Ebvu Sólomọnu 6 - BAYỊBURU Izii

Ajị, ụnwada Jierúsalẹmu ajị

¹ ?Bụ awe bẹ onye i yeru obu ọbu jeru; gụbe nwanyị, kachaa ama mma l'iphe, bụ ụnwanyi? ?Bụ ụzo awe bẹ onye i yeru obu ọbu phoberu; k'ọphu anyi achọ-bude ngu iya?

Ọnu nwanyị ono eye

² Onye mu yeru obu jeru lẹ mgbabu iya; mbụ l'ẹka ọ dzashịru iphe, eshi mkpọ. O jeru eche atụru iya lẹ mgbabu ono; tẹme l'oomekọkwapho ojimbvu.

³ Mu bụ k'onye mu yeru obu; onye mu yeru obu bụru nkemu. Ooche atụru iya l'ẹka ojimbvu kụru.

Nwoke ono atụ ọnu nyee ya l'edzudzu ọha

⁴ Gụbe onye nọ mu l'obu; ịima mma gẹ mkpụkpu Tịza; mbụ l'ị dụta-beru ùbvù gẹ Jierúsalẹmu. Ị dụ-be akpabiri gẹ ndu ojọgu, pa ẹkwa-ọgu phẹ.

⁵ Jiko te elehẹ mu ẹnya; kẹle ẹnya ngu anọduje alọ mu ẹka lẹ meji. Ẹgbushi, nọ ngu l'ishi tụko ejigbaa g'ẹka eghu dzeberu shi l'eli úbvú Giladu awụ-zeta.

⁶ Eze ngu nọdu achaẹpho pemu pemu g'ikpoto atụru, shi l'ẹka a wụshiru phẹ ẹhu awụfuta. G'ẹphe ha tụko chịgbaaru ụnwu ẹbo ẹbo; ọphu ọ dụdu mẹ nanụ, gba ẹka nwa.

⁷ Agbagba nchị ngu, i phuchiteru ẹkwa ono yeru ụdara, e buwaharu ẹbo.

⁸ Unyomu eze a-dụchakpokwa ụkporo ẹto; ndu ọphu abụ-zidu unyomu iya adụkwaro ụkporo ẹno; tẹme ụnwumgboko, e teke ejepfuswe abụkwaruro agụta agụta.

⁹ Gụbe ndo-nwẹnu mu; gụbe onye nkemu, dụebe ree; ị bụ onye gbaru iche; bya abụru onye tụbaru ne iya l'ẹnya; mbụ onye ntụcha adụdu l'ẹhu l'ẹnya ne, nwụru iya nụ. Ụnwumgboko hụmaru iya bya ekua ya onye a gọru ẹhu-ụtso nụ. Ndu bụ eze-nwanyị; mẹ ndu a ta lụzidu ọkpobe alụlu jakwaru iya phọ ajaja.

¹⁰ ?Bụ onye dụ g'ìphóró nchi-abọhu ono? ?Bụ onye egbu pemu pemu g'ọnwa ono? Mbụ-a; ?bụ onye egbu nwịinwii g'ẹnyanwu ono? ?Bụ onye dụ akpabiri gẹ ndu ojọgu, chịgbaa ẹkwa-ọgu?

¹¹ Mu jeru l'ẹka a dzashịru oshi, aphọje ishi; gẹ mu je agbaphee iphe efushigba k'ọ̀phúú lẹ nsụda ono; gẹ mu maẹduru vayịnu emeshiwa okoko; wakwaphọ gẹ mu maru mẹ itorokuma atụwa ige.

¹² Iphe ono bya edo mu ẹnya; egomunggo mu gbẹ nọduwanu l'ụgbo-inya ono, ndibe mu gude dulataru mu nwamgbọko mu ono.

¹³ Lwanụ azụ! Lwanụ azụ; gụbe nwanyị Shulemu! Lwanụ azụ! Lwanụ azụ; g'anyi lerwee ngu ẹnya elerwee! ?Bụ gụnu meru iphe, unu anọdu ele nwanyị Shulemu taataataa g'onye ele ndu Mahanemu ẹnya ẹka ẹphe ete ebvu?