Ẹkwo Ẹtu 29 - BAYỊBURU Izii

¹ Onye aabajẹru mba tekenteke; ọ nọdu emerọ iphe, oome bẹ a -bya ajị ẹnya birimu bẹ e mebyishiwaru iya. Ọphu eemekọtabaedu iya emekọta.

² Ndu pfụberekoto -nọdu aka shii eje bẹ ẹhu atsọje ndiphe ụtso. Teke onye ẹjo-iphe bụ ishi; ndiphe atsụahaa pfụu.

³ Onye yeru mmamiphe obu emeje g'ẹhu tsọ nna iya ụtso. Obenu l'onye yẹe ụnwanyi-ụkpara aswị ọswi anọduje eripya ẹku iya.

⁴ Onye eze, ekpeje ikpe, pfụru ọto emeje g'alị iya pfụru pfụshia ike. Obenu l'onye ẹnya ụphalazu dụ alakashịje iya alakashị.

⁵ Onye enwuru nemadzụ ibiya opfu enwunwu bụ ụgbu-egege bẹ oogeru iya g'o chie ọkpa.

⁶ Onye njọ bẹ iphe-ẹji, oome anmajẹ iya g'ọ́nyà. Obenu l'onye pfụberekoto anọduje agụ ebvu ete ẹswa.

⁷ Onye pfụberekoto anọduje arị g'eeme kpeeru onye ụkpa ikpe, pfụru ọto. Obenu l'onye ẹjo-iphe bẹ ẹgube iphe ono te erwudu l'ẹhu.

⁸ Ndu mpfubyishi akpatajẹ ùtsú lẹ mkpụkpu. Obenu lẹ ndu maru iphe abyanyịje ẹhu-eghu.

⁹ Onye maru iphe -kpụru onye-eswe eje l'ụlo-ikpe bẹ onye-eswe ọbu a-nọdule-a atụ kwokwokwo aba mba eye iya; ọphu nchị abyakwa adụ doo.

¹⁰ Ndu egbu ekere bẹ onye ụta adụdu lẹ ndzụ iya adụje ashị; obenu lẹ ndu obu phẹ gụru ìphóró anọduje echekwa ndzụ onye dụ nno.

¹¹ Ọo onye mmanụ emegbuje g'o ghuru iya. Obenu l'onye maru iphe esedeje onwiya mẹ ẹhu -nọdu eghu iya eghu.

¹² Onye bụ ishi -nọdu angaje nchị l'ụka; iphe, bụkpoo ndu ejeru iya ozi abụkotaerupho ndu ẹjo-iphe.

¹³ Onye akpa nri yẹe onye akpa nemadzụ ẹhu bẹ ọ dụru iphe lanụ, anwụje l'ẹhu ẹphenebo: Ọo Chipfu agụsaje ẹphenebo ono ẹnya.

¹⁴ Onye eze -nọdu egudeje ire-lanụ ekpe ndu ụkpa ikpe bẹ aba-eze iya e-keẹkwarupho jịngujingu g'o keru.

¹⁵ Ẹchachi, e gude ahụ̀ nwa ahụ̀hù emeje gẹ nwata maru iphe. Obenu lẹ nwata, a harụ ẹka emeje ne iya iphe-iphere.

¹⁶ Ndu ẹjo-iphe -nọdu aka shii eje; iphe-ẹji akakwaphọ shii eje. Obenu lẹ ndu pfụberekoto e-gude ẹnya hụma teke ẹphe a-nọdu ada.

¹⁷ Hụ̀a nwa ngu ahụ̀hù hụma l'oo-me g'ẹhu dụ ngu guu. Oo-me g'obu tsọhu ngu rịkpotoo.

¹⁸ Ẹka ọphulenya adụdu bẹ onyemonye anọduje eme g'ọ dụ iya. Obenu l'onye eme iphe, a tụru l'ekemu bẹ bụ onye e keberu l'ọma.

¹⁹ Ohu ta abụledaa opfu-ọnu bẹ e gude ezi iya iphe; kẹle o -dochakpọo ya nụ ẹnya bẹ o too yekpọdanu ọnu.

²⁰ ?Ị hụmaru onye awọje opfu kpokokongu? Onye ono bẹ eelekwa ẹnya l'onye-eswe bẹ a-gbẹkwanu ka akụkuta-iphe eme lẹ yẹbedua.

²¹ Nwoke -swanụkaru onye-ozi iya aswarụ; l'ọ nụa ya aphụ l'ikpazụ iya.

²² Onye ẹhu eghu akpatsuje nseka. Tẹme onye obu-ọku nọdu emeje iphe-ẹji, dụ igwerigwe.

²³ Amadụ -kuahaa onwiya; l'o woze iya alị. Obenu l'onye wozeru onwiya alị bẹ aakwabẹje ùbvù shii.

²⁴ Onye yẹe onye-oshi emegbaa bụkwa ọhogu onwiya. Ọo-nụma ẹka eeri nte; ọle ọ tọ dụdu iphe, oopfu.

²⁵ Atsụ nemadzụ ebvu bụ ọ́nyà bẹ ọogbabeje. Obenu l'onye bụ onye kpọru obu yeru Chipfu ta adụdu iphe, byaru eme iya nụ.

²⁶ Aadụje igwerigwe achọ g'onye-ishi meeru phẹ iphe-ọma; obenu l'onye ekpejeru nemadzụ ikpe, pfụru ọto bẹ bụ Chipfu.

²⁷ Onye pfụberekoto bẹ onye apfụbeduru ẹka ọto adụje ashị. Onye obu gụru ìphóró nọdu adụjekwanu onye ẹjo-iphe ashị.