Ẹkwo Ẹtu 11 - BAYỊBURU Izii

¹ Eme iphe, eegudeje atụ̀ ẹrwa iphe l'ụzo ẹregede; bụkwa ẹbyi l'ẹnya Chipfu. Obenu l'iphe, adụje Chipfu ree bụ eme ire-lanụ.

² Eku-onwonye nọdu eje abya; iphere etso iya etsotso. Obenu l'iphe, anọduje etso adụ àgù l'obu bẹ bụ mmamiphe.

³ Ụta ta adụ lẹ ndzụ onye pfụberekoto bụkwa iya anọduje edu iya. Obenu lẹ ndu e gudedu ire phẹ ẹka bụ iphe, emebyije phẹ nụ bụ ntuphu-ire phẹ.

⁴ Ẹku ta adụkwa urwu, adụkwadu iya nụ mbọku, ẹhu e-ghu Chileke oke eghu. Obenu l'apfụbekoto adzọje nemadzụ l'ẹka ọnwu.

⁵ Apfụbekoto k'onye ụta adụdu lẹ ndzụ iya atọgbojeru iya ụzo nhamụnha. Obenu l'iphe, akwatsuje onye ẹjo-iphe bụ eme ẹjo-iphe iya.

⁶ Apfụbekoto k'onye obu iya gụru ìphóró l'adzọje iya. Obenu l'onye e gudedu ire iya ẹka bụ ẹgu ẹjo-iphe, agụ iya nụ anmajẹ iya g'ọ́nyà.

⁷ Onye ẹjo-iphe -nwụhu; iphe, ọori l'oo-mecha mee l'ẹhu iya; alaru iya l'iyi. Iphemiphe kpọ, bụ iphe, o shi dobesụ lẹ ya e-gude ike iya mee abụru iphe-mmanụ.

⁸ Onye pfụberekoto bẹ aanafụtaje l'ẹka iphe-ẹhuka. Iphe-ẹhuka ọbu ejechia atụ-koru l'ishi onye ẹjo-iphe.

⁹ Onye te emedu ele Chileke bụ opfu ọnu bẹ oogudeje mebyishia nemadzụ ibiya. Obenu l'onye pfụberekoto egudeje nkwamẹnya nahụ.

¹⁰ Ọobujeru teke iphe ejehuru onye pfụberekoto; ndu bu lẹ mkpụkpu ete ẹswa. Teke onye ẹjo-iphe larụ ọla-l'iswi; ndiphe agbọo ọgboo.

¹¹ Ọnu-ọma k'onye obu iya gụru ìphóró akwọ-lije mkpụkpu. Obenu l'opfu-ọnu onye ẹjo-iphe emebyije iya emebyi.

¹² Onye enwedu egomunggo akpọje nemadzụ ibiya ẹbo l'afụ. Obenu l'onye nweru egomunggo bẹ l'esedeje ire iya.

¹³ Onye asụ asụlasu epfuje iphe, e domiru edomi. Obenu l'onye e gude ire iya ẹka edomikọtaje iphe, dụ ẹgube ono.

¹⁴ Ọha, a taa kpọ-ziduru ụzo adajẹkwa. Obenu a -dụ igwe akpọ-ziru ọha ụzo; l'aadzọta ọha ono.

¹⁵ Onye narụ onye ọ madụ mkpalẹka ta adụkwa iphe, e-me g'o tọ je iphe-ẹhuka. Obenu l'onye sụru lẹ ya te eyekwa ẹka l'iphe, ana mkpalẹka ta adụkwa iphe, e-me iya nụ.

¹⁶ Nwanyị, eme odoo abụjeru; a -kwabẹ iya ùbvù; l'ọ naa ya ẹka labọ. Unwoke, ewebushi akụrepho nọdu atụje ẹku gburumu swịswia.

¹⁷ Onye iphe-ọma bụ onwiya bẹ oome iya edoberu. Onye dụ ẹhuka bụkwanuru iphe-ẹhuka bẹ oometaru onwiya.

¹⁸ Iphe, ndu ẹjo-iphe setarụ l'akanya a-bụru phẹ iphe-mmanụ. Obenu l'onye akụ apfụbekoto gẹ mebyi-iphe, aakụ l'alị bẹ l'a-wọta ọkpobe iphe, ọ kụru.

¹⁹ Onye pfụberekoto ọkpobe apfụbe bẹ ndzụ adụje. Obenu l'onye agba etso eme ẹjo-iphe agbajẹ tsoru iya jasụ l'ọ gbaba l'ọnwu.

²⁰ Ndu ọkpoma dụ ẹji emekwa ẹbyi l'ẹnya Chipfu. Obenu lẹ ndu ụta adụdu lẹ ndzụ phẹ adụje Chipfu ree shii.

²¹ Ọphu ịi-makaharụ bụ lẹ ndu ẹjo-iphe bẹ a taa hadụ g'a ta hụ̀ phẹ ahụ̀hù. Obenu l'oshilọkpa ndu pfụberekoto ta adụdu iphe, ee-me phẹ nụ.

²² Nwanyị, amashị mma ike; mmamiphe pehukwanu iya l'ẹhu; dụ g'iphe-nchị, e gude mkpọla-ododo mee; woru ye ezi l'imi.

²³ Iphe, agụ onye pfụberekoto bụ ẹka ọosubeje ishi bụ l'iphe-ọma. Obenu l'iphe onye ẹjo-iphe ele ẹnya iya bụ l'ẹka ọosubeje ishi bụ l'oke-ẹhu-eghu, Chileke a-tukoshi iya.

²⁴ Onye bụ omeluko bẹ iphe iya anọduje aka shii eje. Obenu l'onye aswị aswị emechajẹ kpabua nvọ.

²⁵ Onye eme iphe-ọma bẹ ẹka a-nọdu agba ụpete. Mbụ l'onye agbajẹ nwibe iya mini l'obu bẹ aa-gbakwaphọ mini l'obu.

²⁶ Ndiphe anọduje ephu nemadzụ iphu mẹ o -gbushia ereshi gbachishia l'iphe. A nọdu ajajẹ onye reru nkiya l'orwuberu iya ajaja.

²⁷ Onye achọ iphe, du ree bẹ atụbaje ndiphe l'ẹnya. Obenu l'onye achọ ẹjo-iphe bẹ ẹjo-iphe abyapfutajẹ.

²⁸ Onye kpọru obu yeru ẹku iya a-dakwa. Obenu l'onye pfụberekoto a-nọdu aja àjàjà g'ẹkwo oyii.

²⁹ Nwoke, esetaru ndibe iya opfu bụkwa phẹrephere bẹ a-bụru okiphe iya. Tẹme ọ bụru onye eme eswe l'e-mechaa bụru onye ejeru onye maru iphe ozi.

³⁰ Mebyi, onye pfụberekoto amị bụkwa oshi emeje g'a nọdu ndzụ. Ọzo bụ l'ọo onye adụje ike pfubuta nemadzụ bụ onye maru iphe.

³¹ Eshinu aa-pfụ onye pfụberekoto ụgwo iphe, oome l'eliphe-a; bẹ aa-pfụkwa iya phọ ndu te emedu ele Chileke yẹe ndu iphe-ẹji; pfụa phẹ iya pfụgharu phẹ iya ẹka.