Ẹkwo Ẹtu 4 - BAYỊBURU Izii

Mmamiphe kachaa ree

¹ Sụ-a; ụnwu mu; unu ngabẹkpodaru mu phọ nchị g'unu angabẹjeru nna unu; mẹ ọ -nọdu alọ unu ẹka lẹ nchị. Unu kpaa iphe lẹ nchị; g'iphe edoje unu ẹnya.

² Iphe, mu ezi unu bụ ọkpobe mmamiphe. Ọo ya bụ; unu te wokwaru iya nmaa phulaphula.

³ Teke mu bụ nwokoro buru l'ibe nna mu; mbụ teke mu bụkwadu ọgbo lanụ; bya abụru nwa lanụ, ne mu nwụtaru

⁴ bẹ nna mu ziru mu iphe sụ mu: “Gudekwa obu ngu g'ọ ha gbakụa ẹka l'opfu-ọnu mu! Meje iphemiphe, mu sụru g'i meje g'ịinodu ndzụ!

⁵ Makwarụ iphe; g'iphe dojekwa ngu ẹnya! Ta azọhajekwa opfu-ọnu mu; ọphu i shikwa iya kpọo gẹgege kpọfu!

⁶ Te ewokwaru mmamiphe nmaa phulaphula; ọo ya bụ g'ooleta ngu ẹnya. Yee ya obu; ọo ya bụ g'oocheje ngu echeche g'ọ tọ dụ iphe, e-me ngu nụ.

⁷ Ọo mmamiphe bụ ishi; ọo ya bụ g'ị chọo mmamiphe! Obetakpọo o je ephu ngu gụnu; ta ahakwa achọ nkwamẹnya!

⁸ Kutsee ya; g'ọopalia ngu ephekerephe! Nma iya akpa; g'ọokwabeje ngu ùbvù!

⁹ Oo-woru okpulishi, e-me g'ị dụ ùbvù l'ẹnya kpube ngu; bya eworu okpu-eze, dụ akpabiri sẹe ngu l'ishi.”

¹⁰ Ngabẹkpodapho nchị nwa mu; g'iphe, mu epfu bahụkwa ngu lẹ nchi; g'eswe ndzụ ngu akabaa igwerigwe!

¹¹ Ọ kwa ụzo mmamiphe bẹ mu ziru ngu. Ọ bụru gbororo, pfụru nhamụnha bẹ mu duru ngu shia;

¹² K'ọphu bụ ị -nọdu eje ije; ọ tọ dụdu iphe, akpọshi ngu ahata ọkpa. Teke ịigba ọso; ụpfu ta adụdu ngu l'ọkpa.

¹³ Gudeshia ahụ̀hù, a hụ̀ru ngu ike; ba hakwa iya g'ọ gbala! Letakwa iya ẹnya ree; kẹle ọ kwa iya bụ ndzụ, ị dzụ.

¹⁴ Ta atụkwa ọkpa atụtu ophu l'ụzo ndu ẹjo-iphe; ọphu i shikwa ụzo ndu eme ẹjo ememe.

¹⁵ Gbangoo ya; be shikwa iya eshishi ophu. Gbakụtaru ụzo ono azụ; shia ụzo ọzo jeshia iphe, iije.

¹⁶ Kẹle ẹphe te ekujedu mgbẹnya; m'ẹphe emedụru ẹjo-ememe; ọphu mgbẹnya eshitajẹdu phẹ ẹnya eshita ophu; gbahaa l'ẹphe meadaru gẹ nemadzụ daa.

¹⁷ Iphe, abụjeru nri phẹ bụ eme ẹjo-iphe. Mẹe, ẹphe angụje bụru eme iphe-ike.

¹⁸ Ụzo, ndu pfụberekoto etso adụje g'ìphóró gẹregere ụtsu, l'atọje nwẹhu abọhu gbiriri jasụ nchi asafụ.

¹⁹ Obenu l'ụzo ndu ẹjo-iphe adụje gẹ tsụkiribaa ọchii; k'ọphu bụ l'ẹphe ta amadụ iphe, ẹphe evukotajẹ daa iko.

²⁰ Nwa mu; ngabẹkwa nchị l'iphe, mu epfu. Gbobe nchị egbobe l'opfu-ọnu mu.

²¹ B'ekwekwa g'ẹphe lụfu ngu l'iphu. Dobe phẹ l'ime ọkpoma ngu.

²² Kẹle ẹphe bụ ndzụ l'ẹhu ndu hụmaru phẹ nụ; bya emeje g'ẹhu amadụ l'ophu wekọrohu.

²³ Ọphu kachakpọonu bụ g'i cheje obu ngu nche; kẹle ọo ya bụ ẹka ndzụ shi.

²⁴ Tụkokpo iphe, gberu nggọ wofukọta l'ọnu ngu. G'ire ngu te epfujekwa opfu, apfụduru nhamụnha.

²⁵ G'ẹnya ngu dụkwa l'iphu. Tabẹkpoepho ẹnya l'atatiphu ngu nhamụnha nhamụnha.

²⁶ Lerwejeadakwa ẹnya l'ụzo tẹme l'iitsojeru iya. G'ụzo, ii-tsoru bụjekwaru ọkpobe ụzo, shihuru ike.

²⁷ Te etsokwaru ụzo ẹkutara; ọphu i shikwa ẹkicha. Wofutakwa ọkpa l'ẹjo ememe; kwasẹekwarupho nhamụnha.