Ẹkwo Ẹtu 2 - BAYỊBURU Izii

Urwu, eerita lẹ mmamiphe

¹ Nwa mu; i -kwe nata opfu mu; bya eworu iphe, mu sụru g'e meje doo l'ime obu ngu;

² mbụ ị -nọdu angabẹjeru mmamiphe nchị; bya eworu obu ngu ziberu nkwamẹnya;

³ ọ -bụru l'i kuru amaru iphe, dụ omilomi; bya echiku nkwamẹnya lẹ mkpu;

⁴ mbụ-a; teke ọogu ngu ẹgu g'onye mkpọla-ọchaa agụ; tẹme ị nọdu achọ iya g'onye achọ ẹku, e domiru edomi;

⁵ ọo ya bụ; atsụ Chipfu ebvu edoo ngu ẹnya; tẹme l'ị makwarụpho Chileke.

⁶ Kẹle ọo Chipfu bụ onye emeje g'a maru iphe; mbụ l'ọo l'ọnu iya bẹ mmamiphe yẹe nkwamẹnya eshije.

⁷ Ọkpobe mmamiphe bẹ ọ kwachiru akwachi doberu ndu obu phẹ gụru ìphóró. Ndu ụta ta adụdu l'iphe, ẹphe eme bụru iya bẹ ẹphe egudeje gbobuta onwophẹ.

⁸ Ụzo ndu pfụberekoto bụru iya anọduje eleta iya ẹnya. Tẹme ọ nọdu anwụbejeru ndu yeru iya obu ẹnya.

⁹ Noo teke oo-do ngu ẹnya; mbụ iphe, dụ ree; yẹe iphe, pfụru ọto; mẹkpoo iphe, bụkpoo ụzomuzo, bụ ụzo, dụ ree.

¹⁰ Noo kẹle mmamiphe a-bahụ l'ime obu ngu; amaru iphe atsọaha ngu ụtso.

¹¹ Ọ bụru iphe, a-nọdu egbochi ngu nụ bụ amaru eye ọnu l'opfu; nkwamẹnya awata ngu awata ngu akpọ-ziru ụzo.

¹² Mmamiphe a-nafụta ngu l'ụzo ndu ẹjo-iphe; bya adzọta ngu l'ẹka ndu opfu phẹ apfụduru-ọto;

¹³ mbụ ndu ahajẹ ụzo, pfụru nhamụnha je etsoru ọchii;

¹⁴ ndu bụ iphe, adụje phẹ ree bụ eme ẹjo-iphe; tẹme eshi ụzo, gberu nggọ nọdu atsọje phẹ ụtso;

¹⁵ mbụ ndu ụzo phẹ l'ophu dụkota nggọdogo nggọdogo; ọphu e gudedu ire phẹ ẹka l'iphemiphe, ẹphe eme.

¹⁶ Ọo-dzọkwa ngu phọ l'ẹka nwanyị-ovuọba; mbụ l'ẹka nwanyị-ụkpara yẹle opfu ẹrengete iya.

¹⁷ Onye lụfutaru l'ibe ji iya, kụru iya lẹ nwamgbọko; bya aghaaru ọgbandzu, ẹphe gbaru l'iphu Chileke okotazụ;

¹⁸ kẹle ụlo nwanyị, dụ ẹgube ono bụkwa ẹka eeshije alụfu alụfu anwụhu; tẹme gbororo ụzo iya bụru ụzo, e shi ala maa.

¹⁹ Ọ tọ dụdu onye jepfujeru iya nụ mechaa lwa; ọzoo mechaa shibaa ụzo ndzụ.

²⁰ Ọo ya bụ lẹ-a; tsoru ẹka ndu eme ree. Shije gbororo, ndu pfụberekoto eshi.

²¹ Kẹle ndu obu phẹ gụru ìphóró l'e-buru l'eliphe. Ndu ụta adụdu l'ẹhu anọdukwa iya phọ.

²² Obenu lẹ ndu ẹjo-iphe bẹ e-mekwa g'ẹphe chịhu l'eliphe. Tẹme ndu e gudedu ire phẹ ẹka bẹ ee-phefu ephefu.