Ẹkwo Ẹtu 1 - BAYỊBURU Izii

Urwu, dụ l'ẹtu

¹ Ẹtu, Sólomọnu, bụ nwa Dévidi nmashịru; mbụ eze ndu Ízurẹlu. Iphe, e dedoru iya bụ;

² gẹ nemadzụ egude iya maru iphe; bya abụru onye a hụ̀ru ahụ̀hù. Tẹme waa g'opfu, dụ omilomi doo ẹnya.

³ G'a nọdu ndzụ bụru onye a hụ̀ru ahụ̀hù; yẹe onye kwarụ ẹnya; bya abụru onye a-nọdu eme iphe, dụ ree; waa iphe, pfụru ọto.

⁴ G'e gude iya mee gẹ ndu enwedu egomunggo kwa ẹnya; mekwaphọ g'okorọbya maru iphe; makwarụpho eye ọnu l'opfu.

⁵ Gẹ ndu maru iphe ngabẹ nchị yekwabaa iphe l'iphe, ẹphe nwụtaru. Tẹme ndu iphe edoje ẹnya angabẹkwapho nchị g'a kpọ-zibaaru phẹ ụzo.

⁶ Tẹme g'e gudekwa iya phọ mee g'ẹtu doo ẹnya; bya emekwaphọ g'ílù, ndu maru iphe atụ; yẹe opfu phẹ doo ẹnya.

⁷ Ọ kwa atsụ Chipfu ebvu bụ egbube ishi mmamiphe. Obenu lẹ ndu eswe bẹ ta adụdu iphe, ẹphe agụbeje mmamiphe yẹe ahụ̀hù.

Ọkwa, a nmarụ ụnwokorobya

⁸ Sụ-a; nwa mu; ngabẹje nchị mẹ nna ngu nọdu abarụ ngu mba. Ọphu i wokwaru iphe, ne ngu ezi ngu kpọo ẹbo l'afụ.

⁹ Kẹle opfu phẹ ono a-bụkwaru okpulishi, e-me l'ị dụ ùbvù. Tẹme l'ọ bụru ịyagba-olu, a-tụkpo ngu l'olu gude mee l'ị bụru ẹguru.

¹⁰ Nwa mu; teke ndu iphe-ẹji ede ngu edede; b'ekwekwa g'ẹphe deta ngu.

¹¹ Ọ -bụru l'ẹphe sụru ngu g'ị bya etsoru phẹ; g'unu je egeparu gbua nemadzụ; mbụ g'unu je edomia onwunu kwabẹru onye adụdu iphe, o meru;

¹² g'unu je elwee phẹ lẹ ndzụ g'ilu elweje odzu-a; mbụ lwee phẹ wọo gẹ ndu bahụru l'iduma;

¹³ mbụ m'obetachakpọ ẹphe sụ ngu l'unu a-natakwa iphe, eregbaa ire; mbụ l'unu e-gudekwa iphe, unu natarụ lẹ nfụ dojia ụlo unu edoji;

¹⁴ ẹphe -sụ ngu ngwa; g'unu l'ẹphe tụko swịru; k'ọphu unu l'ẹphe a-gbarụ mgba l'ẹda okpoga ọbu;

¹⁵ Nwa mu; te etsokwaru phẹ! Te eyekwa ọkpa l'ụzo, ẹphe eshi!

¹⁶ Kẹle ọkpa phẹ anọduje ekwo gburumu ala l'eme iphe-ẹji. Tẹme ọphu egbu nemadzụ adụdu iphe, ọobujeru phẹ.

¹⁷ L'onye wotaru ọ́nyà-ẹnu je ekweberu ẹnu l'ẹka ẹnu ele iya ẹnya bụkwa iphe-iphoro bẹ oome.

¹⁸ Ọ kwa mee nkephẹ bẹ ẹphe geparu kwabẹru. Ọ kwa onwophẹ bẹ ẹphe domiru onwophẹ echeru.

¹⁹ Mbụ l'ọo ẹgube ono bụ g'ọo-dụ iphe, bụkpoo ndu ana ndu ọzo iphe phẹ l'ike. Urwu, e ritaru l'ụzo, dụ nno egbujekwa onye ritaru iya nụ.

Ọkwa, a nmarụ ndu jịkaru mmamiphe

²⁰ Mmamiphe tsoru gbororo echi mkpu. Ọ nọ l'echi edupfu akpọ okwe.

²¹ Ọobujeru; o -rwua l'ishi ụzo l'o chia mkpu. Teke ọ byaru l'ọnu-abata mkpụkpu l'ọ pfụru saarụ ọha opfu sụ:

²² Unubẹ ndu enwedu egomunggo; ?bụ teke ole bẹ unu e-mebekpọru eswe? ?Bụkpoo teke ole bẹ achị ndu ọzo ọchi e-bebekpọ tsọ-buhu ndu anọduje achị iya nụ ụtso? Mbụ-a; ?bụ gụnu meadaa tẹme mmamiphe adụ-buhu ndu eswe ashị?

²³ Unu ghakwaaru mu iphu nụma mba, mu abarụ unu; k'ọphu mu e-goshi unu obu mu; mbụ mee g'unu maru g'ọ dụ mu l'obu!

²⁴ Obenu eshinu unu jịkaru mu teke mu kuru unu oku; mu machịaru unu ẹka; ọphu ọ dụdu onye yeru mu ọnu;

²⁵ eshinu unu woru idzu, mu chị-koshiru unu hua l'alị; ọphu unu anatadụru mba, mu barụ unu;

²⁶ bẹ mbẹdua e-mechakwaa chịa unu ọchi; mẹ iphe-ẹhuka dapfutaẹpho unu. Mu e-kwekwaru unu une mẹ ndzụ-agụgu rwutaẹpho unu;

²⁷ mbụ teke ndzụ-agụgu e-zi g'oke phẹrephere bya ezikọta unu; ọzoo teke iphe-ẹhuka e-gude oke phẹrephere bya anmakọta unu; mbụ mẹ iphe-ẹhuka yẹe aphụ byapfutaẹpho unu.

²⁸ “Noo teke ẹphe e-ku mu oku; mu ta azadụ phẹ ẹnu. Ẹphe elee ẹnya mu; ẹphe ta ahụmadu mu.

²⁹ Sụ: eshinu mmamiphe dụ phẹ ashị; ọphu ẹphe ahataduru etso ụzo atsụ Chipfu ebvu;

³⁰ eshinu mu chị-koshiru phẹ idzu; ọphu ẹphe ekwedu mu angabẹru nchị; tẹme ẹphe jịka mba, mu barụ phẹ;

³¹ bẹ ẹphe e-mechaa ria urwu ẹjo ụzo, ẹphe etso; mbụ ria urwu ẹjo idzu, ẹphe achị; rijia ya ẹpho.

³² Ẹjo ụzo ono, ndu enwedu egomunggo hatarụ ono e-gbukwa phẹ. Tẹme ejiji, ndu eswe jiru onwophẹ ẹnya ono e-mekwaphọ; ẹphe abụru ọla-l'iswi.

³³ Obenu l'onye ngabẹru mụbe mmamiphe nchị bẹ ta adụdu iphe, byaru eme iya nụ. Ẹhu a-dụ iya guu; ọ tọ dụdu iphe, ọotsu ebvu k'a -nọnyakwaa; o mee ya.”