Ẹkwo Ẹtu 24 - BAYỊBURU Izii

¹ B'ekokwaru ndu anọduje eme ẹjo-ememe okophoo! G'ọgbo phẹ b'agụjekwa ngu ẹgu etsotso!

² Kẹle obu phẹ anọduje achị idzu mkpamẹhu. Ọ bụerupho eme opfu bẹ ẹphe egudeje ọnu phẹ achị idzu iya.

³ Ọo mmamiphe bẹ eegudeje akpụ ụlo. Ọ bụru nkwamẹnya bẹ eegudeje mee ya g'o shihu ike.

⁴ Ọ bụru egomunggo bẹ eegudeje dozia ọma-ụlo iya; chịru ngwa-ụlo, ere ire; tẹme ọ nọdu ama mma gude dozia ya.

⁵ Onye maru iphe bẹ ike dụkwa shii. Onye nweru egomunggo nọdu anọduje anwụta iphe tekenteke.

⁶ Ị -nọdu abya eje ọgu bẹ onye ịi-nọdu ele ẹnya iya bụ onye e-goshi ngu iphe, ii-me. Teke ọ dụkwanu ngu g'i mekpee ndu unu l'ẹphe alwụ ọgu; ndu ịi-nọdu ele ẹnya phẹ abụru ndu a-nọdu akpọ-ziru ngu ụzo.

⁷ Mmamiphe panụkakwaru phengara l'ẹhu onye-eswe. O -jee l'ẹka e dzuru opfu l'edupfu; o to nweduru ọnu-opfu.

⁸ Onye anọduje achị idzu ẹjo-iphe tekenteke bẹ aa-sụ l'ọ bụ onye ẹregede.

⁹ Achị idzu eme eswe bụ iphe-ẹji. Ọphu onye mgbọnu adụjedu ndiphe ree.

¹⁰ Ike -adụdu ngu teke iije iphe-ẹhuka bẹ ị dụkwa arwụhu ọkpobe adụdu.

¹¹ Dzọtanu ndu a kpụ eje egbugbu. Sephunu phẹ azụ; mbụ ndu ono l'akpọ galagala eje ala l'ẹka aa-phụ phẹ tẹrii ono.

¹² Teke ị sụru: “?Anyi makwanụru iphe, eme nụ?” bẹ onye ono, enyoje obu nemadzụ ono manarụ-a iphe, iime. Onye ono, bụ iya edozi ndzụ ngu ono manụrupho iphe, eme nụ. Ọ bụru iya e-mechaa pfụa onyemonye ụgwo g'iphe, o meru gbaru.

¹³ Rije manụ-ẹnwu; nwa mu; kẹle ọ dụ ree. Mbụ lẹ manụ-ẹnwu, e metaru l'ẹbakala-ẹnwu a-tsọ ngu ụtso l'ọnu shingushingu.

¹⁴ Makwarupho lẹ mmamiphe dụ ree lẹ ndzụ ngu. Ị -maru iphe bẹ obunggo dụkwaru ngu iya. Ọphu iphe ono, agụ ngu nụ ono ejedụ mgbabirishi.

¹⁵ Sụ-a; gụbe onye ẹjo-iphe; b'ejekwa ibe onye pfụberekoto je akwageberu iya; ọphu i jekwa ibe iya je iya akwagwo!

¹⁶ Kẹle onye pfụberekoto -dakwaa iko mẹ ọ -daru ugbo ẹsaa; ọ gbalihujekwaphọ. Obenu l'onye ẹjo-iphe bụ ọla-l'iswi akwatsuje iya.

¹⁷ G'ọ tọ tsọjekwa ngu ụtso l'onye opfu ngu daru. Ọphu i tekwa ẹswa l'ọkpoma ngu l'ụpfu dụru iya.

¹⁸ Ọdumeka bẹ Chipfu a-nụmakwa ọchi ono ịichi iya ono; l'ọ dụ iya ẹji; l'ọ parụ onye ono haa; ọ tọ dụedu iphe, o mekwadụ iya.

¹⁹ G'iphe, eme l'ẹhu ndu eme ẹjo-ememe te erwujekwa ngu l'ẹhu. Ọphu i kojekwaru ndu ẹjo-iphe okophoo.

²⁰ Kẹle onye ẹjo-ememe be e tee bukwa obunggo-ọma. Tẹme orọku onye ẹjo-iphe je l'eme tsụrikitiki.

²¹ Nwa mu; tsụjekwa Chipfu ebvu; l'ịitsukwapho onye eze ebvu. Ọphu i tsokwa ndu ekwefujeru phẹ ike;

²² kẹle Chipfu yẹe onye eze ono bẹ e-mekwa g'ọla-l'iswi tụ ngu l'ụpfu. ?Bụ onye maru gẹ mgbupya phẹ e-jeberu phẹ l'ẹhu?

²³ Ndu ọwa-a bụkwapho opfu, shikwaphọ ndu mmamiphe l'ọnu: Abọ nemadzụ ẹbo mẹ a -nọdu ekpe ikpe ta adụkwa ree.

²⁴ Mbụ l'onye sarụ ọnu sụ onye-ikpe nmarụ l'ọo ya bẹ iswi dụ mma bẹ ee-phukwa iphu lẹ mkpụkpu lẹ mkpụkpu; tẹme ọhamoha ajịkakota iya.

²⁵ Obenu l'ọo-dụru ndu ono lẹ ree; mbụ ndu ekpeje ikpe nmaa ya onye o rwuberu. Ndu ono bẹ ee-kebe l'ọma ọkpobe ekebe.

²⁶ Epfu ire-lanụ gude yee ọnu l'opfu bụkwa n-yemobu bẹ ọ bụ.

²⁷ Vukpọadaru ụzo jechaa ozi, dụru ngu l'etezi; L'ị bya ejeẹbekpoo ozi, dụru ngu l'ẹgu; tẹme l'ị watawarọ akpụ ụlo ngu.

²⁸ B'agbakwaru nwibe ngu ekebe l'ẹbe ọ dụ iphe, o meru. Ọphu i gudekwa ọnu ngu ono duphua nemadzụ.

²⁹ B'asụkwa l'ii-melata iya iphe, o meru ngu; l'ịi-pfụ nwoke ono ụgwo iphe, o meru.

³⁰ Mu ghatajẹru ẹka onye ẹnyiru kọru opfu. Mbụ lẹ mu jeru je eshisweta opfu-vayịnu onye enwedu egomunggo.

³¹ Ọ tụkoepho ẹkameka fukọta ẹwu-óbvú kẹ garawuu. Tẹme ẹswa mmanụ tụko opfu ọbu nata. Igbulọ mkpuma, e shi gude gbaa ya mgbabu dakashihụchawaa.

³² Mu bya awata arị iphe ono, mu hụmaru ono l'ime ọkpoma mu; bya egude iphe ono, mu hụmaru ono gude nwụta iphe.

³³ L'ọ bụ: I -kua mgbẹnya nwanshịi; mgbẹnya rwee ngu nwanshịi. Mbụ-a; ị -chikọbe ẹka nwanshịi sụ g'ị tụta unme;

³⁴ akpa nri afụaru ngu g'onye abalidebvu byaru ibe iya. Mbụ ẹjeka adụe ngu phọ g'onye nwoke ibe iya chị ngwọgu bapfuta.