Ebvu Sólomọnu 4 - BAYỊBURU Izii

N-yemobu nwoke ono

¹ Iphe, ị dụkwanu l'ọo ùbvù; gụbe onye dụ mu l'obu! Iphe, ị dụkpokwana l'ọo ùbvù! Ẹnya ngu ono, i phuchiteru ẹkwa ono dụepho gẹ kẹ ndo-nwẹnu Ẹgbushi ngu tụko ejigbaa g'ẹka eghu dzeberu shi l'eli úbvú Giladu awụ-zeta.

² Eze ngu achaẹpho pemu pemu g'igwe atụru, e bushigbaaru ẹji k'ọ̀phúú; bya awụa ya ẹhu; ẹphe tụko shi l'ẹka ono awụfuta. G'ẹphe ha tụko chịgbaaru ụnwu ẹbo ẹbo; ọphu ọ dụdu mẹ nanụ, gba ẹka nwa.

³ Ụgbonu ngu ẹphenebo tụko nwua kẹ pfụu g'oghu uswe. Ọnu ngu l'onwiya tụko ama ntụmatu! Agbagba nchị ngu, i phuchiteru ẹkwa yeru ụdara, e buwaharu ẹbo.

⁴ Olu ngu mịtaru ogologo g'ụlo-eli, Dévidi kpụru, bụ ẹka eedobeje ngwọgu. Ọo l'igbulọ iya bẹ e kokaaru iphe, eegudeje ezeru ndzụ l'ọgu, dụ ụnu labọ l'ụkporo iri. Ndu ojọgu egudeje iya ezeru ndzụ l'ọgu.

⁵ Ẹra ngu ẹphenebo dụ g'ụnwu umoro labọ. Mbụ g'ụnwu umoro, a nwụru ẹbo, bụepho ẹka ojimbvu dụ bẹ ẹphe anọduje akpa nri.

⁶ Mu e-je anọdu l'eli úbvú, a dzarụ oshi mẹru; mẹkwapho l'eli-òbvù, a dzarụ isẹnsu; jeye l'ụzenyashi; teke onyonyo-anwụ adụedu.

⁷ Gụbe onye dụ mu l'obu; ị bụkwa nwọmarima; mbụ l'o to nwedu ẹka ntụcha dụ ngu l'ẹhu mẹ nanụ.

⁸ Gụbe nwanyị, mu lụru k'ọ̀phúú; shi l'úbvú úbvú Lébanọnu tsoru mu! Jiko shinu l'úbvú úbvú Lébanọnu tsoru mu g'anyi je! Ngwa; gbẹnu l'eli úbvú Amana nyizeta! Shirọ l'eli úbvú Seniru, bụ iya bụ mkpọkponu úbvú Hamọnu lụfuta; mbụ ẹka ono bụ ọgba oduma ono; ẹka agụ edomishije onwophẹ.

⁹ Gụbe nwamgbọko, mu lụru k'ọ̀phúú; bya abụru nwune mu; obu, mu yeru ngu hatakwaru mu meji. Ẹnya, i leru mu mgbo lanụ; mẹ iphe-olu, ị tụkporu l'olu; bẹ i gudeẹpho hata mu meji.

¹⁰ Lewarọ gẹ n-yemobu ngu aatsọ-beru ụtso; gụbe onye bụ nwamgbọko, mu lụru k'ọ̀phúú bya abụru nwune mu. N-yemobu ngu kakwa mẹe atsọ ụtso. Ọ bụkwarupho nno bụ gẹ manụ, ị nyịru kakọtakwapho manụ ọzo eshi mkpọ.

¹¹ Gụbe nwanyị, mu lụru k'ọ̀phúú; opfu, eshije ngu l'ọnu fụta anọduje atsọ gẹ manụ-ẹnwu, shi l'ẹbakala-ẹnwu atada. Ire ngu bụ mini ẹra-eswi; waa manụ-ẹnwu jiru iya. Uwe ngu eshi kwẹekweekwee g'úbvú úbvú Lébanọnu.

¹² Gụbe onye bụ nwanyị, mu lụru k'ọ̀phúú; bya abụru nwune mu; ị dụepho gẹ mgbabu, a tụ-chiru atụ-chi. Ị dụ g'òbvú, anwụshi mini, e kpuberu iphe; mbụ g'ọgba-mini, a dọberu iphe.

¹³ Ụdara, amịshi akpụru, dụ ree bụ iphe, jiru mgbabu ngu. Oshi hena; mẹ nadụ jikwaphọ mgbabu ngu ono ejiji.

¹⁴ Oshi nadụ; mẹ ọphu aza safarọnu dụ iya. Oshi kalamọsu; mẹ oshi sinamọnu dụkwa iya phọ. Iphe, bụkpoo oshi isẹnsu, dụ iche iche pfụru iya. Mẹru; mẹ alowe; mẹkota oshi, eegudeje eme iphe, eshi mkpọ pfụkotakwaru iya phọ.

¹⁵ Ị bụ ọgba-mini, doru rịsaa; nọ l'ime mgbabu; tẹme ị bụru wẹlu-mini, l'anụ ndzụ; bya abụru nggele, shi l'úbvú úbvú Lébanọnu asọshihu.

¹⁶ Gụbe phẹrephere ụzo isheli; tehu etehu! Watanụ ezizi; gụbe phẹrephere ọphu shi l'ụzo ndọhali! Unu bya ezia lẹ mgbabu mu-a; gẹ mkpọ iya atụko mgboko vọo pfurupfuru! Jiko batanu lẹ mgbabu ngu gụbe onye mu yeru obu; bya awọta akpụru-iphe, a kụru iya ọphu kachaa ree ria.