Ẹkwo Ẹtu 18 - BAYỊBURU Izii

¹ Onye akpa nkịnyi iya bụepho iphe, ọonoduje achọ bụ iphe, a-dụru iya lẹ ree. Tẹme ọkpobe mmamiphe nọdu eghuje iya eghu.

² Ọmata bẹ nkwamẹnya ta adụjedu ree. Iphe, atsọje iya ụtso bụ g'o pfu iphe, ee-me nụ.

³ Ẹjo-iphe -bya bẹ ntụpya anọduje etso iya. Teke iphe-iphere byaru; ekwe une etsokwaru iya phọ.

⁴ Opfu, shi nemadzụ l'ọnu abụjeru echi ogbu-mini. Obenu l'ishi ẹka mmamiphe futaru bẹ bụ nggele, asọ gborogboro.

⁵ Ọ tọ dụkwa ree; mbụ eme eyeru onye ẹjo-iphe. Ọphu ọ dụkwapho ree; mbụ anma onye adụdu iphe, o meru ikpe.

⁶ Iphe, ọmata pfutaru l'ọnu bẹ yẹe ya emeje. Tẹme ọ bụru ọnu iya ọbu bẹ oogudeje eku ẹchachi oku.

⁷ Ọo ọnu ọmata emebyije iya. Tẹme ogbogboromọnu iya bụru ọ́nyà, e gude anmata ndzụ iya.

⁸ Asụlasu anọduje atsọ ntụmatu. Ọotukoje iphe, bụ ẹhu vọo pfurupfuru.

⁹ Onye tụ-gberu ẹka l'ozi, ooje bẹ yẹe onye emebyishi iphe emebyishi bụkwa nwune.

¹⁰ Ẹpha Chipfu bụkwa ụlo-eli ephekerephe, shihuru dụngudungu. Ndu pfụberekoto nọdu agbabajẹ iya je anọdu; ọ tọ dụedu iphe-ọnuka, emekwadu phẹ nụ.

¹¹ Ụba onye nweru iphe bụ mkpụkpu, ọ kpụru kpụshia ya ike. Ọo ya bụ igbulọ-ephekerephe, ẹphe doberu g'o gbobeje g'ọ tọ dụ iphe, e-me phẹ nụ.

¹² Amadụ bụ eku-onwonye l'ime ọkpoma bẹ ọokpajeru vuru ụzo mẹ ọ -bya l'ala l'iswi. Ewoze onwonye alị bụkwanuru akwabẹ ùbvù bẹ oosetajẹ.

¹³ Onye teke anụmadu iphe, eepfu; o vuwaru ụzo tsẹe ya ọnu bẹ ọ bụ eme eswe bya abụkwaru iya phọ eme iphe-iphere.

¹⁴ Ọ kwa obu nemadzụ esedeje ndzụ iya mẹ iphe nọdu eme iya. Obenu l'obu korofụwa; a taa nyaẹdu iya.

¹⁵ Onye iphe edoje ẹnya ree bẹ bụ iya akajẹ amaru iphe tekenteke. Tẹme onye mmamiphe nọdu angabẹje nchị g'ọ nụma iphe, e-me g'ọ kabaa amaru iphe.

¹⁶ Eme iphe-ọma asụjeru onye eme iya nụ ụzo. Ọ nọdu emeje iya g'o jerwua iphu onye parụ ẹka.

¹⁷ Onye lanụ -vuru ụzo doo edoo l'ọ dụ g'iswi dụ iya mma jasụru onye k'ẹbo abya eyeahaa ọnu.

¹⁸ Iphe, eese opfu bụ: a -tụaru iya ido; opfu alaa; l'eegude nno gboo ndu eseshi opfu ike.

¹⁹ Arwọ-buta nwune ngu, i mesweru kakwa ẹhuka eme l'alwụ ọgu lwụta mkpụkpu, kpọru akpaa. Tẹme opfu, gụ lẹ nwune ngu ese dụkwa g'e gude ígwè kpaa ọguzo yechia ọnu-ụlo, a kpụshiru ike.

²⁰ Nemadzụ egudeje opfu-ọnu pfutaru onwiya iphe, e-ji iya ẹpho. Ọ bụru iphe, shi iya l'ogbogboromọnu bẹ oogudeje kpajia opfuru.

²¹ Ire tụkokwaru ike kẹ ndzụ yẹe k'ọnwu chịru. Ọ bụru ndu yeru iya obu e-ri mebyi, ọ mịtaru.

²² Onye achọ nwanyị, ọo-lụ achọkwa iphe, dụ ree. Onye ono abụjekwaru onye dụ Chipfu l'obu.

²³ Onye akpa nri anọduje arwọ g'a phụaru iya obu-imemini. Obenu l'onye nweru iphe anọduje aba mba.

²⁴ Onye eshi igwerigwe ọ̀nyà e-mechakwaa laa l'iswi. Obenu l'o nweru ẹguru ọ̀nyà, akajẹ ngu anọ ntse eme lẹ nwune ngu.