Ẹkwo Ẹtu 23 - BAYỊBURU Izii

¹ Unu l'onye bụ ishi -tụko nọdu abya erigba nri; makwarụ ẹgube onye gụ l'iya nọ.

² Wokwaru mma dabẹ onwongu l'ẹkpiri mẹ ị -bụru onye ẹkpiri.

³ B'aphụkwaru nri, ọonu ngu kpaakpaakpaa; kẹle nri ono bụkwa nri ọhutama.

⁴ B'emebyishikwa onwongu lẹ g'ii-me nweru iphe. Makwarụ iphe jetajẹ ghaa ẹnya.

⁵ Kẹle ẹku abụjekwaru: a -bya ajị ẹnya birimu l'ọ bụwaru phuchamu. Ẹphe asashịchaa ẹ́bà g'ugo phehuchaa pheba l'akpaminigwe.

⁶ B'erijekwa nri, onye ụswara shiru; mbụ g'ẹguru iphe, o shiru ta agụjekwa ngu ẹgu;

⁷ kẹle ọ kwa g'ọriri, dụ iya bụ g'ọ gbaru. Ọo-ngụkpokwaru ngu nri sụ ngu: “Riarọ nri! Nggẹro ngụa!” Ọle iphe ono, oopfu ono bẹ oopfukọta l'eli ọnu.

⁸ I -ria ya bẹ ịi-gbọkwa nwọphu i riru. Ajaja, ị jaru iya abụru ngu ọla-l'iswi.

⁹ B'epfujekwa opfu yeru ọmata; kẹle oo-wokwaru mmamiphe ono, shi ngu l'ọnu ono nmaa phulaphula.

¹⁰ Ta aphọfukwa mkpuma, a kpọberu e -shi lẹ ndiche gude kpaa oke alị. Ọphu i gbuswetakwa ókè bahụ l'alị onye nna iya anọedu;

¹¹ kẹle onye agbarụ iya mkpu shihunụkakwaru ike. O je l'e-mechakwaa gbaaru iya ọdzori.

¹² Ngabẹje nchị nwụta iphe, eezi ngu. Mbụ-a; wojeru nchị gboberu opfu onye maru iphe.

¹³ B'ahakwa ahụ̀ nwata ahụ̀hù, gbaru iya nụ; l'ọ tọo nwụhukwa mẹ i chia ya iphe.

¹⁴ Chia ya rọ ẹchachi dzọtachia ndzụ iya g'ọ tọ la maa.

¹⁵ Nwa mu; iphe, e-me g'ẹhu tsọo mu ụtso bụkwa l'ị bụ onye maru iphe.

¹⁶ Mbụ l'ime obu mu bẹ ẹhu a-tsọ ntụmatu mẹ ọnu ngu -nọdu epfuje-a iphe, pfụru nhamụnha.

¹⁷ B'ekwekwa g'i gude obu ngu koaharụ ndu iphe-ẹji okophoo. Iphe, a-nọduje evu ngu evuvu bụchikwaaru atsụ Chipfu ebvu.

¹⁸ Noo l'ị maru l'iphu a-dụru ngu lẹ ree. Ọphu iphe ono, agụ ngu nụ ono ejedu mgbabirishi.

¹⁹ Ngabẹ nchị nwa mu; maru iphe. Wojeru obu dobe l'ụzo, pfụru ọto.

²⁰ B'etsokwa ndu ngụnukaru mẹe; ọzoo ndu rinụkaru nri.

²¹ Kẹle ndu ngụnukaru mẹe yẹe ndu ẹkpiri akpajẹkwa nri. Mbụ l'ẹnyiru e-mechakwaa nmabẹ phẹ nkịrika ẹkwa.

²² Ngabẹjeru nna ngu nchị; mbụ onye ono, bụ iya yeru ime ngu ono. Ọphu ị sụkwa lẹ ne ngu ta adụedu iphe, ị gụberu iya opfu l'ọ bụwaa ọgerenya.

²³ Zụta ire-lanụ! Be rephukwa iya azụ! Maru iphe! Bụru onye a hụ̀ru àhụ̀hù; yẹe onye iphe edoje ẹnya.

²⁴ Nna onye pfụberekoto bẹ ẹhu atsọje ụtso shii. Tẹme onye maru iphe nọdu adụje onye nwụru iya nụ ree.

²⁵ Gẹ nna ngu yẹe ne ngu tekwaa ẹswa ẹhu ngu! Mbụ-a; g'onye ono, hụru mgbụ ngu ono tekwaa ebvu ẹhu ngu!

²⁶ Nwa mu; worurọ ọkpoma ngu nụ mu! G'ẹnya dụnu ngu l'iphemiphe, mu eme.

²⁷ Kẹle nwanyị-ovuọba bụkwa iduma, dalahụru tukirima. Nwanyị, eme ẹji bụru obvu, tụru ẹnu omilomi.

²⁸ Ọ kwa gẹ ndu abalidebvu akwabẹjeru nemadzụ l'ẹgbudu-a bụ g'ọonoduje kwabẹ. Tẹme ọ nọdu emeje gẹ ndu e gudedu ire phẹ ẹka paa igwerigwe l'echilabọ ụnwu-eliphe.

²⁹ ?Bụ onye bụ onye a tụru ọnu? ?Bụ onye anọduje agụ aphụ? ?Bụ onye esephe opfu opfu? ?Bụ onye epfuphe l'e mee ya ọphuu mee ya ọphuu? ?Bụ onye bẹ eemekajẹ iphe-ẹheni? ?Bụ onye bẹ ẹnya eke meemee?

³⁰ Ọo ndu anọje ẹriri nggẹringge lẹ mẹe. Ndu etsojeru aghaphe achọ mẹe, a gwagheru agwaghe.

³¹ Te elejekwa mẹe ẹnya teke ooke uswe-uswe; teke ọota kpịtikpiti l'okoro, e yeru iya; teke ọ tọru nwẹhu alwa kpẹtee.

³² E -mechaa bẹ ọotaje ẹru g'agwọ. Ẹru iya nọdu ereje ire g'ẹru ogiji.

³³ Noo teke ẹnya ngu a-wata ahụma iphe, dụ ọduge. Egomunggo ngu awata arị iphe, gbachịru ẹnya.

³⁴ Noo teke ịi-dụ g'onye zẹ azẹe l'echilabọ eze-ẹnyimu; mbụ g'onye zẹ l'eli iphe, e bvuberu l'eli ụgbo-mini.

³⁵ L'ị wata ara sụ: “Ẹphe etsugbua mu-o! Ọle e te mekakwaru mu iphe. Ẹphe etsukwa mu otsukputu; ọle o to rwudu mu l'ẹhu. ?Bụ teke ole bẹ mu a-gbalihukpọo? Mu -gbẹshi bẹ mu a-watakwa achọ mẹe ọzo.”