Ẹkwo Ẹtu 16 - BAYỊBURU Izii

¹ Iphe, nemadzụ rịru l'ọkpoma iya bụ iya bẹ ọ dụru. Obenu l'ọphu e pfuru l'ọnu bụ Chipfu bẹ ọ dụru.

² Iphemiphe, nemadzụ emekpọo dụebe ree l'ẹnya nkiya. Obenu lẹ Chipfu maru iphe, dụ iya l'uche teke o meru iya.

³ Woru iphe, bụkpoo iphe, iimekpọo ememe ye Chipfu l'ẹka; hụma l'iphe, bụkpoo iphe, ị chịru idzu ememe e-mejeẹpho g'ị chịru iya.

⁴ Iphemiphe, Chipfu meru bẹ o meru doberu onwiya; mbụ je akpaa lẹ ndu ẹjo-iphe bẹ o meru doberu eswe eze iphe-ẹhuka.

⁵ Ndu eku onwophẹ bụkwa ẹbyi bẹ ẹphe eme l'ẹnya Chipfu. Ọphu ịi-makahụkporu bụ l'a taa hadụ phẹ g'a ta hụ̀ phẹ ahụ̀hù.

⁶ Ọo n-yemobu yẹe epfu ire-lanụ bẹ e gude edoshi ẹjo-iphe. Ọ bụru atsụ Chipfu ebvu emeje g'amadụ te eme ẹjo-ememe.

⁷ Teke iphemiphe, nemadzụ eme dụ Chipfu ree bẹ oomejechaa mee gẹ yẹe ndu ọhogu iya dụ lẹ ree.

⁸ Ọ kakwa ree l'e nweru iphe nwanshịi; a pfụbekwanu ẹka ọto; eme l'urwu parụ ẹka; ọ bụru l'ụzo, apfụduru-ọto bẹ o shi.

⁹ Iphemiphe, nwoke e-me bụ l'ime ọkpoma iya bẹ ọorije iya dobe. Obenu l'ọo Chipfu emeje gẹ nzọkpa iya ngụru angụru.

¹⁰ Onye eze bẹ opfu, shi iya l'ọnu adajẹ g'ozi, shi Chileke l'ẹka. Ọphu oogudejedu ọnu iya pfuswee m'ọ nọdu ekpe ikpe.

¹¹ Chipfu eele ẹnya g'e gudeje iphe, gbaru nụ tụ̀a ẹrwa iphe; ẹrwa iphe, atụ̀tuduru l'ụzo ẹregede bẹ dụ Chipfu ree. Ọ-nyị-tụ́dúú, nọkota l'ẹda g'ọ ha bụkota iya meru iya.

¹² Ndu eze bẹ eme ẹjo-iphe abụjeru ẹbyi; kẹle onye eze bụ apfụbekoto bẹ oogudeje mee g'ọ ngụru angụru.

¹³ Iphe, adụje ndu eze ree bụ onye epfu iphe, pfụru ọto. Mbụ l'onye epfu iphe, pfụru nhamụnha bẹ ẹphe agụbeje ọkpobe iphe.

¹⁴ Oke ẹhu-eghu onye eze bụkwa iphe, ejeru ọnwu ozi. Obenu l'onye maru iphe abyanyịje iya.

¹⁵ Iphu -tụsahu onye eze; l'a maru lẹ ndzụ dụ; mbụ l'ị -tụba onye eze l'ẹnya bẹ ọ dụje g'ẹka igwe rwuru erwurwu k'edze mini ishi-apha.

¹⁶ Hụmawaro g'ọ kabe ree enweru mmamiphe eme l'enweru mkpọla-ododo. Mbụ ahọta nkwamẹnya haa mkpọla-ọchaa.

¹⁷ Ụzo, a tụru mkpoli, ndu pfụberekoto tọru te eshitajẹkwa ẹka ẹjo-ememe dụ. Onye eche ụzo iya nche bụ ndzụ iya bẹ ooche nche.

¹⁸ Eku-onwonye evujeru ụzo; ọla-l'iswi etso iya. Teke etu onwonye ẹpha gbẹshiru; adarwu alị etsokwaru iya phọ.

¹⁹ Ọ kakwa mma l'ị bụ onye wozeru onwiya alị; ị yịru lẹ ndu dụ àgù; eme l'unu lẹ ndu eku onwophẹ swị tụko eke iphe, unu kwatarụ l'ọkwata.

²⁰ Onye angabẹje nchị l'opfu Chileke bụ k'ọma anọduje etso iya. Tẹme onye a gọru ẹhu-ụtso nụ bẹ ọ bụ; mbụ onye dakoberu Chipfu.

²¹ Ndu maru iphe l'ime obu phẹ bụ ndu eekuje ndu iphe edoje ẹnya ree. Tẹme opfu, atsọ ụtso lẹ nchị nọdu emeje g'a ka anwụta iphe.

²² Nkwamẹnya bụ ishi nggele mini ndzụ l'ẹhu ndu nweru iya nụ. Obenu l'abarụ onye-eswe mba bụkwa iphe-eswe bẹ ọ bụ.

²³ Ọkpoma onye maru iphe anọduje eche ọnu iya nche. Tẹme ogbogboromọnu iya nọdu emeje g'a nwụta iphe.

²⁴ Opfu, atsọ ụtso lẹ nchị dụ g'ẹbakala manụ-ẹnwu. O meje g'ẹhu tsọ nemadzụ ụtso. Tẹme ọ nọdu emeje g'ọkpu gbakerehu l'iphe-ememe, eme iya nụ.

²⁵ Ọ dụru ụzo, abụjeru: nemadzụ -nọdu eshi iya l'ọoburu iya ọkpobe ụzo. Obenu l'ẹka ụzo ono jeberu bẹ ọ bụ ụzo ọnwu.

²⁶ Ọo iphe, agụ onye akanya anọduje ejeru iya ozi. Ọ bụru ẹgu, agụ iya nụ anọduje akwaru iya ẹvu.

²⁷ Ẹjo nemadzụ anọduje achị idzu eme ẹjo-iphe. Tẹme opfu, shi iya l'ọnu nọdu adụje g'icheku ọku, ata rịriri.

²⁸ Onye ẹregede anọduje akpa opfu. Tẹme onye asụlasu nọdu ebukahụje ndu eshishi ọ̀nyà ike.

²⁹ Onye anọduje eme ndu ọzo mkpawere bụ edephu bẹ ọonoduje edephu nwibe iya; duru iya shia ụzo, adụdu ree.

³⁰ Onye ataburu nwibe iya ẹnya bụkwa ẹregede bẹ ọogba. Tẹme onye tagbabẹru ọnu bụru ẹjo-iphe bẹ ọocho ememe.

³¹ Aka nka bụ okpu-eze, dụ biribiri. Ọ bụru onye ndzụ iya pfụru ọto bẹ oorwuje ẹka.

³² Ọ ka ree l'ị bụ onye atajẹru iphe nshi eme l'ị bụ onye ka ike l'ọgu. Mbụ l'onye esedeje onwiya kakwa ree; eme l'onye alwụje ọgu lwụta Ọha l'ophu.

³³ Ido bụ atụtu bẹ aatụje iya. Obenu l'ọo Chipfu maru iphe, oo-me.