Ẹkwo Ẹtu 10 - BAYỊBURU Izii

Ẹtu, Sólomọnu nmashịru

¹ Ndu ọwa-a bụ ẹtu, Sólomọnu nmashịru: Nwata maru iphe emejekwa g'ẹhu tsọo nna, nwụru iya nụ ụtso. Obenu lẹ nwa, eme eswe bụ aphụ tsọru ne iya.

² Ẹku, a kparụ ẹjo akpakpa ta adụkwa urwu, ọ barụ. Obenu l'apfụbekoto adzọtaje nemadzụ l'ẹka ọnwu.

³ Chipfu ta ahajẹkwa onye pfụberekoto g'ẹgu mee ya. Obenu l'onye ẹjo-iphe bẹ o to kwejedu g'iphe, agụ iya nụ rwube iya ẹka.

⁴ Eme ẹnyiru emejekwa amadụ g'ọ daa ụkpa. Obenu l'ẹka e gude ese akanya emeje g'a baa ụba.

⁵ Onye kpatarụ iphe, ọ kọru dokọbe edokọbe l'ọnanwu bụ onye kwarụ ẹnya. Obenu l'onye anọduje eku mgbẹnya teke eemeta iphe, e meberu l'alị bụkwa onye-eswe bẹ ọ bụ.

⁶ Ọnu-ọma bụ okpu-eze, onye pfụberekoto kpu l'ishi. Obenu l'iphe, jiru ọnu onye ẹjo-iphe bụ eme nemadzụ mkpawere.

⁷ Anyata, a nyatarụ onye pfụberekoto abụjeru onye nyatarụ iya nụ iphe-ekweru. Obenu l'ẹpha onye ẹjo-iphe a-chịhu.

⁸ Onye maru iphe l'ime obu iya emeje iphe, a sụru g'e meje. Obenu l'onye epfu jogojogojogo alajẹ l'iyi.

⁹ Onye ụta adụdu lẹ ndzụ iya bẹ obu shihuru ike. Obenu l'onye eshi ụzo, dụ nggọdogo nggọdogo bẹ ee-mechanụ-a hụma.

¹⁰ Onye ebvu ẹnya ẹhuka ẹhuka bụ aphụ bẹ ọokpatsu. Tẹme onye epfu jogojogojogo nọdu alajẹ l'iyi.

¹¹ Ọnu onye pfụberekoto bụ ishi nggele mini ndzụ. Obenu l'iphe, jiru ọnu onye ẹjo-iphe bụ iphe-kpangangaa.

¹² Ndụmashi akpatsu esemopfu. Obenu lẹ n-yemobu ekpuchije iphe-ẹji g'ọ ha.

¹³ Ọnu onye iphe edoje ẹnya bụ mmamiphe eshije iya afụshi. Obenu l'onye enwedu egomunggo bụ ẹchachi nọ swiru iya.

¹⁴ Ndu mmamiphe bẹ ewojeru iphe, ẹphe maru kwakọbe. Obenu l'ọnu ndu eswe bụ ọla-l'iswi bẹ ẹphe anọduje eku oku.

¹⁵ Ụba onye nweru iphe bụ mkpụkpu, ọ kpụru kpụshia ya ike. Ụkpa bụkwanuru iya emebyishije onye enwedu iphe.

¹⁶ Ụgwo ozi, aapfụ onye pfụberekoto emeje gẹ ndzụ dụ iya. Obenu l'okpoga, onye ẹjo-iphe akpata bẹ emeje g'o mee iphe-ẹji.

¹⁷ Onye angabẹje nchị lẹ mba, aabarụ iya bụkwa ụzo ndzụ bẹ ooshi. Obenu l'onye abụjeru; a -nọdu ahụ̀ iya ahụ̀hù l'ọ dụ iya ashị l'edusweshije ndu ọzo ụzo.

¹⁸ Onye domiru ndụmashi l'obu bẹ adzụ ụka dụ l'ogbogboromọnu. Tẹme onye asụ asụlasu bụru onye-eswe.

¹⁹ Opfu -paa igwerigwe bẹ iphe-ẹji haakwaru bahụ iya. Obenu l'onye adụje ike sede ire iya bẹ kwarụ ẹnya.

²⁰ Ire onye pfụberekoto bụ ọkpobe mkpọla-ọchaa. Obenu l'iphe, shi l'obu onye ẹjo-iphe ta adụdu urwu, ọ kwatarụ baa.

²¹ Olu-opfu onye pfụberekoto azụjije ndu dụ igwerigwe ẹpho. Obenu lẹ ndu eswe anwụhuje lẹ b'enwe egomunggo.

²² Ọnu-ọma kẹ Chipfu l'emeje g'e nweru iphe. Ọphu ọ dụdu iphe-ẹhuka, ooyeje iya.

²³ Onye eswe bụ iphe, adụje iya ree bụ ẹjo-ememe. Obenu l'onye iphe edoje ẹnya bụ iphe, adụje iya ree bụ mmamiphe.

²⁴ Iphe, onye ẹjo-iphe atsụ ebvu; a -nọnyaa o mee ya; e-mekọta iya kpamu. Iphe, agụkwanu onye pfụberekoto g'e meeru iya bẹ ee-mekọtaru iya.

²⁵ Ọo gẹ oke-phẹrephere ezije tuutuutuu zighata-a bụ g'onye ẹjo-iphe achịhuje. Obenu l'onye pfụberekoto eshihuje dụngudungu jasụ l'ojejoje.

²⁶ Ọo gẹ mẹe-venịga adụje l'eze-a; mbụ g'ẹnwuru-ọku adụje l'ẹnya-a bụ g'onye ẹnyiru adụje onye ezi iya ozi.

²⁷ Atsụ Chipfu ebvu akpọriberu ndzụ. Obenu lẹ ndzụ onye ẹjo-iphe bẹ eegbuje mkpirikpu.

²⁸ Iphe, onye pfụberekoto ele ẹnya iya bụ ẹhu-ụtso. Obenu l'iphe, onye ẹjo-iphe daru ngabẹru emechajẹ bụru iphe-mmanụ.

²⁹ Eshi ụzo Chipfu bụ iphe, edomije ndu pfụberekoto bya abụkwanuru iphe, etsupyashịje ndu emeje iphe, adụdu ree.

³⁰ Onye pfụberekoto bẹ a ta abyakwa enwubata enwubata. Obenu lẹ ndu ẹjo-iphe tee buduru l'alị ono.

³¹ Ọnu onye pfụberekoto bụ iphe, eshije iya nụ bụ mmamiphe. Obenu l'ire, apfụduru-ọto bẹ ee-mechaa sebufu.

³² Ọnu onye pfụberekoto maru iphe, bụ: e -pfua ya l'ọ dụ nhamụnha. Obenu l'ọnu onye ẹjo-iphe bụ iphe, ọ maru kpoloko bụ iphe, dụ nggọdogo nggọdogo.