Ebvu Sólomọnu 3 - BAYỊBURU Izii

Nwanyị ono achọ onye o yeru obu

¹ L'ẹnyashi bẹ mu azẹkotaje l'iphe azẹ mu gude egomunggo achọ onye mu yeru obu; ọle mu chọru iya nta chọo imo; ọphu mu ahụmaduru iya.

² Mu sụ: “Nta bẹ mu a-gbẹshi tsoru ọma mkpụkpu; mbụ tụko ọma gbororo; mẹ edupfu jekọta; achọ onye ono, mu yeru obu ono.” Ọ bụru nno bụ gẹ mu lekọtaru ẹnya iya; ọphu mu ahụmaduru iya.

³ Anyi lẹ ndu nche ẹnyashi dzuda; teke ẹphe tsoru ọma mkpụkpu ejephe. Mu jịa phẹ sụ: “?Unu levukpọru mu onye mu yeru obu?”

⁴ Mu gharịbeeru phẹ phọ nwanshịi; mu hụma onye ono, mu yeru obu ono. Mu tụ iya gburumu; ọphu mu ekweẹdu iya ahaha. Mu kpụa ya gbiriri jasụ mu kpụ-rwuta iya ụlo ne mu; mbụ kpụ-rwuta iya mkpuru onye tsụru ime mu.

⁵ Unubẹ ụnwada Jierúsalẹmu; unu kwee mu ukwe l'unu taa kpatsudu n-yemobu mu; ọphu unu emetedu iya lẹ mgbẹnya jasụ l'ọ bya l'onwiya; kẹle n-yemobu bụkwa g'eedoje ọkpa anịgo; mẹ k'ele-a bụ g'eedoje ọkpa iya.

Alwalwa onye eze ono

⁶ ?Bụ onye shi l'echiẹgu eje abya phọ; dụ g'ẹka ẹnwuru-ọku akpụ tụutuutuu phọ? Mbụ onye a wụru mẹru mẹ isẹnsu, e gude iphe, eshi kwẹekweekwee, ndu agba nghọ, ere ire mee.

⁷ Lenu-o! Ọ kwa iphe, Sólomọnu zẹ bẹ a pa abya phọ! Ndu edu iya nụ dụ ụkporo ndu ojọgu ẹto, a gụtaru l'iphe, bụ ndu kachaa abụru mkparawa lẹ Ízurẹlu.

⁸ Ẹphe tụkoru turu ogu-echi phẹ l'upfu; tẹme ẹphe bụkotaru ndu k'ọgu doru ẹnya. Mbụ l'ẹphe tụkoru turu ogu-echi phẹ l'upfu; kwabẹru ẹjo-iphe a-nwụ l'ẹnyashi.

⁹ Eze Sólomọnu metaru onwiya iphe, e gude apa eze. Oshi, o gude mee ya bụ oshi, shi l'úbvú úbvú Lébanọnu.

¹⁰ Ọkpa iya bụ mkpọla-ọchaa bẹ o gude mekọta iya. Oshi-ẹhu iya, ẹka aadakobeje adakobe bẹ e gude mkpọla-ododo wụa. Ẹka aanọduje anọo bẹ e kwekọtaru ẹkwa, eji g'ube. Ime iya bẹ a phụshikotaru ẹkwa, amakọta mma; mbụ ẹkwa, ụnwada Jierúsalẹmu kpashịru gude goshi n-yemobu phẹ.

¹¹ Unu wụfuta-o; unubẹ ụnwada Zayọnu; unu bya ahụma ẹka eze Sólomọnu kpu okpu-eze iya; mbụ okpu-eze ono, ne iya kpuberu iya mbọku ono, ọ lụru nwanyị ono; bụ mbọku, ẹhu tsọru iya ụtso ono!