Ebvu Sólomọnu 7 - BAYỊBURU Izii

¹ Gụbe ada-eze; iphe, ị dụkwanu ùbvù l'ẹka i yeru akpọkpa akpọ ebvu akpọkpo! Ụtapfu ngu tụko ama gẹ mkpuma, vu oke-aswa, onye maru eme ọna kwọcharu akwọcha.

² Mkpotubo ngu gbaẹrupho kerere g'otumu; mbụ otumu, mẹe-vayịnu ta abvụjedu abvụbvu. Ẹpho ngu dụepho g'igberi, a kụberu l'ikpo l'ikpo; bya edophee ya ojimbvu, ama mma mgburugburu.

³ Ẹra ngu ẹphenebo dụ g'ụnwu umoro labọ. Mbụ g'ụnwu umoro, a nwụru ẹbo.

⁴ Olu ngu dụ g'ụlo-eli, e meru l'eze-enyi. Ẹnya ngu ẹphenebo doru kẹ rịsaa g'okpuru mkpụkpu Hẹshibonu; mbụ ono, nọ-kube ọguzo Batu-Rabimu. Imi ngu degeru edegeru g'ụlo-eli Lébanọnu, gharu iphu lẹ mkpụkpu Damasụkosu.

⁵ Ishi ngu meru ngu; ị nọdu ama mma g'úbvú Kamẹlu. Ẹgbushi, nọ ngu l'ishi nọdu eke oruswe oruswe. Iphe, eze eje rwụhuru ẹka ọ nọ ele ẹgbushi ngu g'a swịngashiru iya; ọ nọdu ama ntụmatu.

⁶ Lewarọ gẹ gụbe onye mu yeru obu amabe mma; bya adụ ùbvù l'ẹnya; waa g'ị bụ-be nwamgbọko, emeje nemadzụ ẹhu-ụtso!

⁷ L'ụgbugba bẹ ị mịtaerupho kẹ swangụswangu gẹ mpfụ. Ẹra ngu ẹphenebo dụchaepho kẹ nwajọpfula.

⁸ Mu sụru: “Mu e-nyihu mpfụ ono enyihu; je enwota iya ẹpfu.” G'ẹra ngu dụkwa kẹ jọpfula g'akpụru vayịnu. Tẹme unme, ịitufuta eshi kwẹekweekwee gẹ mpfụ-alị.

⁹ Tẹme ọnu nọdu atsọ ngu mẹe mẹe gẹ mẹe, kachaa atsọ ụtso. G'ọ bụkwaru onye ono, mu yeru obu ono a-ngu mẹe ono! Mbụ-a g'ọ tọkpoepho nwẹhu shi l'ụgbonu sọba iya l'ọnu!

Nwanyị ono ele ẹnya onye o yeru obu

¹⁰ Ọ kwa onye ono, mu yeru obu ono bẹ mu bụ nkiya. Tẹme mu bụkwarupho onye anọduje agụ iya ẹgu.

¹¹ Byanụ gụbe onye mu yeru obu g'anyi je l'ọma ẹgu! G'anyi je akwajẹ l'ime mkpụkpu!

¹² G'anyi nmaa ẹwa l'ụtsu jeẹdu l'opfu-vayịnu; je amaru mẹ vayịnu tụwaru ige. Mbụ g'anyi maẹduru m'ige iya jashịkotawaru. Anyi amakwarụpho mẹ oshi ụdara ono tụshiwaru ige nkiya. Ọ bụru ẹka ono bẹ mu a-nọdu goshi ngu lẹ mu yeru ngu obu.

¹³ Oshi mandureku eshikwa mkpọ. Akpụru oshi ọ̀phúú; mẹ akahụ iya, dụgbaa iche iche, nọ l'ọnu-ụlo anyi bẹ mu dobekwaru gụbe onye yeru mu obu.