Ẹkwo Ẹtu 20 - BAYỊBURU Izii

¹ Onye mgbọnu bẹ mẹe bụ; mbụ lẹ mẹe, atsụ atsụtsu bụkwa onye aba hanyịhanyi. Onye o duphuru ụzo ta amakwa iphe.

² Ẹhu -wata eghu eze eghu bẹ ọodujekwa g'ẹka oduma asụ ekiri. Onye kpatsukwanụru iya iwe tuphawaru ndzụ iya.

³ Onye agbalarụ opfu l'ụzo bẹ ùbvù anọdujekwa etso. Obenu l'ọo onye-eswe akwagebeje akwagebe aba mba.

⁴ Onye ẹnyiru ta akọjedu opfu teke aakọje iya. O -rwua l'akpakpa iya l'ọ wata arwọ arwọ; ọ tọ dụdu iphe, ọo-rwọta.

⁵ Iphe, nemadzụ rịru dobe l'ọkpoma dụkwa g'ọ nọ l'ogbu-mini. Ọ bụru onye iphe edoje ẹnya ree atsụtaje iya.

⁶ Ndu dụ igwerigwe asụje l'ẹphe nweru n-yemobu. Ọle ?bụ awe bẹ ịihumakwanu onye apfụshije ike l'iphe, o pfuru?

⁷ Onye pfụberekoto bẹ ụta ta adụjedu l'iphemiphe, oome. Ọ -nọchaa laa; ụnwu iya abụru ndu a gọru ẹhu-ụtso nụ.

⁸ Onye eze -nọdu l'aba-eze iya ekpe ikpe bẹ ọ hụmaje ẹjo-iphe hụbe iya ama.

⁹ ?Bụ onye a-sụ l'obu dụebe iya sarịsari; lẹ ya dụebe ree ọphu ya teke meswee iphe-ẹji?

¹⁰ E -gude iphe-ụghoshi gude atụ ẹrwa iphe; ọzoo atụ ogologo iya bụkotaepho ẹbyi l'ẹnya Chipfu.

¹¹ Ọo umere nwa atụje ọnu iya. Oomeje g'a maru ?umere iya guru egugu bya apfụru nhamụnha?

¹² Nchị, anụ iphe; yẹe ẹnya, aphụ ụzo bụ Chipfu tụkoru iya mee.

¹³ Gẹ mgbẹnya ta atsọnukajekwa ngu ụtso; ọdumeka bẹ ịi-kpakwa nri. Nwụjeru ẹnya; hụma l'ii-nweru nri nweru k'etsutsu iya.

¹⁴ Onye azụ aswa asụje l'aswa, ọozu renụkaru ire. Ọle ọ -tụgbuepho l'o gude iphe ọbu, ọ zụru ọbu kuahaa onwiya.

¹⁵ Mkpọla-ododo dụ; mkpuma, oke aswa dụ tụko ẹkameka. Obenu l'ọnu, epfu opfu, egoshi mmamiphe bụkwa ọ-dụ-ụko-lẹ-mba.

¹⁶ Nemadzụ -sụ l'ọo onye ọ madụ bẹ ya a-nọduru l'itumo; natakwa iya uwe iya. Gudeshikwaa ya mẹ ọ -bụru onye ọhozo bẹ ọ nọru l'itumo ọbu.

¹⁷ Nri, a kparụ l'ụgho atsọje ụtso mẹ a -nọdu eri iya. Ọle e -mechaẹpho; ọnu abụru onye riru iya nụ ẹjirija.

¹⁸ Ị -nọdu achị idzu iphe, ii-me; kpajẹada ishi. Teke ịibya eje ọgu; kpaada ishi g'e goshi ngu g'ii-me iya.

¹⁹ Onye asụ asụlasu l'edoje iphe, a sụru iya g'ọ tọ dụkwa onye oo-doru iya. Ọo ya bụ; ị -hụma onye phenụkaru opfu; kparụ iya l'aphara.

²⁰ Onye ephu nna iya; ọzoo ne iya iphu bẹ ọku, ọ gụtaru a-nahụkwa iya nyịhu l'echi abalị-ishi.

²¹ Ẹku, a kparụ lẹ gburugburu ta abụkwaru onye kparụ iya nụ iphe-ọma l'ikpazụ iya.

²² B'asụkwa l'ọo gụbedua l'a-pfụ nemadzụ ụgwo iphe-ẹji, o meru ngu. Nọdu kwabẹru Chipfu; l'ọo ya a-dzọ ngu.

²³ Ndu gude iphe-ụghoshi gude atụ̀ ẹrwa iphe bụkwa ẹbyi bẹ ẹphe eme ekpu Chipfu. Mbụ l'egude iphe-ẹregede atụ̀ ẹrwa iphe ta adụdu iya ree.

²⁴ Eshinu ọ bụ Chipfu anọduje akpọ-ziru nemadzụ ụzo; ?dẹnu gẹ nemadzụ e-shi mee g'ụzo iya doo ya ẹnya?

²⁵ Ọ bụkwa agbaru onwonye ọ́nyà mẹ nemadzụ dobe iphe iche sụ l'ọ bụ kẹ Chileke l'ẹbe ọ rị iya arịri. E -mechaa; ọ taaha onwiya ụta iphe ono, o riburu nte iya ono.

²⁶ Onye eze, maru iphe aphụchaje ọha iya g'onye aphụcha ẹswa ereshi shi nno họshia ndu ẹjo-iphe; bya egude iphe, e gude echi ereshi chia phẹ pyakapyaka.

²⁷ Obu nemadzụ bụkwa iya bụ ọku orọku Chipfu. Oogudeje iya avọfutagbaa iphemiphe, dụ nemadzụ l'ime.

²⁸ Onye eze, yeru ndu ọ bụ eze phẹ obu bya apfụbe ire iya ọto l'iphu phẹ ta adụkwa iphe-ọnuka, emeje iya nụ. Ọ bụru n-yemobu emeje g'aba-eze iya ono shihu dụngudungu.

²⁹ Iphe, ụnwokorobya gude etu onwophẹ ẹpha bụkwa ike phẹ. Ẹwó, dụ l'ishi bụkwanuru iphe, ọgerenya gude egbu nwịinwii.

³⁰ Ọ kwa ẹka-nchị yẹe echibashị ọ́nyá l'ẹhu bẹ eegudeje safụ ẹjo-ememe; mbụ l'ọo gbabụgbabu bẹ e gude edozi ime ọkpoma amadụ.