Ebvu Sólomọnu 8 - BAYỊBURU Izii

¹ Ọme ị gbẹ bụru nwune mu nwoke; mbụ onye ne mu cheru ẹra; mẹ anyi lẹ ngu -hụma l'ụzo mẹ mu etsutsujekwa ngu ọnu; o to nwedu onye a-sụ mu sụu.

² Mbụ mẹ mu eduta ngu dubata l'ụlo ne mu; bụ iya bụ onye ziru mu iphe; je echee ngu ọkpobe mẹe, mu kụtaru; mbụ mẹe, shi l'ige itorokuma.

³ Ẹkicha bẹ o yeru mu l'ishi; bya egude ẹkutara iya gbaphua mu.

⁴ Unubẹ ụnwada Jierúsalẹmu; unu kwee mu ukwe; l'unu ta akpatsudu n-yemobu jasụ l'ọ bya l'onwiya.

Ike n-yemobu

⁵ ?Bụ onye bụ ọphuu, shi l'echiẹgu abya phọ, dakoberu onye o yeru obu ẹgube phọ? Ọ kwa lẹ mkpula ụdara bẹ ị zẹ; mu bya akpatsu ngu. Ọ bụru l'ẹka ono bẹ ne ngu nwụru ngu. Mbụ l'ọo l'ẹka ono bẹ ime watarụ iya ememe; ọ nwụa ngu.

⁶ Mee mu gẹ mu dụ g'iphe-olu, ịnya l'olu, egude mee iphe-ọhubama; ọ nọdu achịchi ngu l'ọkpoma. Mee mu rọ gẹ mu dụ g'iphe-ọhubama, ị gba l'ẹka. Kẹle n-yemobu dụ-bekwa ọkpehu g'anwụhu. Okophoo ya dụkwapho g'ilu, a ta rwọ-butajẹdu arwọ-buta. Ọ nọdu ahụje g'ọ ta pfụpfupfu ọku; mbụ g'ọku enwu phoophoophoo.

⁷ Oke mini ta adụkwa ike anmanyị n-yemobu; ọphu utso adụdu ike eri iya. Ọ -bụru lẹ nemadzụ gude iphemiphe, o nweru g'ọ ha eme g'ọ zụa n-yemobu; bẹ oomekwa g'a kpọo ya ẹbo l'afụ.

Nwanyị ono yẹe unwune iya

⁸ Anyi nwekwarụ nwune nwanyị; ọle ẹra teke adụdu iya l'ọkpoma. ?Bụ gụnu bẹ anyi e-meru nwune anyi ono mbọku, a jịru ajị iya?

⁹ Ọ -bụru l'o shihuru ike g'igbụlo; bẹ anyi e-woru mkpọla-ọchaa kwọo ya nkwọtankwo l'ẹhu. Teke ọ bụkwanu l'o gheru ọnu g'ọnu-abata; anyi egude mgbo sida gụ-chita iya.

¹⁰ Mu shihukwaru ike g'igbụlo. Tẹme ẹra mu tụko pfụgbaaru kẹ kẹkereke g'ụlo-eli. Onye mu yeru obu bẹ maakwaru lẹ mu l'iya -nọ-kubewaa bẹ ẹhu adụjee ya phọ guu.

¹¹ Sólomọnu nweru opfu-vayịnu lẹ Belu-Hamọnu; bya eworu iya ye l'ẹka ndu a-nọdu apfụ iya ụgwo. Onyemonye lẹ ndu ono bụ iphe, ẹphe e-wotajẹru iya l'aswa akpụru vayịnu ono bụ ẹkpa mkpọla-ọchaa iri iri.

¹² Obenu l'opfu-vayịnu nkemu bụ mu nwe iya. Ọ bụru g'ọ dụ mu ree bụ gẹ mu e-me iya. Gụbe Sólomọnu; ọ kwa gụbedua e-nweru ẹkpa mkpọla-ọchaa iri l'iphe, e retaru lẹ vayịnu ono. Ẹkpa mkpọla-ọchaa labọ abụru kẹ ndu eletajẹ iya ẹnya.

Ụja nwoke ono yẹe onye o yeru obu

¹³ Gụbe onye ono, bu lẹ mgbabu ono; ndu mu l'ẹphe eshi ọ̀nyà ngabẹkwaru nchị g'ẹphe nụma olu ngu. Gẹ mu nụmaedukwa olu-opfu ngu ọbu!

Nwanyị ono sụ:

¹⁴ Jiko gụbe onye yeru mu obu; pfụkwaa kẹ shọoshoo byapfuta mu ẹgwegwa; ẹgube ono anịgo; ọzoo ele nshịi apfụje phọ l'úbvú, a kụshiru iphe, eshi mkpọ!