo, nọ iya ụzenya. B'e shiswetakwa ụzo ọnu-mgbo ụlo ibe iya;

⁹ a -nọnyaa i woru ùbvù, rwuberu ngu nụ haarụ ndu ọzo; bya eworu ndzụ ngu tọgboru onye enwedu obu-imemini;

¹⁰ mbụ a -nọnyaa ndiphe bya ebvukaa ẹku ngu; ọo ya bụ; akanya, i seru awụru laa ibe onye ọzo.

¹¹ Tẹme ndzụ ngu bvụjeepho l'ị tsụahaa ude; mbụ teke akpọ-ẹhu ngu mẹ ogwẹhu ngu a-gbajọshihukota.

¹² Noo teke ịi-sụ: “?Dẹnuanu g'o gude e shi alọ mu ẹka lẹ nchị; ọphu mu agụbejedu iya iphe; mbụ e shi abajẹru mu mba; ọphu o rwujedu mu l'ẹhu?

¹³ Ndu ezi mu iphe bẹ mu jịkaru lẹ mu te emedu iphe, ẹphe shi ezi mu; ọphu mu eshidu eyeje ọnu yeru onye shi akpọ-zijeru mu ụzo.

¹⁴ Nta-a bẹ mu abyawaa abụru onye larụ l'iyi l'edzudzu-ọha.”

¹⁵ Mbụ-a; gẹ nyee ngu bụru ngu obvu-mini, a-bụru nkengu kpoloko. Mbụ mini, agba kẹ tọritori, shi lẹ wẹlu, ị tụru l'onwongu.

¹⁶ ?Dẹnu g'ii-shi parụ ọgba, a nwụshiru ngu mini haa g'ọ sọo gborogboro lẹ gbororo? ?Mbụ parụ okpuru ngu haa g'ọ sọru je adọru l'echi edupfu?

¹⁷ Mee ya g'ọ bụru nkengu kẹ nwẹkinyi ngu. G'unu lẹ ndiphe ta agbakwarụ iya mgba.

¹⁸ G'e kebekwa ẹnya ẹka iikuje mini l'ọma! G'ẹhu tsọkwa gụ lẹ nwanyị, ị lụru l'okorọbya ụtso!

¹⁹ G'ọ dụkwa g'umoro-ẹnyimu, ama ntụmatu. G'ẹra iya mejekwa g'ẹhu tsọo ngu ụtso. Gẹ n-yemobu iya sepyabẹjekwa ngu l'unuphu.

²⁰ ?Dẹnu g'ọ nwụru umere nwanyị, eme ẹji anọduje agba ngu igiri; nwa mu? ?Dẹnu g'o gude ọ bụru ụtapfu nyee onye ọzo bẹ ịinoduje arwaphu onwongu?

²¹ Kẹle ụzo, onyemonye eshi bẹ Chipfu makọtakwaru. Tẹme ọ nọdu atụkojeepho iphemiphe, oome egbu igo.

²² Ẹjo-ememe, onye ẹjo-iphe eme l'anmajẹkwa iya g'ọ́nyà; mbụ l'iphe-ẹji, oome adụjekwa g'ụdo kee ya kpụkpurukpu.

²³ Ọ bụru iphe, e-gbu iya nụ bụ ahụ̀hù, a hụ̀duru iya; tẹme eswe eswe ono, oome ono je eme iya l'ọ bụru ọla-l'iswi.