Ẹkwo Ẹtu 15 - BAYỊBURU Izii

¹ Opfu, e pfuru; a tọ nwẹhu yee ya ọnu eselajẹ oke ẹhu-eghu azụ. Obenu l'epfu opfu, eme ẹhuka akpatajẹ ọvuma.

² Ire onye maru iphe emeje mmamiphe g'ọ dụ ree k'anụma. Obenu l'ọnu ọmata bụ iphe, anọduje alwa iya torotoro bụ epfu rwoorwoorwoo.

³ Ẹnya Chipfu dzuru ẹkameka; k'ọphu ọ hụma-dzuru onyemonye; mbụ ndu ẹjo-iphe mẹ ndu ọma.

⁴ Ire epfu iphe, e-me g'e wekọrohu bụkwa oshi, amịje ndzụ gẹ mebyi. Obenu l'ire ụghoshi etsuje ndzụ pyaapyaa.

⁵ Ọo onye-eswe abụjeru; nna iya -baarụ iya mba; o too yedu iya ọnu. Obenu l'onye a hụ̀ru ahụ̀hù; ahụta iya egoshi l'o nweru egomunggo.

⁶ Ụlo onye pfụberekoto bẹ iphe, vu oke aswa dụ igwerigwe. Obenu l'okpoga onye ẹjo-iphe akpata bẹ l'akpatajẹru iya opfu.

⁷ Ogbogboromọnu onye maru iphe anọduje araka nkwamẹnya araka. Obenu l'ọ tọ bụdu g'ọkpoma dụ ọmata bụ ono.

⁸ L'ẹnya Chipfu bẹ ngwẹja, onye ẹjo-iphe egwe abụjeru iya ẹbyi. Obenu l'epfupfu, onye obu iya gụru ìphóró epfu anụ iya atsọje iya rịkpotoo.

⁹ Ụzo ndu ẹjo-iphe abụkotajeru ẹbyi l'iphu Chipfu. Obenu lẹ ndu eme g'ẹphe bụru ndu pfụberekoto bẹ o yeru obu.

¹⁰ Ọ kwa chịipfuu bẹ aa-nụ onye harụ ọkpobe ụzo. Tẹme onye ọ dụkwanu ashị; l'aahụ̀ iya ahụ̀hù l'e-mechakwaa nwụhu.

¹¹ Alị-maa yẹe alị ọla-l'iswi tụkokwaru gheru ọnu l'iphu Chipfu. ?Bụ-chia ọkpoma amadụ te eghedụru ọnu l'iphu iya?

¹² Onye mgbọnu te eyejedu ahụ̀hù aahụ̀ iya obu. Ọphu o jejedu akpata ishi l'ibe onye maru iphe.

¹³ Onye ẹhu atsọ ụtso bẹ iphu atụsahuje atụsahu. Obenu l'onye iwe jiru obu; edejeru yọkoo.

¹⁴ Ọkpoma onye iphe edoje ẹnya ree l'anọduje eme g'ọ maru iphe. Obenu l'ọnu onye bụ ọmata bụ nri iya bẹ bụ eme eswe.

¹⁵ Iphe, bụkpoo eswe ndzụ ndu eje iphe-ẹhuka abụkotajeeru phẹ phọ mgburwashị ẹhu. Obenu l'onye ọkpoma atụsahuje atụsahu bẹ tekenteke abụjeru iya ọbo-iphe.

¹⁶ Ọ kakwa ree l'e nweru ẹku nwanshịi; a nọdu atsụ Chipfu ebvu; eme l'ẹku, jiru ẹkameka; ẹgharashi dụkwanu.

¹⁷ Ọ kakwa ree l'iphe, bụ nri, eeri bụa nwẹba, e yeru l'ophe; n-yemobu dụkwanu; eme l'e gburu eswi, tsụru ẹba ata; mkpọmashi dụkwanu.

¹⁸ Onye obu-ọku akpalije opfu akpali. Obenu l'onye atarụ opfu nshi abyanyịje ụswo abyanyị.

¹⁹ Ụzo onye ẹnyiru eshi bẹ eegudeje óbvú tụ-chishia atụ-chishi. Obenu l'ụzo onye obu iya gụru ìphóró eshi abụjeru oji, akwọ tẹretere.

²⁰ Nwata, maru iphe emeje g'ẹhu tsọ nna iya ụtso. Obenu l'ọmata ta adụdu iphe, ọogubeje ne, nwụru iya nụ.

²¹ Eme eswe atsọje onye enwedu egomunggo ụtso. Obenu l'onye iphe edoje ẹnya ree bụ iphe, pfụru nhamụnha bẹ oomeje.

²² Iphe, nemadzụ rịru k'ememe bẹ o to mekọtajekwa mẹ a -chikoshiduru iya ọkpobe idzu. Obenu a -dụ igwe chikoshi nemadzụ idzu l'o mee iphe, ọ tụberu.

²³ Amadụ bẹ ẹhu atsọje ụtso mẹ o -yee ọnu l'opfu ree. Mbụ lẹ-a; l'ọnu, e yeru l'o rwuberu iya atsọje rịkpotoo.

²⁴ Ụzo ndzụ anọduje eje ala l'eli l'eli l'ẹka onye kwarụ ẹnya nọ. Ọ bụru iya emeje g'ọ tọ lwa alị alị larwua alị-maa.

²⁵ Chipfu alashịje ụlo onye eku onwiya. Obenu l'okoke alị nwanyị, ji iya anọedu bẹ ọokpoje ọkpo-kuu.

²⁶ Ọriri, onye ẹjo-iphe rịru abụjeru Chipfu ẹjo ẹbyi. Obenu l'ọphu ndu dụebe ree rịru atsọje iya ụtso.

²⁷ Onye ụghoro bụepho opfu bẹ ọonoduje akpa l'ibe iya. Obenu l'onye kpọru ụphalazu ashị bẹ ndzụ a-dụ.

²⁸ Onye pfụberekoto egudeje ọkpoma iya rịada iphe oo-pfu arịri tẹme l'o pfua ya. Obenu l'ọnu onye ẹjo-iphe bụ njọ-opfu eshije iya alwa torotoro.

²⁹ Chipfu nọ ndu ẹjo-iphe ụzenya. Obenu l'ọonumaje olu ndu pfụberekoto m'ẹphe -pfuru nụ iya.

³⁰ Ẹnya, a tụsaru iphu atụsa lee emeje g'ẹhu-ụtso ji ọkpoma. Tẹme ozi ọma nọdu emeje g'ọkpu gbashịa ike.

³¹ Onye ngabẹru nchị lẹ mba, a barụ iya; mbụ mba ọphu emeje g'a nọdu ndzụ bẹ yẹe ndu maru iphe e-mechaa nọ l'ọkpoku lanụ.

³² Onye ta adụdu iphe, ọ gụberu mba, aabarụ iya bụkwa onwiya bẹ ọ tọ gụbeduru iphe. Obenu l'onye abụjeru; a -nọdu ahụ̀ iya ahụ̀hù l'ọoba iya lẹ nchị enwejeru egomunggo.

³³ Atsụ Chipfu ebvu ezije nemadzụ mmamiphe. Ewoze onwonye alị nọdu esekutaje akwabẹ ùbvù.