Ẹkwo Ẹtu 12 - BAYỊBURU Izii

¹ Onye aabarụ mba; ọ dụ iya ree bụkwa mmamiphe bẹ dụ iya ree. Obenu l'onye ọ dụ ashị l'aahụ̀ iya ahụ̀hù ta amadụ iphe.

² Onye ọma bẹ tụbaru Chipfu l'ẹnya. Obenu lẹ Chipfu anmajẹ onye ẹregede ikpe.

³ Nwoke ta abụkwa eme ẹjo-iphe bẹ oo-gude ngụru angụru. Obenu l'onye pfụberekoto ta adụdu onye e-phefu iya ephefu.

⁴ Ọkpobe nwanyị bụkwa okpu-eze, ji iya kpu l'ishi. Obenu l'ẹjo nwanyị dụ g'ọkpu, rehuru erehuru nọ ji iya l'ẹhu.

⁵ Iphe, ndu pfụberekoto tụberu k'ememe abụjeru iphe, pfụru nhamụnha. Obenu l'ìdzù ndu ẹjo-iphe achị bụkota ụghoshi.

⁶ Opfu onye ẹjo-iphe egepajẹru egeparu achọ onye oo-gbu. Obenu l'olu-opfu onye obu iya gụru ìphóró adzọje ndzụ.

⁷ Ndu ẹjo-iphe bẹ ee-mechaa mebyishikọta; ẹphe achịhu. Obenu l'ọnu-ụlo onye pfụberekoto apfụjeru jịmujimu.

⁸ Ọo gẹ nkwamẹnya onyemonye jeberu bụ g'aajabejeru iya ajaja. Obenu l'onye bụ ẹjo-iphe jiru iya obu bẹ a ta agụbejedu iphe.

⁹ Ọ kakwa ree l'ị bụ onye a gụbeduru iphe; i nwekanụru onye-ozi; eme l'ị gụberu onwongu iphe l'ẹbe ọ dụ nri, i nweru.

¹⁰ Onye pfụberekoto agụbeje iphe lẹ mkpa, dụru anụ, o nweru l'ibe iya. Obenu l'obu-imemini, onye ẹjo-iphe aphụjeeru phẹ bụ adụru phẹ ẹhuka.

¹¹ Onye jeru ozi l'alị iya bẹ nri a-dụru dụa k'etsutsu iya. Obenu l'onye achị iphe-iphoro ọso te nwedu egomunggo.

¹² Onye ẹjo-iphe bẹ iphe, ndu ẹjo-ememe narụ lẹ nfụ anọduje agụ ẹgu. Obenu l'ọgbarabvu onye pfụberekoto anọduje abya pulapula.

¹³ Onye ẹjo-ememe bẹ ẹjo-epfupfu, oogudeje ọnu iya epfu anmajẹ g'ọ́nyà. Obenu l'onye pfụberekoto anahụje iphe-ẹhuka.

¹⁴ Nemadzụ egudeje opfu-ọnu pfutaru onwiya iphe-ọma. Nokwaphọ g'oogudeje iphe, oome l'ẹka metaru onwiya obunggo.

¹⁵ Iphemiphe, onye-eswe eme adụje iya ree l'ẹnya nkiya. Obenu l'onye maru iphe angabẹje nchị nụma idzu-ọma, a chị-koshiru iya.

¹⁶ Onye eswe abụjeru: a -kpatsu iya iwe; oomeẹpho g'a maru teke ono teke ono l'ẹhu eghu iya eghu. Obenu l'onye nweru egomunggo ta adụdu iphe, ọogubeje ọkonu.

¹⁷ Onye agba ekebe iphe, bụ ire-lanụ bẹ opfu iya apfụjeru ọto. Obenu l'onye ẹjo-ekebe adzụshi ụka.

¹⁸ Mkpọkoro opfu adzụje paramu g'ogu-echi. Obenu l'ire onye maru iphe eguje ẹhu egugu.

¹⁹ Ogbogboromọnu, epfu ire lanụ anọje jasụ l'ojejoje. Obenu l'ire, adzụ ụka ta adụdu g'ọono-bejeru.

²⁰ Ụghoshi dụ l'ọkpoma ndu achị ẹjo idzu. Obenu lẹ ndu achị idzu ẹhu-guu bụ ẹhu-ụtso adụje l'ọkpoma nkephẹ.

²¹ Ọ tọ dụdu ẹjo-iphe, emeje onye pfụberekoto. Obenu lẹ ndu ẹjo-iphe bụ iphe, ejije phẹ ẹka bụ iphe-ẹhuka.

²² Iphe, adụje Chipfu ẹji bụ ogbogboromọnu, adzụ ụka. Obenu lẹ ndu adụje iya ree bụ unwoke, epfu ire-lanụ.

²³ Onye nweru egomunggo ta arakashịjedu iphe, ọ maru arakashi. Obenu l'ọkpoma ndu eswe anọduje avọshi jogojogojogo opfu.

²⁴ Onye gude ẹka iya eseshi akanya ike l'e-mechaa bụru ishi. Obenu l'onye eme ẹnyiru e-mechaa bụru ohu.

²⁵ Ayọ ọshi emeje g'ike bvụ nemadzụ ẹgwegwa. Obenu l'opfu-ọma anọduje ekutse nemadzụ ekutse.

²⁶ Onye pfụberekoto akwajẹ ẹnya lẹ g'o gude eshi ọ̀nyà. Obenu l'ụzo, onye ẹjo-iphe eshi edujeru iya duswee eduswe.

²⁷ Onye ẹnyiru ta amịjedu anụ, ọ gburu amịmi. Obenu l'onye ese akanya enwejeru iphe, vu oke aswa.

²⁸ Ụzo, a pfụberekoto eshi bẹ ndzụ dụ. Mbụ lẹ gbororo iya bẹ anwụhu adụkpodaa ililekpọo.