Ẹkwo Ẹtu 21 - BAYỊBURU Izii

¹ Ọkpoma onye eze bụkwa nggele, nọ l'ẹka Chipfu, bụ ẹka Chipfu sụru g'ọ sọru shia bẹ ooshije.

² Iphemiphe, nemadzụ eme apfụjeru nhamụnha l'ẹnya onye ọbu. Obenu l'ọo Chipfu maru obu onyemonye.

³ Eme iphe, dụ ree bya apfụru nhamụnha bẹ Chipfu kakwa anata eme l'egweru ngwẹja nụ iya.

⁴ Ekobe ẹnya l'eli waa ekunuka onwonye; mbụ ororo, ndu ẹjo-iphe atụ bụkotakwa iphe-ẹji l'iphu Chipfu.

⁵ Iphe, onye akanya chịru idzu ememe bẹ eeritajẹ urwu. Nokwaphọ g'achị iphe ọku atụje ụkpa.

⁶ Ẹku, a kparụ lẹ tuphutuphutuphu ta adụdu g'ọono-bejeru l'oophukashịhu. Tẹme ndu akpa ẹku l'ụzo, dụ nno bụ ọnwu bẹ ẹphe achọ.

⁷ Ọo ẹhuka ẹhuka, ndu ẹjo-iphe eme bẹ e-kpofu phẹ ekpofu. Kẹle ẹphe jịkaru eme iphe, pfụru nhamụnha.

⁸ Ndu ẹjo-iphe bẹ anọduje eshi ụzo, apfụduru-ọto. Obenu l'umere onye iswi dụ mma apfụjeru nhamụnha.

⁹ Ọ kakwa ree g'ị kwata je eburu lẹ mgborụlo eme lẹ gụ lẹ nwanyị, anọduje abaphe mba tekenteke bu l'ụlo.

¹⁰ Obu onye ẹjo-iphe bụepho ẹjo-iphe anọduje evu iya evuvu ememe. Ọphu ọophujeduru ndu ẹphe l'iya bu obutobu obu-imemini.

¹¹ A -hụ̀a onye mgbọnu ahụ̀hù; onye amazidu iphe egude iya nwụta iphe. Teke ị kpọ-ziru onye maru iphe ụzo; yẹbedua l'onwiya egude iya kabaa amaru iphe.

¹² Onye ono, pfụberekoto ono tụbekwaru nvọ l'iphe, oo-me ụlo ndu ẹjo-iphe. Mbụ l'ọopalitaje phẹ tụa gbaa; ẹphe abụru mkpurupyata.

¹³ Onye tsuchiru nchị gẹ ya ta nụma olu-ẹkwa onye ụkpa l'a-ranaa nkiya ujiku lanụ; ọ tọ dụdu onye angaru iya nchị.

¹⁴ Iphe-ọma, e meru lẹ mpya egboje ẹhu-eghu. Tẹme ụphalazu, a phabẹru l'uwe nụ nọdu echinyịjekwapho oke ẹhu-eghu.

¹⁵ E -kpee ikpe, pfụru ọto bẹ ọotsoje ndu pfụberekoto ụtso. Ọ nọdu eyejekwanụ ndu ẹjo-iphe ebvu.

¹⁶ Onye lekeberu ẹnya haa eshi ụzo nkwamẹnya je eshia ụzo ọzo bụ ẹka oojeje atụtu unme bụ l'ẹka ụnwu maa tụru ndzukọ.

¹⁷ Onye yeru obu l'ẹmereme l'e-mechaa kpaa nri. Ọphu onye yenụkaru obu lẹ mẹe yẹe manụ abyadụ abụru onye nweru iphe.

¹⁸ Ndu ẹjo-iphe l'alajẹ l'ọchi ndu pfụberekoto. Nokwaphọ gẹ ndu e gudedu ire phẹ ẹka adabajẹru ndu obu phẹ gụru ìphóró.

¹⁹ Ọ kakwa ree g'ị kwata je eburu l'echiẹgu eme l'ịilu nwanyị, gụ l'iya bụ; ẹhu nọdu anọduje eghu iya eghu; ọ nọdu anọduje abaphe mba tekenteke.

²⁰ L'ụlo onye maru iphe bẹ eenwejeru mkpuru, ọkpobe nri dụ mẹ ọkpobe manụ. Obenu l'ọmata atụkoje iphe, o nweru rifu.

²¹ Onye achị nta apfụbekoto yẹe nta n-yemobu l'achọtaje ndzụ. L'ọokpaa ẹku bya abụru onye akwabẹ ùbvù.

²² Onye maru iphe bẹ adụje ike tsoo mkpụkpu onye ike ọgu; kwatsushia akpaa akpaa, ẹphe kpọ-pheru onwophẹ dakobe.

²³ Onye eche ọnu iya nche bya eche ire iya nche bẹ ezehujeru ọla-l'iswi.

²⁴ Onye eku onwiya bya etse etsetse bẹ ẹpha iya bụ onye mgbọnu. Onye ono bẹ umere iya l'ophu abụkotajeru eku-onwonye eku-onwonye.

²⁵ Ọ kwa iphe, agụ onye ẹnyiru egbuje iya; kẹle ẹka iya ẹphenebo te ekwedu eje ozi.

²⁶ Mbọku-mbọku bụ iphe, anọduje agụ iya nụ bụ g'ọ kabaa enweru iphe. Obenu l'onye pfụberekoto emeje iphe-ọma mịa ya ẹnya.

²⁷ Ngwẹja, onye ẹjo-iphe egwe bụkwa ẹbyi bẹ ọonoduje eme. Ọphu ọ bụro onye eje epfu k'ọphu o gude ẹjo egomunggo bya egweeru iya.

²⁸ Onye agba ekebe, abụdu ọkpobe opfu a-bụkwaru ọla-l'iswi. Tẹme onye ngabẹru iya nchị bẹ ee-mebyishikwa jasụ l'ojejoje.

²⁹ Onye ẹjo-iphe bẹ agbanwụbeje iphu ẹhuka ẹhuka. Obenu l'onye obu iya gụru ìphóró l'emeje g'ụzo iya ngụru angụru.

³⁰ Ọ tọ dụkwa mmamiphe; ọzoo iphe edo ẹnya; ọzoo idzu, aachị achịchi, aa-sụ l'ọo g'e mee ya mebata Chipfu.

³¹ Ịnya bụ iphe, e meru iya kwabẹru bụ mbọku eje ọgu. Obenu l'onye bụ iya bụ l'e mekpee l'ọgu ọbu bụ Chipfu.