Ẹkwo Ẹtu 25 - BAYỊBURU Izii

Ẹtu ọzoba Sólomọnu nmashịgbaru.

¹ Ndu ọwa-a bụgbakwaa ẹtu ẹtu ọzo, Sólomọnu nmashịru. Ndu deru iya l'ẹkwo bụ ndibe Hezekáya, eze ndu Jiuda.

² Edomi iphe edomi ekutse Chileke ekutse. Obenu l'ọphu ekutse ndu eze bụ avọ iphe kọta iya ọhu.

³ Ọo g'igwe habe ephekerephe; ọ bụru g'alị dụ-be omilomi bụ g'obu onye eze bụ-be iphe, a taa vọ-rwudu avọ-rwu.

⁴ Rwushia ẹrwu lẹ mkpọla-ọchaa hụma l'onye akpụ mkpọla-ọchaa nwewaru ẹguru iphe, oo-gude kpụa iphe, ọokpu.

⁵ Rwushia ndu ẹjo-iphe l'iphu onye eze hụma l'aba-eze iya bẹ oo-gude apfụbekoto mee g'ọ pfụshia ike.

⁶ B'anọdukwa l'iphu onye eze ekutse onwongu! Ọphu i jekwa asụgaru l'ẹka ndu oke-amadụ kụru!

⁷ Ọ kakwa ree l'ọo ya sụru ngu: “Gbẹshi bya anọdu l'ẹguru ẹka-a!” Eme l'ọ pfụru l'iphu oke-amadụ mee ngu iphe-iphere.

⁸ B'egudekwa k'iphe, ị hụmaru l'ẹnya keta ọso jeshia l'ụlo-ikpe. Lẹ-a; ?ii-mekwanụ iya ime-agha l'ikpazụ iya; mẹ e -mechaa; nemadzụ ibe ngu pfuru iphe-iphere kpua ngu?

⁹ Teke gụ lẹ nemadzụ ibe ngu atụ ịgoligoli; b'ewokwaru iphe, nemadzụ pfuru ngu lẹ mpya woru rakaa araka.

¹⁰ Ọdumeka bẹ onye nụmaru iya nụ e-mekwa ngu iphe-iphere. Ọphu ẹjo ẹpha, ii-vuta achịhubaekwa achịhu l'ẹhu ngu.

¹¹ Opfu, e pfuru l'o rwuberu iya dụ g'igopoto akpụru ụdara, a garụ ye l'iyagba mkpọla-ọchaa.

¹² Mba, onye maru iphe abarụ onye angabẹje nchị l'opfu, eepfuru iya bẹ dụ g'iphe-nchị, e gude mkpọla-ododo mee; ọzoo g'iphe ọzo, e gude akwa onwonye akwa, e gude ọkpobe mkpọla-ododo mee.

¹³ Ọo g'akamini-sunoo ejije oyi gua ẹhu egugu l'ọkpaji-a bụ gẹ nwozi, e gude ire iya ẹka eguje ẹhu ndu ziru iya ozi. Mbụ l'oomeje g'obu guzeta ndu nwe iya nụ.

¹⁴ Ọo g'urwukpu, rwuru erwurwu zia phẹrephere; ọphu oodzeẹduru mini dụ; bụ gẹ nwoke, eku onwiya lẹ ya emeje iphe-ọma, o to mejedu dụ.

¹⁵ Ọ kwa nshirima l'e-me g'onye-ishi mee iphe, o shidu kwe lẹ ya e-me. Mbụ l'ire, atụ gwẹlegwele egbujijekwa ọkpu.

¹⁶ Ị -hụma manụ-ẹnwu; ritakwa iya l'okiya. I -rinụka iya l'ị gbọo ya.

¹⁷ Jeta ibe nemadzụ ibe ngu l'ahụma. I -jenụka iya l'ị dụ iya ashị.

¹⁸ Ọo gẹ mgbọro, emeje ẹhuka-a; ọzoo ogu-echi; ọzoo apfụ; noo g'ọoduje; mbụ nwoke agba ekebe lẹ nemadzụ ibiya meru iphe, o medụru.

¹⁹ Adakobe onye eegudedu ire iya ẹka teke iphe atsụ nemadzụ l'ẹhu dụkwa g'onye eme g'ọ taa iphe l'eze, eme iya rikwo rikwo; ọzoo onye ẹniyeni, eme g'o jee ije l'ọkpa, nwụhuru iya anwụhu.

²⁰ Agụ ebvu eyeru onye ọkpoma dụ ẹji dụ g'e yefuru iya uwe gbabẹ iya ẹhu ọto l'ẹka oyi atsụ iya. Ọ dụ gẹ mẹe-venịga, e woru wụa l'eli ọkanwa.

²¹ Teke ọ bụ l'onye opfu dụru gụ l'iya bẹ ẹgu agụ; nụ iya nri g'o ria. Teke ẹgu mini agụ iya; chọoru iya mini g'o ngụa;

²² lẹ teke iime nno bẹ bụ iphere bẹ iimeta ekpu iya l'ishi; iphe ono ahụa ya ọku l'ẹhu. Ọzo bụ lẹ Chipfu e-bu gụbedua nggo.

²³ Ọo gẹ phẹrephere, shi l'isheli ezitsutajẹ mini-a; nokwaphọ gẹ nvu-azụ akpatajẹ adzụ iphu.

²⁴ Ọ kakwa ree g'ị kwata je eburu lẹ mkpotsu-ụlo eme l'ị lụ nwanyị, gụ l'iya bu; ọ nọdu anọduje abaphe mba mbọku-mbọku.

²⁵ Ọo gẹ mini, eji oyi eguzetajẹ obu onye mini agụ-a bụ g'ozi-ọma, shi ụzenya emeje ọkpoma onye e ziru iya.

²⁶ Onye pfụberekoto -parụ onwiya haarụ onye ẹjo-iphe; bẹ ọ dụkwa g'ishi nggele, a swọru ẹrwu; ọ dụ g'obvu-mini, a tụrwuru atụrwu.

²⁷ Ọ kwa g'ọ tọ dụdu ree erinụka manụ-ẹnwu bụkwapho g'ọ tọ dụkwapho ùbvù l'ẹnya mẹ nemadzụ gude ẹka eme g'a kwabẹ iya ùbvù.

²⁸ Nemadzụ, ta adụjedu ike sede onwiya dụkwa gẹ mkpụkpu, e shi gude igbulọ kpụ-phee mgburugburu; a nọnyaa; e tsukpọshia ya.