Ẹkwo Ẹtu 19 - BAYỊBURU Izii

¹ Onye bụ onye akpa nri bya abụru onye ụta adụdu lẹ ndzụ iya kakwa ree eme l'ọmata, eegudedu ire iya ẹka.

² Ọ tọ dụkwa ree lẹ nemadzụ bụ onye iphe ehe ihee ọphu o madụ iphe. Ọzoo gẹ nemadzụ gude eme ẹgwegwa je eshiswee ụzo.

³ Eswe, amadụ eme emebyijekwa ndzụ iya; e -mechaa l'o woru iya bobe Chipfu.

⁴ Ẹku -nọdu abya bẹ ọ̀nyà adụje igwe etso iya. Obenu l'ụkpa achịkaje ọ̀nyà.

⁵ Onye agba ekebe, abụdu ọkpobe opfu bẹ ta anahụkwa g'o to je iphe-ẹhuka iya. Ọphu onye adzụje ụka aladu mmanụ g'ọ tọ dụ iphe e-me iya nụ.

⁶ Ikpoto nemadzụ anọduje akpa ụzo g'ẹphe bụru ndu dụ onye-ishi l'obu. Tẹme onyemonye bụru ọ̀nyà onye emejeru nemadzụ iphe-ọma.

⁷ Onye akpa nri bẹ adụkotaje ndu ẹphe l'iya bụ ashị. Nokwaphọ gẹ ndu ẹphe l'iya eshi ọ̀nyà anọduje agbaru iya ọso. Ọonodujekpoo agba etso phẹ arwọ phẹ g'ẹphe shịru; ọle ọ tọ dụedu onye ọphu ọohuma.

⁸ Onye maru iphe eyeje onwiya obu. Tẹme ọ bụru onye iphe edoje ẹnya ree bẹ k'ọma etsoje.

⁹ Onye agba ekebe, abụdu ọkpobe opfu bẹ ta anahụkwa g'o to je iphe-ẹhuka iya. Tẹme onye adzụje ụka l'a-bụkwaru ọla-l'iswi.

¹⁰ Ọ kwa g'ọ tọ dụdu nhamụnha kẹ g'ọmata ri gwọogwoo bụkwapho g'ọ kabaa ẹji g'ohu bụru onye-ishi ụnwu eze.

¹¹ Ọ kwa mmamiphe amadụ emeje g'ọ tarụ iphe nshi. Ọ bụkwarupho onwiya bẹ ookutse mẹ e -mee ya iphe-ẹji; ọphu o yedụru iya rọ ọnu.

¹² Eze -wata aba mba bẹ ọodujekwa g'ẹka oduma asụ ekiri. Obenu lẹ nemadzụ -dụ iya l'obu bẹ ọoduje g'ẹka iji dashịru l'eli ẹswa.

¹³ Nwa, eme eswe bụkwa ọla-l'iswi bẹ ọ bụru nna iya. Nwanyị, anọduje abapheru ji iya mba dụkwapho gẹ mini-odzeru, shi l'ẹswa-ụlo ada paapaa.

¹⁴ Ụlo yẹle ẹku onye eshijekwa l'onye nwe iya nụ sweru nwa iya. Obenu l'ọkpobe nwanyị bụ Chipfu bẹ ooshije l'ẹka.

¹⁵ Ẹnyiru atụje oke mgbẹnya. Ọ bụru onye eme ẹnyiru bẹ ẹgu emeje.

¹⁶ Onye emeje iphe, a sụru g'e meje bụkwa ndzụ iya bẹ ooche nche. Obenu l'onye iphemiphe, oome jiru ẹpho e-mechaa nwụhu.

¹⁷ Onye emeru ndu ụkpa iphe-ọma bụkwa Chipfu bẹ oojie ụgwo. Tẹme ọ bụru Chipfu e-mechaa bua ya nggo iphe, o meru.

¹⁸ Hụ̀je nwa ngu ahụ̀hù; teke iile ẹnya l'ịi-hụ̀ta iya iphe. B'ejekwa egude g'ooghu ngu l'ẹhu woru iya chigbua.

¹⁹ Ọ kwa onye obu-ọku bẹ obu-ọku iya ebutajẹ. Ị -dzọo ya lẹ nanụ; bẹ ị dzọjenu iya phọ l'ọzo.

²⁰ Nụjeru nemadzụ opfu; ngabẹje nchị nata iphe, aalọru ngu ẹka lẹ nchị iya; l'e -mechaa bẹ ịi-bụru onye maru iphe.

²¹ Amadụ enwejekwaru ikpoto iphe, ọonoduje arị k'ememe; obenu l'ọo ọphu Chipfu chịru dobe mefụtaje.

²² Iphe, agụje ẹgu l'ẹhu nemadzụ bụkwa eme ree ya. Ọ kakwa ree lẹ nemadzụ bụ onye ụkpa eme l'ọ bụ onye ntuphu-ire.

²³ Atsụ Chipfu ebvu edujeru amadụ duba lẹ ndzụ. Ọ bụru teke ọ dụ nno bẹ oojije onye ọbu ẹpho; ọphu ọ dụdu ẹjo-iphe, erwuje onye ọbu l'ẹhu.

²⁴ Onye ẹnyiru abụjeru; o -je etsuta nri; ẹka akwaa ya l'ochi. Ọ tọ dụedu ike apali iya eye l'ọnu.

²⁵ I -chia onye mgbọnu iphe; onye amazidu iphe egude iya nwụta iphe. Teke ị barụ onye iphe edoje ẹnya ree mba; l'o gude iya kabaa amaru iphe.

²⁶ Onye ana nna iya nfụ; bya achịfuje ne iya bụ iphe-iphere; bya abụru mkpatsu-aphụ.

²⁷ Nwa mu; ị -haa angabẹ nchị l'iphe, eezi ngu; l'i phua ụzo amaru iphe.

²⁸ Onye agba ẹjo-ekebe achị iphe, pfụru ọto ọchi. Tẹme ọnu onye ẹjo-iphe bụerupho ẹjo-ememe bẹ ọonoduje elwee kwagbụu kwagbụu.

²⁹ Ndu njọ-opfu bẹ e dobeakwaru iphe, ee-me phẹ edobe. E dobeakwaphọ ẹchachi ala l'okpurukpu ndu-eswe.