Ẹkwo Ẹtu 14 - BAYỊBURU Izii

¹ Nwanyị, maru iphe anọduje edozi ọnu-ụlo iya edozi. Obenu l'onye ọphu bụ onye-eswe anọduje achịkashi iya achịkashi.

² Onye iphe, oome pfụru nhamụnha l'anọduje atsụ Chipfu ebvu. Obenu l'onye ụzo iya dụ nggọdogo nggọdogo ta adụdu iphe, ọ gụberu Chileke.

³ Onye eswe -pfua opfu; ẹchachi abụru iya l'okpurukpu gbaa. Obenu l'ọo ogbogboromọnu ndu maru iphe anọduje eche phẹ nche.

⁴ Ẹka eswi, e gude eje ozi adụdu bẹ ọba adabyijeru iphoro. Ọo eswi -jeshia ozi ike; iphe, a kpatarụ l'opfu akụru akụru.

⁵ Onye agba ekebe, e gude ire iya ẹka ta adzụjekwa ụka. Obenu l'onye agba ẹjo-ekebe bụ ụka bẹ ọonoduje adzụshi.

⁶ Onye mgbọnu achọje mmamiphe; ọ tọ dụdu ọphu ọohuma. Obenu l'amarụ iphe atọjeele-a nwẹhu ejepfu ndu iphe edoje ẹnya.

⁷ Nọdukwa ọmata ụzenya; kẹle ị tịi hụmakwa iya mmamiphe l'ogbogboromọnu.

⁸ Onye nweru egomunggo bẹ bụ iphe, egoshije l'ọ maru iphe bụ l'ụzo, ooshi edoje iya ẹnya. Obenu l'iphe, egoshije l'onye-eswe bụ ọmata bụ l'oogudeje ụghoshi eme iphemiphe.

⁹ Ndu eme eswe egudeje iphe-ẹji agba lẹ mgbọnu. Obenu lẹ ndu obu phẹ gụru ìphóró bẹ ọonoduje agụ g'ẹphe mee iphe g'ọ pfụru nhamụnha.

¹⁰ Ọkpoma nemadzụ l'ẹhu l'ẹhu makọtaru iphe, atsụ iya l'ẹhu. Ọphu ọ dụdu onye yẹe ya agbajẹ mgba l'ẹhu-ụtso, dụ iya nụ.

¹¹ Ọnu-ụlo onye ẹjo-iphe bẹ ee-mechakwaa lwụa. Obenu lẹ nwobu, onye pfụberekoto kpọberu a-nọduepho aja ajaja eje.

¹² Ọ dụru ụzo, abụjeru; nemadzụ -nọdu eshi iya l'ọoburu iya ọkpobe ụzo. Obenu l'ẹka ụzo ono jeberu bụ l'ọnwu.

¹³ Je akpachakpọnu l'achị ọchi bẹ aahajẹkwaru tsua ọkpoma pharamu; tẹme ẹhu nọdu ahajẹru tsọo ụtso tsọba l'iphe-ẹhuka.

¹⁴ Onye ekwetadụru nụ bẹ aa-pfụ ụgwo ụzo, ooshi pfụ-dzua ya ya apfụ-dzu. L'e bua onye ọma obunggo ụzo nkiya l'o dzua edzudzu.

¹⁵ Onye amazidu iphe atụkoje iphemiphe kweta l'onoo g'ọ dụ. Obenu l'onye nweru egomunggo arịjeada ọriri tẹme l'ọ zọbe ọkpa.

¹⁶ Onye maru iphe atsụhuje Chipfu ebvu jịka eme ẹjo-ememe. Obenu l'ọmata edeghajẹru igiji ẹka dobesụ l'ọ tọ dụdu iphe, byaru eme iya nụ.

¹⁷ Onye obu-ọku emeje iphe, onye-eswe onye-eswe. Tẹme a nọdu akpọje onye ẹregede ashị.

