Ẹkwo Ẹtu 13 - BAYỊBURU Izii

¹ Nwa, maru iphe; angabẹje nchị lẹ mba, nna iya abarụ iya. Obenu l'onye mgbọnu ta angajẹdu nchị l'ụja, aagbọru iya.

² Nemadzụ egudeje opfu-ọnu pfuta iphe-ọma. Obenu l'onye e gudedu ire iya ẹka bụ iphe, ẹkpiri iya adụje iya bụ eme mkpawere.

³ Onye eche ọnu iya nche bụ ndzụ iya bẹ ooche nche. Obenu l'onye epfugbuje g'ọnu ha iya e-mechaa bụru ọla-l'iswi.

⁴ Onye ẹnyiru bẹ ẹkpiri iphe adụje; ọle ọ tọ dụdu iphe, erwuje iya ẹka. Obenu l'iphe, agụ onye akanya erwuje iya ẹka ọkpobe erwurwu.

⁵ Onye pfụberekoto bẹ iphe, aadzụ ụka adụje ashị. Obenu l'onye ẹjo-iphe bụ iphe-iphere yẹe mkparwụ bụ iphe, oomeje.

⁶ Onye ụta adụdu lẹ ndzụ iya bụ iphe, anọduje eche iya nche bụ apfụbekoto. Obenu l'iphe, emekpeje onye iphe-ẹji bụ eme ẹjo-ememe.

⁷ O nweru onye anọduje eme onwiya g'onye nweru iphe; ọle ọ tọ dụkwa iphe, o nweru. Onye ọphuu anọduje eme g'onye akpa nri; ọle o nwekwanụru iphe nweshia ya ike.

⁸ Ẹku nemadzụ l'a-dụkwa ike gbafụta ndzụ iya. Obenu l'onye ụkpa bẹ e te yejedu ebvu.

⁹ Ìphóró, dụru onye pfụberekoto anọduje enwu phoophoophoo. Obenu l'ìphóró orọku k'onye ẹjo-iphe bụ aphụnyi bẹ aaphụnyije iya.

¹⁰ Eku-onwonye bụ iphe, ọonoduje azụshi bụ aba mba. Obenu lẹ ndu angabẹje nchị l'ìdzù, a chị-koshiru phẹ bụ ndu maru iphe.

¹¹ Okpoga, a kpatarụ l'ụghoshi anọduje ala azụ azụ. Obenu l'onye gude ẹka iya akpa okpoga nwanshịi nwanshịi l'emeje iya l'ọoka shii eje.

¹² Iphe, e leru ẹnya iya nọo ọdu anọduje agbawashị ọkpoma agbawashị. Obenu l'ememe, e meru nemadzụ iphe, oole ẹnya iya adụje g'ọ wọtaru oshi, eerije nọdu ndzụ.

¹³ Onye akpọfu alọ ẹka lẹ nchị akpọfu l'e-je iphe-ẹhuka. Obenu l'onye emeje iphe, a sụru g'e meje bẹ obunggo iya dụru.

¹⁴ Iphe, onye maru iphe ezi dụ g'ẹka mini anụje ndzụ futaru. Oomeje gẹ nemadzụ ta adaba l'ọ́nyà, anwụhu gbabẹru.

¹⁵ Iphe edo ẹnya ọkpobe edodo l'emeje nemadzụ l'ọ dụ ndiphe l'obu. Obenu l'ụzo onye e gudedu ire iya ẹka eshihujeru iya ike.

¹⁶ Onyemonye bụkpoo onye nweru egomunggo emeje iphemiphe, oome l'ọkwenya. Obenu l'ọmata ewojeru eme eswe iya tụa jala.

¹⁷ Onye ẹjo-iphe, e ziru ozi; ọ nọdu eje iya adabajẹ l'iphe-ẹhuka. Obenu l'ozi, e ziru onye e gude ire iya ẹka; ọ nọdu eje iya eguje ẹhu egugu.

¹⁸ Onye ewojeru mba, aabarụ iya arwụtoshi arwụtoshi emechajẹ daba l'ọkpa-nri mẹ l'iphe-iphere. Obenu l'onye a hụ̀ru ahụ̀hù; ọ nụma iya bẹ aakwabẹje ùbvù.

¹⁹ Iphe, agụshi ẹgu ike -mee bẹ ọotsoje obu ụtso. Obenu l'onye gbakụtaru eme ẹjo-iphe azụ; l'eme ẹbyi l'ẹnya ọmata.

²⁰ Onye yẹe ndu mmamiphe aswị ọswi a-bụru onye maru iphe. Obenu l'onye etso ọmata e-je iphe-ẹhuka.

²¹ Ẹjo-iphe ẹjo-iphe aanọduje anwụru ndu iphe-ẹji. Obenu l'ẹka atụtu bụkwanu obunggo ndu pfụberekoto.

²² Ọkpobe nemadzụ akpajẹ ẹku dobe l'e ria ya ria lẹ nwanwa. Obenu l'ẹku, onye iphe-ẹji akpa bụ ndu pfụberekoto bẹ ọokpaje iya edoberu.

²³ Onye akpa nri -kọo opfu bẹ oomehujekpọ; nri adụkpoo dụchaa k'etsutsu iya. Obenu lẹ be ekpe ikpe, pfụru ọto atụkoje iya chịta.

²⁴ Onye esela ẹchachi azụ lẹ ya te echidu iya nwa iya bụkwa ashị bẹ ọ kpọru nwa iya. Obenu l'onye yeru iya obu edeje ẹnya lẹ mini hụ̀a ya ahụ̀hù.

²⁵ Onye pfụberekoto erije nri gudekpọo obu iya kwe l'o jiwaru iya. Obenu l'onye ẹjo-iphe ta adụdu teke ẹgu ta agụdu iya.