Ẹkwo Ẹtu 26 - BAYỊBURU Izii

¹ Akwabẹ ùbvù te ekweduru onye-eswe. Ọ dụ g'ẹka aka-mini-sunoo l'ada l'ọnanwu. Ọ dụ g'ẹka igwe edze mini teke emeta iphe e meberu l'alị.

² Ọnu, a tụru onye adụdu iphe, o meru ta adụkwa iphe, oo-me onye ọbu. Ọ dụkwa g'ẹka ogbe eme pẹremu pẹremu pẹremu; ọzoo g'ẹka agbẹta ezi swịiswiiswii.

³ Ẹchachi bẹ eechije ịnya; a nọdu egudeje ọkpukpu akpụ nkapfụ-ịgara. Nokwaphọ g'eegudeje mgbọro echi onye-eswe l'okpurukpu.

⁴ B'eyekwaru onye-eswe ọnu lẹ mkpọkoro opfu, oopfu. Ọdumeka bẹ gụ l'iya a-tụkokwa bụru ndu eswe.

⁵ Yechikwaaru onye-eswe ọnu ẹhuka ẹhuka lẹ mkpọkoro opfu, o pfuru. Ọdumeka bẹ oo-dobesụkwa lẹ ya maru iphe.

⁶ Onye ezi onye-eswe ozi bụ onwiya bẹ o ribushi ọkpa. Tẹme ọ nọdu akpataru onwiya opfu.

⁷ Ọo g'ọkpa atụgbaa onye ẹniyeni lwakpalwakpa bụ g'ẹtu, onye eme eswe anma atụ lwakpalwakpa.

⁸ Akwabẹ onye-eswe ùbvù dụkwa g'eye mkpuma lẹ rọbo.

⁹ Ẹka onye-eswe anma ẹtu dụkwa g'ẹka onye mẹe atsụ akpa onwiya óbvú, dzụru iya l'ẹka.

¹⁰ Onye ekuje onye-eswe; ọzoo onye aghata aghata g'o jeeru iya ozi dụkwa g'onye ojọgu, egudeje apfụ iya meka onyemonye iphe.

¹¹ Ọo gẹ nkụta anwajẹ ẹnwa laphu azụ je erichaa ya-a bụ g'onye eswe abụjeru: o -mechaa rigbarigba l'ọ laphu azụ je emephu iya azụ.

¹² ?Ị hụmaru onye arị lẹ ya maru iphe? Onye ono bẹ onye eme eswe kaẹpho mma.

¹³ Onye ẹnyiru sụru l'oduma nọ lẹ gbororo; l'oduma tsoru gbororo azọ-phe.

¹⁴ Ọo gẹ mgbo anọduje aghaphu onwiya l'arịwa-a bụ g'onye ẹnyiru anọduje aghaphu onwiya l'iphe-azẹe ya.

¹⁵ Onye ẹnyiru abụjeru: o -jee etsuta ụtara l'ophe; ẹka akwaa ya l'ochi. Ẹnyiru te ekwedu iya g'o ye ẹka l'ọnu.

¹⁶ Onye ẹnyiru arịje lẹ ya maru iphe maghata ụmadzu ẹsaa, maru eye ọnu l'opfu.

¹⁷ Onye aghata aghata bya ahụma ẹka aaswọ ụswo bya eworu onwiya chie ya dụkwa g'onye hụmaru nkụta bya alọta iya lẹ nchị.

¹⁸ Ọ kwa g'onye ọbvu eme, agba apfụ enwu ọku phoophoophoo bya atụ icheku-ọku phuuphuuphuu;

¹⁹ bụ g'ọ dụ mbụ onye meru nemadzụ ibiya mkpurukpuru-ẹnya bya emechaa bya asụ iya l'ọ kwa ebvu bẹ ya ebvukoshi iya.

²⁰ Nkụ -adụdu l'ọku; ọku anyịhu. Asụlasu -adụdu l'opfu; ụswo anyịhukwapho.

²¹ Ọo g'icheku aphunwu ọku-ụzu; bya abụru gẹ nkụ aphunwu ọku mmanụ bụ g'onye opfu aphunwuje opfu.

²² Asụlasu anọduje atsọ ntụmatu. Ọotukoje iphe, bụ ẹhu vọo pfurupfuru.

²³ Ẹrengete opfu edomije ọkpoma mgbashị; ẹgube nshị mkpọla-ọchaa etechije ite, a kpụru l'ụrwa-a.

²⁴ Onye nemadzụ dụ ashị egudeje opfu-ọnu domia onwiya. Ọle o domiru ẹjo-iphe l'ime ọkpoma iya.

²⁵ Ọ -nọdu epfukpọo opfu, atsọ ntụmatu; b'eyekwaru iya ọnu; kẹle ẹjo-ahụma, nọ iya l'ọkpoma rwukwaru l'ẹsaa.

²⁶ Ashị, ndiphe dụ iya bẹ oogudeje ẹregede domia. Ọle ẹjo-iphe, oome bẹ ee-mechaa tụa too l'edzudzu-ọha.

²⁷ Onye ebu iduma bụ iya e-mechaa daba iya. Ọ bụru onye eswi mkpuma bẹ mkpuma ewephutajẹ azụ bya eswipyabẹ.

²⁸ Onye atuphu ire bẹ akpọje ndu o mebyiru ẹhu ashị. Tẹme ọnu, enwu opfu enwunwu nọdu emebyije iphe emebyi.