¹⁸ Onye amazidu iphe bẹ okiphe iya abụjeru eme eswe. Obenu l'onye nweru egomunggo ekpujeru mmamiphe g'okpu-eze.

¹⁹ Ndu eme ẹjo-ememe e-phoze l'iphu ndu dụ ree; ndu ẹjo-iphe ephoze l'ọnu-ọguzo ndu pfụberekoto.

²⁰ Ndu akpa nri bẹ aakpọje ashị; kpọchaa kpọo lẹ ndu ẹphe l'ẹphe bu obutobu. Obenu lẹ ndu nweru iphe nweru ikpoto ọ̀nyà.

²¹ Onye agụbeduru obutobu iya iphe emekwa iphe-ẹji. Obenu l'a gọru ẹhu-ụtso nụ onye emejeru onye ọ tsụru iphe-ọma.

²² ?Tọbudu ndu achị ẹjo idzu ephuje ụzo? Obenu lẹ ndu achị idzu-ọma bẹ eeyeje obu; tẹme a nọdu emejeru phẹ ire-lanụ.

²³ Iphe, bụkpoo ozi, e jeshiru ike bẹ urwu adụjekwa. Obenu opfu, eepfuẹpho l'ọnu l'ọnu emeje g'a kpaahaa nri.

²⁴ Ẹku onye maru iphe bụ okpu-eze iya. Obenu l'eme eswe k'ọmata bụ iphe, ọomitaje bụ eme eswe.

²⁵ A -gbaa ekebe, bụ ire-lanụ bẹ aadzọje ndzụ. Obenu l'ekebe, aagba ọphu e pfudu ire-lanụ bẹ bụkwa ụghoshi.

²⁶ Onye atsụ Chipfu ebvu bẹ ẹka ọ dakoberu kpọru akpaa. Tẹme ọ bụwaruro ẹka ụnwu iya a-gbabajẹ je anọdu zee ndzụ.

²⁷ Atsụ Chipfu ebvu bụ ẹka mini, emeje g'anọdu ndzụ futaru; ọ nọdu emeje g'amadụ ta anmalahụ l'ọ́nyà, anwụhu gbabẹru.

²⁸ Ọha, tsụru ẹrupfu abụjeru akpabiri eze. Obenu l'oke amadụ, enwedu nemadzụ bẹ iyi yifuru.

²⁹ Onye nweru ọta-nshi bẹ iphe, edoje iya ẹnya pakwarụ ẹka. Obenu l'onye obu-ọku egoshije g'oomebe eswe.

³⁰ Onye doberu ọkpoma guu emeje gẹ ndzụ dụ ogwẹhu. Obenu l'ijiẹnya emeje g'ọkpu, nọ l'ẹhu repyahụ.

³¹ Onye eme onye ụkpa ewere bụkwa Chileke, meru iya nụ bẹ ookwe une. Obenu l'onye emejeru onye adụdu g'ọ dụ iya iphe-ọma bụ Chileke bẹ ọokwabe ùbvù.

³² Iphe, l'enwutajẹ ndu ẹjo-iphe tụa kpurumu l'alị; bụ ẹjo-iphe ono, ẹphe eme ono. Obenu lẹ ndu pfụberekoto nweru ẹka ẹphe a-nọdu zeeru ndzụ m'obeta ẹphe nwụhuchakpoo anwụhu.

³³ Mmamiphe adụje l'iphe, bụkpoo obu ndu iphe edoje ẹnya ree. Mbụ je akpaa l'echilabọ ndu bụ ọmata bẹ oogoshijekwaphọ onwiya.

³⁴ Apfụbekoto ekutse ọha l'ophu. Obenu l'iphe-ẹji bụ iphe-iphere l'ẹhu ọhamoha.

³⁵ Onye-ozi, maru iphe bẹ atụbaje onye eze l'ẹnya. Obenu l'onye-ozi ọphu bụ iphe-iphere bẹ eze atukoshije ẹhu-eghu iya.