Ẹkwo Ẹtu 22 - BAYỊBURU Izii

¹ Ọkpobe ẹpha kakwa ree ahata eme l'enweru iphe, parụ ẹka. Tẹme eme odoo ka mkpọla-ọchaa yẹle mkpọla-ododo ree.

² Iphe lanụ, dụ l'ẹhu onye nweru iphe bya adụ l'ẹhu onye akpa nri bụ l'ọo Chipfu mekọtaru ẹphenebo.

³ Onye nweru egomunggo ahụmaje iphe, bụ ẹjo-ememe domia onwiya. Obenu onye amazidu iphe anọdujeepho eje dukuu dukuu g'ooje jeye l'ọdalahu l'iphe-ẹhuka, nọ iya nụ.

⁴ Ewoze onwonye alị yẹe atsụ Chipfu ebvu l'emeje g'e nweru iphe; tẹme ọ nọdu emeje g'a kwabẹ amadụ ùbvù bya emekwaphọ g'e nweru ndzụ.

⁵ Iphe, a tọru l'ụzo, onye ẹjo-iphe eshi bụkwa óbvú yẹle ọ́nyà. Obenu l'onye eche ndzụ iya nche bẹ anọduje iphemiphe ono ụzenya.

⁶ Zia nwata ụzo, gbaru iya l'eshishi. Ọ -bụerupho ọgerenya; ọ tọ byadu aha iya ahaha.

⁷ Ọo onye nweru iphe abụjeru ishi onye akpa nri. Tẹme ọ bụru onye ji ụgwo abụjeru onye-ozi onye o jitarụ iya.

⁸ Onye akụ eme ẹjo-iphe g'akpụru iphe bẹ bụ iphe, ọonoduje awọko bụ iphe-ẹji. Tẹme mgbọro ẹhu-eghu, ọ pa e-mechaa darwua alị.

⁹ Onye eme iphe-ọma shii bẹ aa-gọru ọnu-ọma nụ; kẹle oowojeru nri iya ekeru ndu ụkpa.

¹⁰ A -chịa onye mgbọnu; opfu alaa.

¹¹ Onye yeru ọkpoma charachara obu; tẹme opfu iya nọdu adụje bẹlebele bẹ e-shita onye eze ọ̀nyà.

¹² Chipfu anọduje eleta ẹnya g'ọ tọ dụ iphe, e-me onye maru iphe. Obenu l'opfu onye eegudedu ire iya ẹka bẹ oomeje g'ọ tọ dụ iphe, ọo-bụ.

¹³ Onye ẹnyiru asụje: “Tụswekwa! Oduma nọkwa l'ụzo! Oo-gbukwa mu mẹ mu lụfu gbororo!”

¹⁴ Ọnu nwanyị ovuọba bụkwa iduma, dụ wukirima. Ọ bụru onye Chipfu atukoshi oke ẹhu-eghu iya a-daba iya.

¹⁵ Eme eswe swekọkwaru onwiya nọdu l'ọkpoma nwatanshịi. Ọ bụru ẹchachi, e gude ahụ̀ iya ahụ̀hù l'a-chị-mihu iya g'ọ tọ dụhe iya.

¹⁶ Onye eme onye ụkpa ewere gẹ ya a-ka enweru iphe; yẹle onye anọduje anụ ndu nweru iphe iphe; e-mechaa tụko bụru ndu ụkpa.

Akpụru opfu ụkporo l'iri, shi l'ọnu ndu maru iphe

¹⁷ Ngabẹ nchị nụma olu-opfu ndu maru iphe. L'i woru ọkpoma ngu kpọru ye l'iphe, mu ezi.

¹⁸ Noo kẹle ọo-dụru ngu lẹ ree mẹ i woru iya dobe l'ime ọkpoma ngu. L'ị kpụkwaru iya phọ l'ọnu tekenteke.

¹⁹ Ọo ya bụ k'ọphu ịi-kporu obu yeru Chipfu. Ọ kwa mu ezi gụbedua gẹdegede iphe ntanụ.

²⁰ Ẹtu ẹtu ọbu, mu ezi ọbu bẹ mu dekwaru edede l'ẹkwo deta iya ụkporo l'iri; mbụ akpụru-opfu, l'agba amadụ unme; tẹme ọ bụru opfu, bụ: i -mee ya l'ọ dụru ngu lẹ ree.

²¹ Ọ bụ opfu, mu pfuru gude zia ngu ọkpobe opfu; yẹe opfu, gbaru k'adakobe; k'ọphu ịi-maru ọkpobe ọnu, ii-yeru onye ziru ngu nụ.

²² B'anakwa onye ụkpa nwọphu o nweru opfu l'ọ tọ dụdu g'ọ dụ iya. Ọphu i gwekwa onye iphe-ẹhuka byaru arakabya l'ụlo-ikpe.

²³ Kẹle Chipfu e-mechakwaa gbaaru phẹ ọdzori; gude ndu ono, shi ana phẹ nfụ ono nalata phẹ nfụ nkephẹ.

²⁴ Gẹ gụ l'onye obu-ọku te eshikwa ọ̀nyà. Ọphu unu l'onye ẹhu eghuje eghu ẹgwegwa aswịkwa ọswi.

²⁵ Ọ -dumeka bẹ ịi-nwụkwa ẹka iya; l'i je adalahụ l'iphe, ị gbadụru ẹnya iya.

²⁶ B'abụkwaru onye eyeje ẹka l'eye iphe l'itumo. Ọzoo onye anajẹ oji-ụgwo mkpalẹka;

²⁷ kẹle i nwedu iphe, ii-gude pfụa ya; bẹ aa-pachakwa paa iphe, ị zẹje azẹe.

²⁸ Ta aphọfukwa mkpuma ndiche unu phẹ gude kpaa oke alị.

²⁹ Ị -hụmakpoo onye chịru ụpfu yee l'ozi, ooje ejeshi iya ike; maẹrupho l'oo-mecha jeeru ndu eze ozi. O too jeduru ndu aamadụ ẹpha phẹ ozi.