Ẹkwo Ẹtu 30 - BAYỊBURU Izii

¹ Ọwaa bụ opfu-ọnu Agụru, bụ nwa Jiake; ozi, Chipfu ziru iya: Nwoke ono pfuru iya Itiyẹlu; mbụ l'o pfuru iya Itiyẹlu pfuaru iya Ukalu sụ:

² Ọ kwa mu kachaa b'a ama iphe l'iphe, bụkpoo unwoke. Egomunggo nemadzụ ta adụkwa mu l'ẹhu.

³ Mmamiphe bẹ mu ta nwụkpodaaru ilile. Ọphu mu amadụ Onye nsọ ono amama ophu.

⁴ ?Bụ onye bahụjewaru l'imigwe; bya eshi iya lwazeta? ?Bụ onye gudejewa ẹka kpokọbe phẹrephere? ?Bụ onye gudejewa uwe iya kechia mini mini, nọgbaa nụ? ?Bụ onye meru g'ẹka mgboko l'ophu beru kpọo g'abara? ?Ẹpha onye ono bụ gụnu? ?Bụ gụnu bẹ nwa iya aza? Kanụru mu iya mẹ ọ -bụru l'ị maru iya.

⁵ Opfu Chileke l'ophu l'ophu dokwaru rịsaa. Tẹme ọ bụru onye egbobutaje iphe, bụkpoo ndu gbabarụ l'ime iya je anọdu eze ndzụ.

⁶ B'e yekwakwa iphe l'opfu iya. Ọdumeka bẹ ọo-bakwarụ ngu mba goshi ọha l'ị bụ onye adzụje ụka.

⁷ Iphe labọ bẹ mu akpa ngu ishi iya jiko Chipfu. Mekwaaru mu iya jiko tẹme mu anwụhu.

⁸ Menaa gẹ atụkporoko yẹe adzụ ụka nọdu mu ẹnya. B'emekwa gẹ mu kpaa nri; ọphu i mekwa gẹ mu nweru iphe. Iphe, ịi-nụje mu phọ bụ nri, asụje mu eriri mbọku-mbọku.

⁹ Ọdumeka bẹ mu e-nwenụkakwaru iphe shi nno jịka ngu: pfuahaa sụ: ?Bụ onye bụ Chipfu ọbu? Ọzoo lẹ mu jeru je akpanụka nri; je ezia iphuru; shi nno mebyia ẹpha Chileke mu.

¹⁰ Ta anọdukwa l'iphu nnajịuphu pfubyishia onye-ozi iya. Ọdumeka bẹ ọo-tụkwa ngu ọnu, a-vụru ngu nụ.

¹¹ O nwekwarụ ndu anọduje ephu nna phẹ iphu. Ọphu ẹphe agọjedu ọnu-ọma anụ ne phẹ.

¹² Mbụ ndu dụebe ree l'ẹnya nkephẹ. Ọle a ta safụkwaru phẹ ideyideyi, ẹphe dụ.

¹³ Ndu anọduje avọru nemadzụ ẹnya; bya elephuje nemadzụ ibe phẹ.

¹⁴ Eze, dụ phẹ l'ọnu bụ ogu-echi; Iphe, doru phẹ jọo l'ọnu bụru ọkarara, ẹphe e-gude tụko ndu ụkpa tagbushikọta g'ẹphe bvụ l'eliphe; tụko ndu adụdu g'ọ dụ phẹ lwụa g'ẹphe ta phọdu l'echilabọ ndu nọ ndzụ.

¹⁵ Etu-ụda nwụtaru ụnwumgboko labọ. Ọ bụru iphe, ẹphe anọdujeepho ara mkpụrumkpuru bụ: Nụ mu! Nụ mu! Mbụ l'o nweru iphe ẹto, ẹpho te ejijedu ejiji; mbụ iphe ẹno, teke asụswee: O jiwaru mu!

¹⁶ Mbụ alị-maa; yẹe ẹpho nwanyị, ta atsụdu ime; yẹe alị; kẹle alị teke angụnyadaa mini bya asụ lẹ ya ta angụedu; waa ọku, enwu enwunwu; ọku, enwu enwunwu teke anọnyakpoo bya asụ: O jiwaru mu!

¹⁷ Onye asụ̀ nna iya ẹnya ruu; ọphu ọ kpadụ ishi eme iphe, ne iya sụru g'o mee bẹ okpoko-ọ́hà e-shi lẹ wukirima bya agụta ẹnya onye ọbu. Ọ bụru udele l'e-ri iya.

¹⁸ Ọ dụru iphe ẹto, dụ mu oke biribiri; mbụ iphe ẹno, te edokpọdaru mu ẹnya edodo ophu:

¹⁹ ụzo ugo l'akpaminigwe; waa ụzo agwọ l'eli mkpuma; waa ụzo ụgbo-mini l'eze-ẹnyimu; yẹle ụzo nwoke waa nwamgbọko.

²⁰ Waa gẹ nwanyị ovuọba emeje iya baa: Oorije nri woru ọnu huchachaa; sụ: Ọ tọ dụkwa iphe, dụ ẹji, mu meru.

²¹ Ọ dụru iphe ẹto, mgboko l'ophu anọduje lẹ mkpula anma jiijiijii; mbụ l'ọ dụru mkpula iphe ẹno, mgboko ta adụkpodaa ike apfụru apfụru ophu.

²² Mbụ lẹ nwata-ozi phelihuru bya abụru onye eze; waa l'onye-eswe wafụru bya enweru nri;

²³ nwanyị, a kpọru ashị, lụru ji; ọzoo nwamgbọko, yẹe nemadzụ bu; ọ kapyabẹ onye ọbu ẹnya.

²⁴ Ọ dụru iphe ẹno, dụ l'eliphe, ha nwanshịi; ọle ẹphe mashịru iphe ike.

²⁵ Ndada bụ iphe, e meru dobe l'eliphe; ọphu ike aduzidu iya; ọle ẹphe akwajẹ nri l'ọnanwu dobe, ẹphe e-ri l'udzumini.

²⁶ Nchi-ọgba bụ iphe, e meru dobe l'eliphe; ọphu ọkpehu aduzidu iya; ọle ẹphe ebvuje agbara-mkpuma dozia buru.

²⁷ Igube te enwedu onye-eze; ọle ẹphe anọduje ephe l'ọgbo l'ọgbo.

²⁸ Ngwere ta adụdu m'obetaru ọ bụru ẹka be egude achị iya; ọphu egude iya; ọle ọo-nọdujechaa nọdu l'oke-unuphu ibe eze.

²⁹ Ọ dụru iphe ẹto, anọduje agụ ije ọgu; mbụ l'ọ dụru iphe ẹno, ije iya dụshi ree ike.

³⁰ Oduma bụ iya kachaa ọkpehu l'iphe, bụ anụ; ọphu ọ dụdu anụ, ọogbaru ọso.

³¹ Ọzo bụ oke-ọku, azọ pfukangu pfukangu; mkpi; yẹe onye eze yẹe ndu ojọgu iya, nọ-pheru iya mgburugburu.

³² Ọ -bụru l'i shi mewaa iphe onye-eswe; mbụ l'i shi ekutse onwongu; ọzoo l'ọ dụru idzu ẹjo-iphe, i shi chịwaa; dẹkwaa ẹka l'ọnu!

³³ Kẹle ọo g'a pyịje ẹra-eswi meta iya manụ-a; ọ bụru g'ọ bujeru; a -swịkpoo imi aswịkpo l'ọ lwaa mee-a bụ g'ọ bujeru; a -kpatsu ẹhu-eghu; opfu abya.