Ebvu Sólomọnu 5 - BAYỊBURU Izii

Ọnu nwoke yẹe nwanyị ono eye

¹ Gụbe nwanyị, mu lụru k'ọ̀phúú; bya abụru nwune mu; mu bataakwaru lẹ mgbabu mu ono. Mu hekọakwaru ụ̀nwù mẹru mu; mẹwaro ụ̀nwù ọzo, eshigbaa kwẹekweekwee. Mu riakwaru manụ-ẹnwu mu; yẹe ẹbakala iya. Mẹe mu; yẹe mini ẹra-eswi mu bẹ mu ngụakwaru. Unu ria ngụa; unubẹ ndu ọ̀nyà! Unu ngụa ngụta ike unu; unubẹ ndu yeru onwunu obu!

² Mu eku mgbẹnya; obenu l'obu mu nwụ ẹnya. Ngabẹkpodapho! Ọ kwa onye mu yeru obu akụ ẹka lẹ mgbo sụ: “Gụharu mu ụzo; gụbe onye dụ mu l'obu; bya abụru nwune mu; gụbe onye bụ nwando-nwẹnu mu; bya abụru onye nkemu, ntụcha adụdu l'ẹhu! Kẹle iji dawarụ kpua mu; ishi dụwaa mu minimini. Ẹgbushi mu bẹ iji ẹnyashi meakwaru; ọ bụkotaru mini.”

Ọnu, nwanyị ono eye

³ Mu yefuakwaru uwe mu. ?Bụ gẹ mu gbẹ nta-a yephu iya azụ ọzo tọo? Ọkpa bẹ mu kwọwaru akwọkwo. ?Bụ gẹ mu gbẹ nta-a zọbe iya l'alị ọzo tọo?

⁴ Onye ono, mu yeru obu ono bya epyoo ẹka lẹ mgbaka mgbo. Ẹhu meẹ mu phọ yẹreketeke.

⁵ Mu zilihu gẹ mu gụhaaru onye mu yeru obu ụzo; bya emeta manụ mẹru nyịa; ọ nọdu anwụkota mu shọkoshoko lẹ mkpụshi-ẹka; gẹ mu zụru ẹka l'iphe, eegudeje agụha mgbo ono.

⁶ Mu bya agụhaaru onye mu yeru obu ụzo; ọphu ọ nọedu iya; ọ tụgbuwa. Atụgbu iya ono mee; meji tọfu mu. Mu chọo ya nta chọo imo; ọphu mu achọ-vuduru iya. Mu kua ya nta kua imo; ọphu mu ekuvuduru iya.

⁷ Ndu nche ẹnyashi hụma mu teke ẹphe tsoru ọma-mkpụkpu ejephe agbaphe ụzo. Ẹphe chia mu iphe; chibashicha mu ọ́nyá; tọtachaa mu ukpo, mu gbaphuru onwomu; mbụ ndu nche igbulọ mkpụkpu ono.

⁸ Unubẹ ụnwada Jierúsalẹmu; unu kwee mu ukwe l'unu -hụma onye ono, mu yeru obu ono bẹ unu e-zi iya l'oghoroko iya egbukwa mu egbugbu.

Ọnu ụnwada Jierúsalẹmu eye

⁹ ?Bụ gụnu bẹ onye ọbu, i yeru obu ọbu gude ka ndu ọzo, e yeru obu mma? Gụbe nwanyị ọphu mma nkengu kapyabẹkotaru kẹ ndu ọzo; kaẹshịduru anyi g'onye i yeru obu ọbu gude ka ndu ọzo ama mma; meru g'o gude ị nọdu arwọ anyi ẹgube arwọrwo ono.

¹⁰ Onye ono, mu yeru obu ono nwukwaru kẹ pfụu; bya egbu nwịinwii. L'echilabọ ụnubuku nemadzụ bẹ yẹbedua agbajẹepho iche.

¹¹ Ishi iya dụ g'ọkpobe mkpọla-ododo. Ẹgbushi iya tụko dụchaa kẹ nwa wụyawuya; bya ejiẹpho hirihiri g'okpoko-ọ́hà.

¹² Ẹnya iya dụ g'ẹnya ndo-nwẹnu, beru l'agụga nggele. Mbụ l'o doru rịsaa g'a sarụ iya l'ẹra-eswi. Ọ nọdugbaa lẹ nhamụnha iya.

¹³ Agbagba nchị iya ẹphenebo dụepho g'igbo, a dzashịru iphe, anọduje eshi kwẹekweekwee. Ogbogboromọnu iya dụ g'ojimbvu, asọshi manụ mẹru.

¹⁴ Oshi-ẹka iya dụ gẹ mgbọro mkpọla-ododo, e gude kìrísòlàyìtù mee; ọ dụ ùbvù l'ẹnya. Ẹhu iya nọdu akwọ kẹ bụruburu g'eze-enyi, e hucharụ ehucha; bya egude mkpuma, vu oke-aswa; mbụ safayịru mee ya; ọ dụ ùbvù l'ẹnya.

¹⁵ Oshi-ọkpa iya pfụru kẹ rọo g'òbvúrú mkpuma-egbe; mbụ ọphu a pfụberu lẹ ntọlali mkpọla-ododo. Ụgbugba ẹhu iya nọepho kẹ gbọmugbomu g'úbvú úbvú Lébanọnu; mbụ l'ọomaepho g'oshi sida, nọ iya nụ.

¹⁶ Olu-opfu iya anọduje atsọ gẹ manụ-ẹnwu. Ọ bụepho l'ọoma mma amagharu iya ẹka. Unubẹ ụnwada Jierúsalẹmu; ọ kwa g'ọ gbaru bụ ono; mbụ onye ono, yeru mu obu ono; bya abụru ọ̀nyà mu ono.