Ẹkwo Ẹtu 3 - BAYỊBURU Izii

Idzu, aachị-koshi ụnwokorobya

¹ Nwa mu; ta zọhakwa iphe, mu ezi ngu. Wochikwaaru iphe ono, mu sụru g'i mee ono kwakọbe l'ime obu ngu;

² kẹle oo-me g'eswe ndzụ ngu kabaa ogologo; mbụ l'oo-me l'ị kaa nka; tẹme l'oo mekwaphọ g'ẹhu dụ ngu guu.

³ B'ekwekwa gẹ n-yemobu yẹe ire-lanụ nahụ ngu. Woru iya tụkpoo l'olu g'ọleka; l'i woru iya dee pfube l'ime obu ngu.

⁴ Ọo ya bụ l'ị bụru onye a-tụba Chileke yẹle nemadzụ l'ẹnya; tẹme l'i nweru ẹpha ọma.

⁵ Gude obu ngu g'ọ ha dakobe Chipfu. Ba chịkwaru ụpfu kwẹe lẹ nkwamẹnya nkengu.

⁶ Ị -nọdu emekpọo iphemiphe, iimekpọo ememe; nyatajẹ Chipfu; kẹle ọo ya e-me g'ụzo ngu pfụru ọto.

⁷ Ta arịjekwa l'ị maru iphe. Ọ chịkwa g'ị tsụje Chipfu ebvu; kpọ-yijeru iphe-ẹji ukuvu.

⁸ Noo iphe, e-me g'ẹhu dụ ngu ike; mee g'ọkpu shihukwa ngu phọ ike.

⁹ Gude ẹku ngu; yẹle iphe-mbụ, ị kpatarụ l'opfu ngu; kwabẹ Chipfu ùbvù.

¹⁰ Ọo ya bụ gẹ nri eji ọba ngu bushihu ebushihu; tẹme mẹe ejikwaphọ mgbaja ngu ejiji.

¹¹ Nwa mu; Chipfu -nọdu abarụ ngu mba; b'e wokwaru iya hua l'alị; ọphu ị dzụrubejekwa mẹ ọ -nọdu alọ ngu ẹka lẹ nchị.

¹² Kẹle ndu Chipfu ahụ̀je ahụ̀hù bụ ndu o yeru obu; ẹgube ono nna, ahụ̀je nwa, o yeru ẹnya ono.

¹³ Ẹhu-ụtso bẹ a gọru nụ onye chọtaru mmamiphe; mbụ onye natarụ nkwamẹnya.

¹⁴ Kẹle ọ ka mkpọla-ọchaa aba urwu; tẹme ọ nọdu anwụta iphe, ka shii eme l'ọphu mkpọla-ododo anwụta.

¹⁵ Ọ ka mkpuma, aswa dụ ere ire. Ọ tọ dụdu iphe, agụ ngu ẹgu g'i nweru iya mẹ nanụ, aa-nọdu atụ eyeru iya.

¹⁶ Iphe, o gude l'ẹkutara bụ ndzụ ogologo; ọphu o gude l'ẹkicha bụru enweru iphe yẹe akwabẹ ùbvù.

¹⁷ Etso ụzo iya bụ ẹhu-ụtso; tẹme gbororo iya bụkotaru ẹhu-guu.

¹⁸ Ọ bụ oshi, anụje ndzụ l'ẹhu ndu nmataru iya akpa. Ndu tụru iya gburumu l'a-bụru ndu a gọru ẹhu-ụtso nụ.

¹⁹ Ọo mmamiphe bẹ Chipfu gude tụa ọkpa mgboko-a l'ophu. Ọ bụru nkwamẹnya iya bẹ o gude dobe igwe.

²⁰ Ọ bụru amaru iphe iya bẹ o gude mee gẹ mini ime alị nwụshije; bya emee g'iji shije l'urwukpu kwaa.

²¹ Nwa mu; iphe, ii-gudeshi ike bụ ọkpobe mmamiphe; yẹle amaru eye ọnu l'opfu. B'ekwekwa g'ọ nahụ ngu.

²² Ọo ya a-bụru ngu ndzụ; bya abụru ịyagba, a-tụkpo ngu l'olu gude mee l'ị bụru ẹguru.

²³ Ọo ya bụ l'iijekpọepho l'ụzo ngu chiriri werere. Opfu ta adụdu ngu l'ọkpa.

²⁴ Ị -zẹe azẹe; ndzụ ta agụedu ngu. Mbụ-a; mgbẹnya atsọaha ngu ntụmatu mẹ ị zẹe azẹe.

²⁵ Ẹjo iphe-ẹhuka -tụ ngu l'ụpfu; b'atsụkwa ebvu! Ọphu ị tsụkwa iphe, emeje gẹ ndu ẹjo-iphe bụru mkpurupyata ebvu mẹ ọ dapfu ngu!

²⁶ Ọo Chipfu a-bụru agbara-ike ngu. Ọo ya bụ l'oo-me g'ị tị nmalahụ l'ọ́nyà.

²⁷ Ta lọ-phukwa iphe, dụ ree azụ g'o to rwu ndu o rwuberu ẹka; mẹ ọ -dụ ngu l'ẹka ememe.

²⁸ Ọphu ị sụkwa nemadzụ ibe ngu g'ọ bya echele bya anata iphe ọ bụ; l'ẹka ị gbẹkwa gude iphe, ọ bụ l'ẹka ono.

²⁹ Ta achịjekwaru nemadzụ ibe ngu ẹjo idzu; mbụ onye unu l'iya bu tụsaru ẹhu.

³⁰ Te bokwa nemadzụ ibo eswe; l'ẹbe abụ l'o mekarụ ngu iphe.

³¹ Te kokwaru onye bụepho iphe ike adụje iya ree okophoo! Ọphu ọ dụkwa ụzo iya ọphu ịi-họta sụ l'ọ dụ ngu ree!

³² Kẹle onye eegudedu ire iya ẹka dụkwa Chipfu ashị; obenu l'onye obu iya gụru ìphóró bẹ amajẹru iya ime.

³³ Chipfu tụakwaru ọnu-ụlo ndu ẹjo-iphe ọnu; obenu l'ọonoduje agọ ọnu-ọma anụ unuphu ndu pfụberekoto.

³⁴ Ndu achị ndu ọzo ọchi bẹ Chipfu achịlatajekwa; ọ nọdu emejeru ndu wozeru onwophẹ alị eze-iphe-ọma.

³⁵ Ndu maru iphe bẹ okiphe phẹ bụ akwabẹ ùbvù; obenu lẹ ndu eswe bẹ oogbobejeru iphere.