Ẹkwo Ẹtu 27 - BAYỊBURU Izii

¹ E kukwa onwongu kẹ l'ọwa-a iphe, ii-me echele; kẹle ị tị madụ iphe, mbọku e-wota.

² Haa g'onye ọzo jaa ngu ajaja. B'egudeshi ọnu ngu jaa onwongu. Haarụ iya onye ọzo; g'ọ tọ bụshi gụbedua l'onwongu.

³ Mkpuma anyịkwa ẹrwa; tẹme ẹja bụru oke-ivu. Obenu l'onye-eswe -kpatsu ngu iwe bẹ ọ kakọta iphe labọ ono anyị ẹrwa.

⁴ Ẹhu-eghu te enwedu obu-imemini; ọvuma nọdu abya ẹnari. Obenu ?bụ onye adụ ike apfụru l'iphu ijiẹnya?

⁵ Mba, a barụ nemadzụ lẹ sagaa kakwa ree eme l'eye obu, e yeru lẹ mpya.

⁶ Onye gụ l'iya dụ l'opfu -nmaa ngu akpa bụkwa akpa ẹregede bẹ ọ nmarụ ngu. Obenu l'ọ́nyá, onye gụ l'iya eshi ọ̀nyà gburu ngu bẹ ntụcha adụdu.

⁷ Onye ẹpho jiru bẹ manụ-ẹnwu adụjechakwaa ẹji. Obenu l'onye ẹgu agụ bẹ iphe, atsọ ilu atụkoje atsọcha rẹngurengu.

⁸ Onye gbẹshiru l'ibe iya tụgbua bya akpaphuhu dụkwa g'ẹnu, shi l'ẹpfune iya phelihu phefu bya ephuaha ụzo ẹpfune iya ọbu.

⁹ Manụ eshi mkpọ yẹe manụ isẹnsu, emeje g'obu nọdu atsọ ụtso. Nokwaphọ g'akpọ-zi ụzo, shi l'ẹka ọ̀nyà nemadzụ emeje; ẹhu akpọ-vohu iya.

¹⁰ B'ahakwa onye gụ l'iya eshi ọ̀nyà; yẹe onye yẹe nna ngu eshi ọ̀nyà. Ọphu i gbakwarụ jeshia ibe nwune ngu nwoke mẹ ẹjo iphe-ẹhuka dapfuta ngu. L'obutobu ngu, nọ ngu ntse kakwa ree eme lẹ nwune ngu, bu ngu ụzenya.

¹¹ Manụru iphe; nwa mu; menaa g'obu kpọ-vohu mu; k'ọphu mu e-yeje ọnu yeru onye anma mu phulaphula.

¹² Onye nweru egomunggo ahụmaje iphe, bụ ẹjo-ememe domia onwiya. Obenu l'onye amazidu iphe anọdujeepho eje dukuu dukuu g'ooje je ejee iphe-ẹhuka, nọ iya nụ.

¹³ Nemadzụ -sụ l'ọo onye ọ madụ bẹ ya a-nọduru l'itumo; natakwa iya uwe iya. Gudeshikwaa ya mẹ ọ -bụru onye ọhozo bẹ ọ nọru l'itumo ọbu.

¹⁴ Amadụ -gbẹshi lẹ nchi-abọhu ara gbagbagba; l'ẹka ọogo ọnu-ọma anụ obutobu iya bẹ ọo-dụkwa g'ọ bụ ìphù bẹ oophu iya.

¹⁵ Nwanyị, anọduje abapheru ji iya mba; dụkwa gẹ mini-odzeru, atụ paapaa.

¹⁶ Egbogbo iya dụkwapho g'onye egbo phẹrephere g'o to zihẹ. Ọzoo g'onye gude ẹka egbobuta manụ, alwa torotoro.

¹⁷ Ọo g'ikpegiri abajẹ ígwè-a bụ g'amadụ abajẹru ọkwenya nụ ibe iya.

¹⁸ Ọo onye dzarụ oshi figu erije akpụru, ọ mịtaru. Ọ bụru onye eleta nnajịuphu iya ẹnya bẹ ọokwabeje ùbvù.

¹⁹ Ọo g'amadụ eleje ẹnya lẹ mini hụma onwiya iphu bụ g'ọkpoma amadụ egoshije ụgbugba iya.

²⁰ Ẹpho te ejikwa alị-maa; ọphu ẹpho ejidu alị ọla-l'iswi. Nokwaphọ g'ẹpho te ejijedu ẹnya l'iphe, ọohumaje.

²¹ Ite bẹ e gude eghe mkpọla-ọchaa egheghe. E gude ọku ahụ mkpọla-ododo ama. Obenu l'amadụ bụ ajaja, aaja iya bẹ e gude ahụ iya ama.

²² Ọ tọ dụkwa m'obeta ị tsụa onye-eswe l'ikwe; mbụ gude ọ́dzú gwee ya g'onye egwe ereshi; i tii mekwa g'ọ haa eme-eswe.

²³ Makwarụ l'ị maru g'ẹku ngu gbaru ọkpobe amaru. Obu ngu adụkwapho l'ẹka ọka-eswi ngu dụ.

²⁴ Kẹle iphe-enweru ta anọjedu ojejoje. Ọphu okpu-eze anọjedu shi l'ọgbo sweru ọgbo l'ishi onye lanụ.

²⁵ E -kpofu akahụ ẹswa, e shi gbutaru ẹku ngu; ọ bya erwua irwu ọ̀phúú; a bya eje l'eli úbvú je egbua ẹswa ọ̀phúú;

²⁶ ụnwu-atụru ngu anụaha ngu uwe eye l'ẹhu; iireaha eghu ngu gude ereta iphe, ii-gude zụa alị.

²⁷ Ii-nweru ẹra-eghu dụ shii, ii-gude azụ onwongu gụ lẹ ndibe ngu; gude iya azụ̀ nwamgbọko, gụ l'iya bu ebubu.